DEUTERONOMIO 6 - Dios Rimashca Shimicunami

Tucuimanta yalli mandashcami

¹ “Tucui caicunaca mandashcacunapish chaitataj pajtachichun nishcacunapish, pajtachinguitaj nishcacunapish Mandaj Dios cancunapaj Taita Diosca cancunaman ñuca yachachichun mandashcami. Chaicunataca cancuna japigricun llajtaman chayashpa chaitataj pajtachina tucushpa pajtachichunmi chashna yachachichun mandarca.

² Tucui chaitataj pajtachichun nishcacunata, ñuca mandashcacunata pajtachishpami Mandaj Dios cancunapaj Taita Diosta manchashpa causanguichij. Canpish cambaj huahuacunapish cambaj huahuacunapaj huahuacunapish tucui chaicunata pajtachishpami unita causanguichij ninmi” nircami.

³ Chaimanta israelcuna uyaichij. Lechepish, sacha chuspipaj mishquipish yacu llujshicuj shina tiyan llajtapi cancuna imapipish ñaupajman ringapajca tucui chaicunata pajtachina yuyailla pajtachinguichij. Chashna rurashpami Mandaj Dios cancunapaj ñaupa yayacunapaj Taita Dios nishca shinallataj yallitaj miraringuichij.

⁴ Israelcuna uyaichij. Mandaj Dios ñucanchij Taita Diosca shujlla Diosmari.

⁵ Mandaj Dios cambaj Taita Diostaca tucui shunguhuan, tucui almahuan, tucui fuerzahuan c'uyangui.

⁶ Cunan ñuca canman imalla yachachishcacunataca cambaj shungupi alli huaquichingui.

⁷ Chaicunataca cambaj huahuacunamanca punllanta cutin cutin yachachingui. Chai yachachishcacunataca huasipi cashpapish, ñanta puricushpapish, dormij siriricushpapish jataricushpapish yachachirangui.

⁸ Cai mandashcacunataca ima ricunacunata shina cambaj maquipi, cambaj frentepi huataringui.

⁹ Cambaj huasi caspicunapipish huasi pungucunapipish quillcashpa churangui.

Taita Diosta cazuchun cunashcami

¹⁰ Cancunapaj ñaupa yaya Abrahamman, Isaacman, Jacobman cusha nishca llajtaman Mandaj Dios cancunapaj Taita Dios cancunata chayachijpica, cancuna manapish shayachishca jatun alli pueblocunatami japinguichij.

¹¹ Huasicunapish cancuna mana jundachishca alli charinacunahuan jundatami japinguichij. Tanquecunatapish manapish cancuna allashpa rurashcacunatami japinguichij. Olivos yuracunatapish, uva chagratapish manapish cancuna tarpushca cashpapish mana nijtami micunguichij.

¹² Chashna cashca jahua cancunata Egiptopi huatashca shina ruracujmanta llujshichimuj Mandaj Diosta ñataj cungaringuichijman.

¹³ Mandaj Dios cambaj Taita Diosllata manchangui, paipajllata rurangui. Imatapish paipaj shutillapi pajtachishami ningui.

¹⁴ Cancunapaj llajta muyundijpi cajcunapaj dioscunataca ama catinguichijchu.

¹⁵ Mandaj Dios cancunapaj chaupipi caj Taita Diosca paipajlla cachun munaj Taita Diosmi. Ñataj paica nina sindirij shina cancunahuan p'iñarishpa cancunata cai pachamanta chingachinman.

¹⁶ Mandaj Dios cancunapaj Taita Diostaca, Masah llajtapi ima shinami pai tucui rurai tucuj cashcata ricushun nircanguichij. Chai shinaca ama ruranguichij.

¹⁷ Mandaj Dios cancunapaj Taita Dios cancunaman cushca mandashcacunataca: Ima shina causachun yachachishcata, chaitataj pajtachij cachun yachachishcata chai yuyailla tucushpa huaquichinguichij.

¹⁸ Cancunapaj ñaupa yayacunaman Mandaj Dios cushami nishca llajtaman alli chayagrinapajca, Mandaj Diospaj ñaupajpica imata mana pandashpa allitami rurana canguichij.

¹⁹ Mandaj Dios pai nishca shinallataj cancunata p'iñajcunata cancunapaj ñaupajmanta llujshichishpa cachachunmi chashna rurana canguichij.

²⁰ Caya mincha cancunapaj huahuacunaca: Mandaj Dios ñucanchij Taita Diosca ima shina causanata yachachishcacuna, chaitataj pajtachichun nishcacuna, pajtachinguitaj nishcacunaca ¿imatataj nisha ninri? nishpa cancunata tapujpica,

²¹ paicunamanca: Ñucanchijca Egiptopimari faraonpajta rurashpa causajcuna carcanchij. Mandaj Diosmari ñucanchijtaca, tucuita rurai tucuj paipaj maquihuan llujshichimurca.

²² Mandaj Diosca ñucanchij ricucunpimi Egiptopica ricuchinacunata, jatun mancharina milagrocunata rurashpa faraontapish, tucui paipaj huasipi cajcunatapish llaquichirca.

²³ Ñucanchij ñaupa yayacunaman cusha nishca llajtata ñucanchijman cungapajmi chai llajtamantaca llujshichishpa pushamurca.

²⁴ Mandaj Diosca tucui cai mandashcacunata pajtachichuntajmi mandarca. Tucui ñucanchij causaipi Mandaj Dios ñucanchij Taita Diosllata manchashpa causachun ñucanchijpaj allipaj ñucanchij causaita cuidangapaj cunan punlla ima shinami ñucanchijta cuidacun chai shinallataj cuidacungapajllami chashna causachun nirca.

²⁵ Mandaj Dios ñucanchijman cushca chai tucui mandashcacunataca pai ima shina mandashca shinataj chaitataj pajtachishpallami, Mandaj Dios ñucanchij Taita Diospaj ñaupajpica alli ricurishun ninguichij.