ECLESIASTÉS 6 - Dios Rimashca Shimicunami

¹ Ñucaca cai pachapica, tucui runacunapurallapitaj cashna llaquipish tiyashcatami ricuni:

² Diosca maijanmanca achca charinacunatapish, alli nishca canatapishmi cun. Paicunapajca ima munashca mana illanchu. Shina cashpapish Diosca chai tucui charinacunamanta cushicuchunca mana saquinchu. Ashtahuanpish shujtajcunamanmi cushicuchun cun. Chaipish yangallatajmi, nanarina jatun llaquipishmi.

³ Shuj runaca patsaj churicunata charinmanchari, unitapish causanmanchari. Chashna achca huatacunata causashpapish, ashallatapish mana cushicushpa causarcachari. Huañujpipish mana pambashca cangachari. Chashna cashca cajpica, ñucaca shullushca huahuaraj chai runata yalli alli cashcatami nini.

⁴ Chai shullushca huahuaca, shuj punllallatapish mana cai pachapi causashpa rinchu. Paipaj shutillapish mana saquirinchu. Amsapi chingarishca shinami saquirin.

⁵ Intillatapish mana ricushpa, mana rijsishpa rinchu. Shina cashpapish chai huahuarajmi chai runata yalli samaringa.

⁶ Ishqui huaranga huatata causashca cashpapish, pai charishcacunamanta mana cushicushca cashpaca, chai runaca ima allitaj cangari. Ishquindijllatajmi chaillamantaj rincuna.

⁷ Cai pachapi causajcunaca micungapajllami, mana samashpa trabajancuna. Shina cashpapish, micunataca manataj aminchu.

⁸ Yachaj runaca, ch'ahuan runataca ¿imamanta yalli canchu? Yachaj nishca huajcha runaca ¿imamanta yallinchu?

⁹ Manapish japipajta charina yuyai canapaj randica, ña charishcahuan cushicunami alli. Chaipish yuyaita yanga shaicuchinallami.

¹⁰ Imapish cunan tiyajca, ñaupamantami quiquin shutihuan tiyashca. Runa ima shina cashcapish yacharinllatajmi. Runaca, paita yalli caj Dioshuanca mana shayari tucunchu.

¹¹ Yalli rimarijpica, manapish cana yangallami shimimantaca ashtahuan llujshin. Rimarishcahuanca pi mana imata japincunachu.

¹² Runacunapaj alli canataca pi mana yachanchu. Tucui imapish yangalla caj cai ashalla causaipi, ima ashtahuan alli cajtaca pi mana yachanchu. Ñucanchij huañushca q'uipaca, inti achijyachicun cai pachapi imalla tucunatapish pi mana huillaipajchu.