ECLESIASTÉS 4 - Dios Rimashca Shimicunami

¹ Chai q'uipaca cai pachapica, shujcunaca caishujcunata jatunta llaquichij cashcatami ricurcani. Llaquita apacujcunataca huacacujpipish, pi mana cushichij tiyanchu. Paicunata llaquichijcunallami imatapish rurai tucuncuna. Cushichijcunaca shujllapish mana tiyanchu.

² Chaita ricushpami, ña huañushcacunaraj causacujcunata yalli allipi cashcata yuyarcani.

³ Ashtahuancarin inti achijyachicun cai pachapi chashna llaqui tiyashcata manaraj ricushcamantaca, manaraj huacharishcacuna ashtahuan allipi cashcatami yuyarcani.

⁴ Shinallataj achcata trabajashpa, tucui imatapish alli rurajpica, shujtajcuna shungupi munana yuyaita japishpa p'iñaj cashcatapishmi ricurcani. Chashna tucuipi alli canapish, yuyaita yanga shaicuchinallami.

⁵ Rumi shungu runaca maqui marcashca tiyashpaca, quiquin aichallatatajmi tucuchin.

⁶ Shina cajpipish ishqui maqui jundata trabajashcapish, yuyaita shaicuchinallami. Chaipaj randica, shuj maqui jundallata trabajashpa, ashata samarinaca ashtahuan allimari.

⁷ Shinallataj inti achijyachicun cai pachapica, caipish yangallataj cashcatami ricurcani:

⁸ Maijanca paihuan apanacujtapish, huahuacunatapish, huauquillatatajpish mana charinchu. Pai charishcacunata piman saquipaj mana tiyajpipish, manataj samarinchu, mashnata charishpapish, mana chaillahuan cushicunchu. Shinallataj: “¿Piman saquingapajtaj cashna trabajacunilla? ¿Imamantataj mana samarinillapish?” nishpa mana yuyarinllapishchu. Chaipish yangallami. Ashtahuanpish llashajta aparishca causashca shinami.

Ishqui canaca imapajpish alli nishcamanta

⁹ Shujlla causanapaj randica, ishqui causanami ashtahuan alli. Ishqui cashpami trabajashpapish, alli pagota japincuna.

¹⁰ Shuj urmajpipish, caishujca jatarichinmi. Ashtahuanpish ¡aij, shujlla causaj runalla! Paitaca urmajpipish ¿pitaj jatarichingari?

¹¹ Camapi siririshpapish ishqui cashpami, ishquindijmanta cunujyancuna. Ashtahuanpish shujlla cashpaca ¿pihuantaj cunujyangari?

¹² Shujllataca pipish mishai tucunmi, ishqui cashpaca mana jahualla mishajta saquinchu. Quimsata caupushca huascacarin mana jahualla p'itirinchu.

Yuyajcunapish mana tucuicuna yachajcunalla tiyanchu

¹³ Yuyaj jatun mandaj cashpapish, rumi shungu cashpaca yuyaita cujpipish, ña mana chasquisha ninchu. Chaipaj randica, huajchalla huambra cashpapish, yachaj cashpamari ashtahuan alli.

¹⁴ Chai jatun mandajca carcelmanta llujshishpami, mandanata japirca. Huajchacunapaj huahuapishmi carca.

¹⁵ Paipaj randi mandanapi yaicuj huambrataca, llajtapi causajcunaca tucuicunami paitaca jatun mandaj cachun chasquincuna.

¹⁶ Paita chasquijcunaca, yallitaj achcacunami carca. Shina cashpapish q'uipata paicunapaj huahuacunaca, ña mana munangacunachu. Jatun mandaj canapish, yuyaita yanga shaicuchinallami.