DEUTERONOMIO 8 - Dios Rimashca Shimicunami

Alli allpacunatami japinguichij nishcami

¹ Cancunaman cunan ñuca yachachishpa mandashcataca pajtachina tucuichij. Cancunapaj ñaupa yayacunaman Mandaj Dios cushatajmi nishca llajtaman yaicungapaj chai llajtapi achcata mirarishpa causangapaj chashna pajtachina tucuichij.

² Mandaj Dios cancunapaj Taita Dios cai chuscu chunga huatacunata shitashca pambacunata ima shinalla pushamushcata yuyaringuichij. Chaicunataca cancunata ima shina shungu cashcata yachangapaj, cumurij shunguta rurashpa pai mandashcacunata cazuna cashcata mana cazuna cashcata ricungapajmi llaquicunata cushpa pushamurca.

³ Yaricaihuanmi llaquichirca. Q'uipataca cancunapish cancunapaj ñaupa yayacunapish mana rijsishca maná tandatami cararca. Chaitaca runaca mana tandallahuan causana cashcata, ashtahuanpish Mandaj Diospaj shimimanta llujshishca shimicunahuan causana cashcata yachachingapajmi chashna rurarca.

⁴ Chai chuscu chunga huatacunapica, cancunapaj churanacunapish mana maucayarcachu. Cancunapaj chaquicunapish mana p'unguircachu.

⁵ Shuj yaya paipaj churita llaquichij shinallataj cancunatapish Mandaj Dios cancunapaj Taita Dios cancunata llaquichij cashcata yuyarichij.

⁶ Mandaj Dios cancunapaj Taita Dios mandashcacunataca, paita manchashpa paipaj ñanpi purishpa huaquichinguichij.

⁷ Mandaj Dios cancunapaj Taita Diosca alli llajtamanmi cancunataca yaicuchinga. Pugyu yacucunayuj, pajchashpa llujshicuj yacucunayuj pugru pambacunamantapish, urcucunamantapish, callpacuj yacucunayuj llajtamanmi yaicuchinga.

⁸ Chai llajtaca trigoyuj, cebadayuj, uvayuj, higoyuj, granadayuj, olivoyuj, aceiteyuj, sacha chuspipaj mishquiyuj llajtami.

⁹ Chai llajtapica mana nijtami micunguichij, mana ima illangachu. Chai llajtapi tiyaj rumi urcumantapish fierrotami ruranguichij. Peña urcumantapish cobretami llujshichinguichij.

¹⁰ Cancunaca chaipimi huijsa jundata micunguichij. Mandaj Dios cancunapaj Taita Diostaca chai sumaj llajtata cancunaman cushcamantami alli ninguichij.

Taita Diosta ama cungarichun cunashcami

¹¹ Mandaj Dios cancunapaj Taita Diostaca amataj cungaringuichijchu. Pai mandashcacunata, pajtachinguitaj nishcacunata, chaitataj pajtachichun nishcacunata cunan ñuca yachachishpa mandashpa cushcacunata pajtachinapajmi chashna cana canguichij.

¹² Chai llajtapi cashpaca huijsa jundata micushpa alli huasicunata shayachishpa chaipi causacushpa,

¹³ cancunapaj vacacunapish, cancunapaj ovejacunapish mirarijpi, achca cullquiyuj, achca curiyuj cashpa, tucui ima charishcacunapish achca tucujpi,

¹⁴ cancunapaj shungupi jatun tucushpa, Egiptopi cancuna huatashca shina ruracujta llujshichimuj Mandaj Dios cancunapaj Taita Diosta ñataj cungaringuichijman.

¹⁵ Yallitaj jatun shitashca pambata, culebracunapish, escorpioncunapish yallitaj tiyan pambata pushamujta, yacupish mana tiyan chaquishca pambapi yacuta llujshichishpa cancunaman cujta,

¹⁶ cancunapaj ñaupa yayacuna mana rijsishca maná shuti micunata carashpa pushamuj Taita Diosta ñataj cungaringuichijman. Paimi cancunataca llaquichishpa, cancuna ima shina cashcata ricushpa q'uipa punllacunapi allicunata cungapaj pushamurca.

¹⁷ Cancunaca cancunapaj shungupica ñataj: Cai charinacunataca ñucanchij maquihuan, ñucanchij fuerzahuan trabajashpami charinchij ninguichijman.

¹⁸ Ashtahuanpish chaicunata charichunca, Mandaj Dios cancunapaj Taita Dios fuerzata cushcatami manataj cungarina canguichij. Paimi charijyaj cachun fuerzata cujca. Paica cancunapaj ñaupa yayacunaman cushatajmi nishcata pajtachingapajmi cunan punlla cancunahuan chashna ruran.

¹⁹ Mandaj Diosta cungarij canaman chayashpa chai dioscunata catishpa paicunapajta ruraj tucushpa chaicunata cungurishpaca cancuna ima llaqui tucushpa chingarinatami huillani.

²⁰ Mandaj Diosca shujtaj llajtacunataca cancunapaj ñaupajpimi tucuita chingachinga. Mandaj ñucanchij Taita Dios mandashcata mana uyajpi, paipaj rimashcata mana cazujpica chaicunata shinallatajmi cancunatapish chingachinga.