ECLESIASTÉS 3 - Dios Rimashca Shimicunami

Tucui imapajpish Taita Diosllataj shuj punllata churashcamanta

¹ Cai pachapica, tucui imapish chashnataj tucuna chayamujpimi, imapish tucun. Imapajpish shuj punllami chayamun.

² Huacharinapajpish, huañunapajpish, tarpunapajpish, tarpushcata aisashpa shitangapajpish shuj punllami chayan.

³ Huañuchingapajpish, jambingapajpish, imata shayachingapajpish, imata urmachingapajpish punllami chayan.

⁴ Huacanapajpish, asingapajpish, llaquilla cangapajpish, bailangapajpish punllami chayan.

⁵ Rumicunata shitangapajpish, cutin pallangapajpish, ugllaringapajpish, ch'icanyaringapajpish punllami chayan.

⁶ Imata mashcangapajpish, imata chingachingapajpish, imata huaquichingapajpish, imata shitangapajpish punllami chayan.

⁷ Churanata lliquingapajpish, sirangapajpish, upalla cangapajpish, rimanacungapajpish punllami chayan.

⁸ C'uyanacungapajpish, p'iñanacungapajpish, jatun macanacuipajpish, alli tucungapajpish punllami chayan.

⁹ Cai pachapi causaj runacunaca, shaicuita imatapish rurashcamantaca, imata mana japinchu.

¹⁰ Diosca, cai pachapi causajcunataca tucui imalla ruranacunata cushpaca, cumurichingapaj chashna rurashcatami ricuni.

¹¹ Diosca, tucui imapajpish shuj punlla tiyachunmi churashca. Cai pachapi causajcunapaj yuyaipica, callarimantapacha huiñaita Diosca imalla ruracushcata yachana munaiyujtami rurashca.

¹² Ñucaca, cai pachapi causajcunapajca, paicuna imallata rurashcacunamantaca caipi cushicuna, allita rurana alli cashcatami ricuni.

¹³ Dios cushcallamantami ñucanchij imata rurashcamantaca micunchij, ubyanchij, ñucanchij imallata rurashcata ricushpapish cushicunchijmi.

¹⁴ Shinallataj caitapishmi ricurcani: Pai rurashcacunapica imata mana mirachina tiyanchu, imata anchuchinapish mana tiyanchu. Diosca paipaj ñaupajpi manchaihuan ñucanchij cumurichunmi, chashna tucuita alli rurashca.

¹⁵ Tucui imapish ñaupaman tiyashcallatajmi tiyan. Q'uipatapish, cunan mana tiyashca mushujca mana tiyangachu. Taita Diosca, ñaupaman tiyashcallatatajmi tigrachishpa mushujyachicun.

Allipaj randica millaitami rurancuna nishcamanta

¹⁶ Inti achijyachicun cai pachatapishmi ricurcani. Pipaj allita ricunapaj randica, Diosta mana manchancunachu. Cashcata ruranapaj randica, millaicunami tucuncuna.

¹⁷ Chaimantami ñuca shungupica cashna yuyarcani: “Ima munashcata rurangapajpish shuj punlla tiyanmi. Chaicunamantaca cashcata rurajcunatapish, paita mana manchajcunatapish Diosmi ricunga” yuyarcanimi.

¹⁸ Cashnatapishmi yuyarcani: “Paicunallataj chashna cashcamantachu, Diosca cai pachapi causajcunataca animalcuna shinallataj cashcata paicunallamantaj ricuchicun. Gentecuna imami tucun, animalcunapish chashnallatajmi tucun”.

¹⁹ Gentecunapish, animalcunapish chai shinallatajmi tucurincuna. Causaipaj cushca samaipish, tucuipaj chai samaillatajmi. Ima shina causashcapish yangallami. Chashna cashcamantaca gentecunaca, animalcunataca imamanta mana yalli canchu.

²⁰ Tucuillataj allpamanta rurashcami. Tucuicunallatajmi chaillamantaj tigran. Animalcuna cashpa, gentecuna cashpapish allpallatajmi tucun.

²¹ Gentecunapaj almaca, jahua pachaman rij cashcatapish ¿pitaj alli huillai tucungari? Animalcunapaj almaca, allpa ucuman rij cashcatapish, pi mana chashnataj cashcata huillai tucunchu.

²² Cai pachapi causajcunamanca, huañushca q'uipa ima tucuna cashcataca pi mana huillai tucunchu. Chashna cashcamantaca, quiquin trabajomanta alli cushicushpa causanami alli. Ñucanchijpajca caipica, chailla tiyashcatami ricuni.