ECLESIASTÉS 5 - Dios Rimashca Shimicunami

Manaraj alli yuyarishpaca ama caita chaitami Diosman cusha ninguichu

¹ Diospaj huasiman rishpaca, alli yuyarishpa ringui. Ch'ahuancunaca, Diosman animalta cushpa huañuchingapajllami chaimanca rincuna. Chaillata rurashpaca, mana allita rurashcataca mana yuyarincunachu. Chashna ruranapaj randica, chaipi yachachishcata cazuna yuyaihuan ringui.

² Shimihuan cashpapish, shungullapi cashpapish: “Diospaj imata rurashatajmi” ama ninguichu. Diosca jahua pachapimi tiyacun, canca allpapimi cangui. Paimanca can imata rurai tucushcallata ari ningui.

³ Yalli yuyajpica, ima muscuipish shamunllami. Ch'ahuan runaca, imatapish yalli rimarinllami.

⁴ Imata ruranata Diosman ari nishpaca, ama uniyashpa pajtachingui. Paica mana pajtachij upa runacunataca mana ricunachinchu. Paipaj imata rurasha nishcataca pajtachinatajmi cangui.

⁵ Imata rurashami nishca jahua mana pajtachinapaj randica, imata mana shimi llujshinami ashtahuan alli.

⁶ Ama cambaj shimillahuantaj juchayuj tucunguichu. Q'uipataca, Diospajta huillajpaj ñaupajpica: “Pandarishpamari chashna rurashcani” ninguimi. Chashna rurashpaca Diostamari p'iñachingui. Pai p'iñarishpaca can rimashcallamantami, can rurashcacunataca tucui chingachinga.

⁷ Muscucuj shina imatapish yalli yuyacujllapica, yanga yuyaicunapish shamunllami. Yalli yallitapish rimachinllami. Ashtahuanpish canca Diostami manchana cangui.

Allita rurashpa causanata p'aquijcuna cashcamanta

⁸ Maijan llajtapica huajchacunata llaquichicujta, cashcata ruranapaj randica, llaquita ruracujta ricushpaca ama mancharinguichu. Shuj mandajtaca paita yalli caj mandajmi ricucun. Chai mandajcunatapish ashtahuan jatun mandajmi ricucun.

⁹ Ashtahuanpish allpapi p'ucushcaca tucuicunapajllatajmi. Jatun mandajpish, chagracunapimi yuyai causan.

¹⁰ Cullquita yalli c'uyajca, mashnata charishpapish mana cushicunchu. Charinacunata yalli c'uyajpish chaihuanca, paipaj ima allita mana japinchu. Chaipish yangallatajmi.

¹¹ Achcata charijpica, micujcunapish achcallatajmi tiyan. Charinacunayuj runaca, ñahuihuan ricushcallahuanmi saquirin.

¹² Trabajaj runaca ashallata micushpapish, huijsa pajtajta micushpapish sumajta dorminllami. Ashtahuanpish achca charinacuna tiyashpaca, mana dormijta saquinchu.

¹³ Inti achijyachicun cai pachapica, shungu p'aquirishpa llaquirina mana allitami ricuni. Charinacunata jahuanpi jahuanpi huaquichinaca, quiquinpajllataj llaquita apamunllami.

¹⁴ Ima mana allicunapi tucuchishpaca, huahuacunamanpish imata mana cushpa, chushaj maquillatami saquincuna.

¹⁵ Mamapaj huijsamanta lluchulla huacharishca shinallataj, chushajllami pambarincuna. Chushajllami shamuncuna, chashnallatajmi tigrancuna. Paicunapaj tucui trabajomantaca, imatapish mana apancunachu.

¹⁶ Cai pachamanca chushajllami shamunchij, chashnallatajmi rina tucun. Shaicuita trabajashpa causashcamantaca, imata mana surcurinchu. Chashna tucunaca, nanarina jatun llaquimari. Tucui imapish yangallami.

¹⁷ Ashtahuantajcarin tucui causaipimi llaquihuan, nanaihuan llaquirishpalla trabajashpa causanchij.

¹⁸ Ñucaca, inti t'itaipi shaicuita trabajashcahuanca ashalla causaita Dios cushcacamaca, micushpa, ubyashpa cushicunallatami alli cajta ricuni.

¹⁹ Quiquin alli trabajashcamanta cushicunaca, Diosmantami shamun. Diosmari maijanmanpish achca charinacunata cushpa, chaicunamanta cushicunatapish cushca.

²⁰ Diosllataj shungupi cushicuita cushcamantami, paipaj causaimantaca mana yalli yuyarishpa cushicushpa causanlla.