DEUTERONOMIO 7 - Dios Rimashca Shimicunami

Rurashcalla dioscunata amataj yuyaringuichijchu nishcami

¹ Mandaj Dios cancunapaj Taita Diosca cancunaman cugrin llajtaman cancunata yaicuchishpaca heteocunata, gergeseocunata, amorreocunata, cananeocunata, ferezeocunata, heveocunata, jebuseocunata cancunapaj ñaupajmanta llujshichishpa cachashpami chai achca llajtacunataca cancunaman cunga. Chai canchis llajtacunaca ashtahuan jatun llajtacunami. Cancunata yalli c'ari c'aricunami.

² Mandaj Dios cancunapaj Taita Dios chai llajtacunata cancunapaj maquipi churajpi, ña mishashpaca paicunataca tucuita chingachinguichij. Paicunahuanca ima ruranata ama ari ninacunguichijchu. Paicunataca ama llaquinguichijpishchu.

³ Paicunahuanca cancunaca ama huasi ucupura tucunguichijchu. Cancunapaj ushushicunataca paicunapaj churicunamanca ama cunguichijchu. Cancunapaj churicunapajpish paicunapaj ushushicunataca ama japinguichijchu.

⁴ Paicunaca cancunapaj churicunata ñucamanta caruyachishpa, shujtaj dioscunapajta rurajtami ruranga. Chaipica Mandaj Diosca nina sindirij shina cancunahuan p'iñarishpami, cancunataca utca chingachinga.

⁵ Ashtahuanpish chai llajtacunataca cashnami rurana canguichij: Cancunaca paicunapaj altarcunata urmachinguichij, paicunapaj rurashcalla dioscunata p'aquinguichij, Asera diosman rijchajcunatapish ñutunguichij, paicunapaj maquihuan rurashca dios nishcacunatapish tucuita ninapi rupachinguichij.

⁶ Cancunaca Mandaj Dios cancunapaj Taita Diospaj jucha illaj llajtami canguichij. Mandaj Dios cancunapaj Taita Diosmi cai pachapi tiyaj pueblocunamanta yalli ashtahuan alli pueblo cachun cancunataca agllarca.

Mandaj Diospaj jucha illaj llajtami

⁷ Cancunataca shujtaj llajtacunata yalli jatun llajta cashcamanta cancunata munashcamantaca Mandaj Diosca mana agllarcachu. Cancunaca tucui shujtaj llajtacunata yalli uchilla llajtamari canguichij.

⁸ Ashtahuanpish Mandaj Diosca cancunata c'uyashcamanta, cancunapaj ñaupa yayacunahuan ari nishcata pajtachisha nishpallami Egiptota jatun mandaj Faraonpajta huatashca shina ruracujmantaca paipaj tucuita rurai tucuj maquihuan llujshichimurca.

⁹ Mandaj Diosca Diostaj cashcata, imatapish pajtachij Dios cashcata, pai ari nishcatapish pajtachij cashcata, pai mandashcacunata c'uyashpa chaitataj pajtachijcunataca huaranga huaranga huahua huahuacunacama c'uyaj cashcatami paitaca yachana canguichij.

¹⁰ Ashtahuanpish paita p'iñajtaca paimantajmi pai japina cashcataca paipaj aichallapitaj mana uniyashpa cunga.

¹¹ Chaimanta imallata pajtachichun cunan ñuca mandashcacunataca chaitataj pajtachichun nishcata, pajtachinguitaj nishcata chaitataj pajtachinguichij.

Cazushpaca allicunata japinami

¹² Cancunaca tucui cai mandashcacunata yachachishcata uyashpa chaitataj pajtachina tucushpa pajtachijpica, Mandaj Dios cancunapaj Taita Diosca cancunapaj ñaupa yayacunahuan ari ninacushcata, llaquishami nishcataca cancunahuanmi chashnataj pajtachinga.

¹³ Cancunataca c'uyangami, alli cashca cachun ningami, achcata mirachingami. Cancunapaj ñaupa yayacunaman cushami nishca llajtapimi cancunapaj huijsapi caj huahuacunapish, cancunapaj chagrapish, granocunapish, vinopish, aceitepish, bizicunapish, cancunapaj bachujcunapish ima mana tucunga.

¹⁴ Cancunaca tucui shujtaj pueblocunamanta yalli alli nishcami canguichij. Cancunapurapica mana huachachij c'aripish, mana huachaj huarmicunapish mana tiyangachu. Mana huachaj animalcunaca mana tiyangachu.

¹⁵ Mandaj Diosca tucui ungüicunatami cancunapajmantaca anchuchinga. Egiptopi cashpa cancuna ricushca millai ungüicunataca cancunapaj jahuamanca mana cachangachu. Ashtahuanpish tucui cancunata p'iñajcunapaj jahuamanmi chai ungüicunataca cachanga.

¹⁶ Mandaj Dios cancunapaj Taita Dios cancunapaj maquipi churashca pueblocunataca tucuitami chingachina canguichij. Paicunataca ama llaquinguichijchu, paicunapaj dioscunapajtapish ama ruranguichijchu. Mana chashna rurajpica chaicunaca cancunapaj ñitcanami canga.

¹⁷ Cancunapaj shungupica: Cai llajta runacunaca ñucanchijta yalli achcacunamari. ¿Maitataj paicunataca tucuchishunri? ninguichijmi.

¹⁸ Paicunataca ama manchanguichijchu. Ashtahuanpish Mandaj Dios ñucanchij Taita Dios faraontapish, Egiptopi tucui causajcunatapish imata rurashcataca alli yuyarichij.

¹⁹ Mandaj Dios cancunapaj Taita Diosca tucuita rurai tucuj cashcahuan ricuchinacunahuan, milagrocunahuan, tucuita rurai tucuj maquihuan paipaj rigrata chutashpa llujshichimujtaca cancunapaj ñahuihuanmi ricurcanguichij. Mandaj Dios cancunapaj Taita Diosca cunan cancuna manchacun llajtacunatapish chashnallatajmi ruranga.

²⁰ Cancunamanta miticushpa maipi saquirishcacunacamami Mandaj Dios cancunapaj Taita Diosca avispacunata cachashpa tucuita tucuchinga.

²¹ Paicunataca ama manchaichijchu. Mandaj Dios cancunapaj Taita Diosca cancunapaj chaupipimi. Paica manchana jatun Taita Diosmi.

²² Mandaj Dios cancunapaj Taita Diosca chai llajta runacunataca, allimanta asha ashallami cancunapaj ñaupajmanta llujshichishpa cachanga. Sacha animalcuna jundashpa cancunata llaquichinamantami mana shuj cutin tucuicunata tucuchina canguichij.

²³ Mandaj Dios cancunapaj Taita Diosmi paicunataca cancunapaj maquipi churanga. Paicunataca tucui chingaringacamami jatunta muspachinga.

²⁴ Paicunapaj jatun mandajcunatapish, paimi cancunapaj maquipi churanga. Cai pachapi paicunapaj shuticunataca cancunami p'ichanguichij. Tucui paicunata chingachingacama cancunahuanca pi mana ch'imbapurai tucungachu.

²⁵ Paicunapaj dioscunatapish ninahuan rupachinguichij. Chai dioscunapaj jahuata churashca cullquitapish, curitapish ama munanguichijchu, cancunapaj cachun ama japinguichijchu. Mandaj Dios cancunapaj Taita Diospajca chaicunaca millananami. Chaicunaca cancunapaj ñitcanami canga.

²⁶ Millananacunataca cancunapaj huasicunamanca ama apanguichijchu. Ashtahuanpish chaicunataca millashpa p'iñashpa tucuitami chingachina canguichij. Tucuita chingachinacunata mana chingachishpaca, cancunami tucui chingachishca tucunguichij.