ECLESIASTÉS 7 - Dios Rimashca Shimicunami

Ashtahuan alli cajta uyashpa cazunamanta

¹ Tucuicuna rijsishca alli runa canaca, sumaj mishquijllata ashnaj jambihuan llihuirishcata yalli allimi. Huañui punllaca huachari punllata yalli allimi.

² Jatun micuita ruracun huasiman rinapaj randica, huañui tiyashca huasipi compañanaman rinami alli. Cai pachapi causajcunapajca, chai punllami tucui imapish tucurin. Causaj runaca chaita ricushpami yuyaringa.

³ Huacanaca asinata yalli allimi. Llaquilla ñahui tucujpimi, shunguca manchashpa alli tucun.

⁴ Yachaj runacunaca, huañui tiyashca huasiman rinatami yuyan. Ashtahuanpish ch'ahuan runacunaca, jatun micuita ruracun huasimanmi callpan.

⁵ Ch'ahuan runacuna cantashcata uyanapaj randica, yachaj runa cunashcata uyanami alli.

⁶ Ch'ahuan runa asishcaca, casha trasyashpa manga ucupi rupacuj shinallami. Asinapish yangallatajmi.

⁷ Pitapish llaquichishpaca, yachaj runapish upa runa shinallatajmi tucun. Camaricunaca alli canata saquichinllami.

⁸ Imata ruranapish ña tucurishca cashpaca, cunanlla callarishcata yalli allimi. Mana utca p'iñarij canaca, c'ari tucushca canata yalli allimi.

⁹ Imamantapish ama jahualla p'iñaringuichu. Ch'ahuancunallami chashna p'iñarincuna.

¹⁰ Ama: ¿Imamantashi ñaupa huatacunaca tucui imapish cunan horasta yalli alli carca? niringuichu. Chashna nishpaca, mana yachaj cashcamantachu chashna tapungui.

¹¹ Cai pachapi achij intita ricushpa causajcunapajca, yachaj canaca allimari. Ima charinahuanpish cashpacarin ashtahuan allimari.

¹² Yachaica escudo shina huaquichijmi, cullquipish escudollatajmi. Shina cashpapish yachaica yachaj runamanca causaita cuj cashcamantaca, cullquita yallimari.

¹³ Dios rurashcata alli ricushpa yuyari. Paillataj huishtuta rurashcataca ¿pitaj allichi tucungari?

¹⁴ Alli punlla chayamujpipish, chai punllallapi cushicungui. Mana alli punlla chayamujpipish, alli yuyaringui. Caya mincha huañushpaca, ña ama imata ashtahuan ricuchunmi cushicunatapish, llaquitapish Diosllataj churarca.

¹⁵ Ñuca yanga causai punllacunapica, tucui caicunatami ricurcani: Cashcata ruraj runataca alli cashca jahua huañui japinllami. Diosta mana manchajrajmi, millaita rurashcahuan ashtahuan unita causan.

¹⁶ Chashna cashcamantaca, tucui imatapish cashcata ruraj mana ricurinachu cangui. Tucuita yachaj shinapish mana ricurinachu cangui. ¿Maitataj canllatajca tucuchiringuiyari?

¹⁷ Ama yalli millai canguichu, ch'ahuanpish ama canguichu. Manaraj huañuna punllapica, ama huañuna tucunguichu.

¹⁸ Caita chariranaca allimi. Caishujtapish cambaj maquimantaca ama cacharinguichu. Diosta manchaj runaca, tucuimanta allimi llujshinga.

¹⁹ Yachaimi yachaj runataca, chunga mandajcuna shuj pueblollata mandacujtapish yalli allita pushan.

²⁰ Cai pachapica cashcata ruraj cashpapish, manataj ima juchata rurashpa, allillata rurashpa causajca, shujllapish mana tiyanchu.

²¹ Ima parlotapish ama uyacunguillachu. Chashna mana uyajpimi, cambaj rinrinmanca cambaj runa canta c'amishcapish mana uyaringa.

²² Canpish tauca cutinmi shujtajcunata huashalla ima mana allita rimashcangui. Chaitaca canllataj yachanguimi.

Yachaj canata mashcanamanta

²³ Tucui chaicunatami alli yuyaihuan callarishpa ricurcani, ñucaca yachaj cana yuyaillami carcani. Shina cajpipish yachaica, ñucamantaca carupimi.

²⁴ Imamanta chashna tucuj cashcatataj yachanaca, carupimi yallitaj ucuman tiyacujtaca ¿pitaj pajtai tucungari?

²⁵ Chaimantami alli yachaj chayangapaj, alli ricungapaj ñuca tucui shunguta churashpataj, callarishpa alli yuyarircani. Chashna yuyarishpaca, ch'ahuan cashcamanta mana allita ruraj cashcata, yuyai chingarishca shina pandarij cashcatami ricurcani.

²⁶ Caitapishmi ricurcani: Trampa shina, urmachij linchi shina shunguta charij, c'uyaj tucushpa ugllarij huarmica huañuitapish yalli jayajmi. Diosta cushichij runaca, chashna huarmipaj maquimantaca quishpirinmi. Ashtahuanpish millaita ruraj runaca, chai huarmihuanca linchipi shina urmangallami.

²⁷ Huillaj ñucaca, tucui imatapish callarishpa, alli ricushpa yachacushpaca caitami ricurcani:

²⁸ C'aricunataca huaranga c'aricunapurapi shujllatami alli cajta japini. Ashtahuanpish huarmicunataca tucuicunamanta shujllapish alli cajtaca, mana japinichu. Mashnata mashcashpapish, manaraj japinichu.

²⁹ Caillatami ricuni: Diosca runataca allitami rurashca. Ashtahuanpish paicunallatajmi tucui laya mana allita mashcancuna.