ECLESIASTÉS 1 - Dios Rimashca Shimicunami

Tucui imapish yangallami nishcamanta

¹ Davidpaj churi huillajca, Jerusalenpi jatun mandajmi carca. Cai shimicunaca pai huillashca sumaj shimicunami.

² Chai huillajca cashnami nirca: Tucui imapish yangallami, ima cashpapish yangataj yangami.

³ Inti achijyachicun pachapi causajcunaca, mana samashpa imatapish rurashcahuanca ima allita mana japincunachu.

⁴ Shujcunaca huacharincuna, shujcunaca huañuncunami. Ashtahuanpish cai pachaca manataj shujtajyanchu.

⁵ Intipish llujshishpaca, cutin huashicugrinllami. Pai llujshimushcallamantaj utca muyushpa tigranllami.

⁶ Huairapish uriman huichiman muyucunllami, pai purinallatataj cutin cutin tigrashpa muyucunllami.

⁷ Tucui jatun yacucunami mama cuchaman chayan. Chashna cajpipish yacuca manataj jundanchu. Yacucunaca llujshimushca ñanllatataj tigrashpa muyucunllami.

⁸ Tucui imapish shaicuchinmi. Tucui chaicunamantaca pipish mana alli huillai tucunchu. Ñahuica ashtahuan ashtahuan ricunachicunllami. Rinrinpish ashtahuan ashtahuan uyanachicunllami.

⁹ Cai pachapica ima mana mushuj tiyanchu. Imami ñaupaman tiyarca, chaillatajmi q'uipatapish tiyanga. Imami ñaupaman rurarishca, chaillatajmi q'uipatapish ruraringa.

¹⁰ ¿Imapish: “Caitajca mushujmari” ningapaj tiyanchu imatagari? Tucui imapish ñucanchij manaraj tiyajpi, mashna huata ñaupaman ña tiyashcallatajmi.

¹¹ Ñaupaman ima tiyashcataca cungarishpami saquishcacuna. Q'uipa punllacuna ima tiyajpipish, ashtahuan q'uipata tiyaj shujtajcunaca cungaringallacunami.

Huillajca tucuita alli ricushcamanta

¹² Huillaj ñucaca, Israel llajtata jatun mandajmi carcani. Jerusalenpimi causarcani.

¹³ Ñucaca cai pachapi causajcuna imallata rurashcatami yachangapaj alli yuyaihuan tucuita callarishpa ricurcani. Cai pachapi causajcunaman Taita Dios cushca ruranacunaca, yallitaj llashaj shinami.

¹⁴ Tucui chaicunata callarishpa yachashpami, inti achijyachicun pachapi imata rurashcapish yuyaita yanga shaicuchinalla cashcata ricurcani.

¹⁵ Huishtutaca mana allichi tucuipajchu, ima illashcatapish mana tiyashcahuanca mana yupai tucuipajchu.

¹⁶ Chashna cajta ricushpami, ñucallataj cashna nirircani: “Ñucaca Jerusalenpi ñuca ñaupa causaj tucui mandajcunata yalli yachaj cashcamantaca, tucuicuna alli nishpa jatunyachishcami cani. Ñucaca achcata yachajtaj, alli yuyaiyujtajmi cani”.

¹⁷ Ñucaca yachaj canatapish, ch'ahuanyashca canatapish, manapish cana ima yangacunata munaj canamantapishmi tucui yuyaita churashpa, callarishpa yuyaita japircani. Tucui chaita yachanapish, yuyaita yanga shaicuchinalla cashcatami ricurcani.

¹⁸ Yallitaj yachaj cajpica, imapish ashtahuanmi p'iñachin. Ashtahuan yachashpa catijpica, ashtahuan llaquirinami tiyan.