DEUTERONOMIO 4 - Dios Rimashca Shimicunami

Taita Diosta cazunamanta Moisés cunashcami

¹ Cunanca tucui israelcuna caita uyaichij: Chaitataj pajtachichun nishcacunata, pajtachinguitaj nishcacunataca cancuna chaitataj pajtachishpa causachunmi yachachircani. Cunanca cancunapaj ñaupa yayacunaman Mandaj Dios cushca llajtaman ña yaicushpaca chashna pajtachishpallami chaipica causanguichij.

² Ñuca mandashca shimicunataca ama mirachinguichijchu, ama anchuchinguichijchu. Chaicunataca Mandaj Dios cancunapaj Taita Dios cancunaman mandachun ñucaman cushca cashcamanta chaitataj pajtachichunmi mandani.

³ Baal-peor diosmanta Mandaj Dios imata rurajtaca cancunapaj ñahuihuantajmi ricurcanguichij. Baal-peor diosta catijcunataca tucuicunatami, Mandaj Dios cancunapaj Taita Diosca cancunapaj chaupimantaca tucuita chingachirca.

⁴ Ashtahuanpish Mandaj Dios cancunapaj Taita Diosta catijcunaca tucuicunami cunancama causacunguichij.

⁵ Riquichij, ñucaca chaitataj pajtachichun nishcacunata, pajtachinguitaj nishcacunata Mandaj Dios ñuca Taita Dios mandashca shinallatajmi cancunamanca yachachircani. Chaitaca cunan cancunapaj cachun japigrin llajtaman yaicushpa pajtachishpa causachunmi yachachircani.

⁶ Chai yachachishcacunataca huaquichishpa, chai yuyailla tucushpa pajtachinguichij. Chaicunami shujtajcunapaj ñaupajpica cancuna yachai sapa cashcata, yuyaisapa cashcata ricuchinga. Cai mandashcacunamanta yachachishcata uyashpaca: Cai runacunatajca yachaisapa, yuyai sapa jatun llajta gentecunamari ningacunami.

⁷ ¿Maijan jatun llajtacunataj paicunapaj c'uchullapi charin dioscunataca, Mandaj Dios ñucanchij Taita Diosta charishca shina mañashcata uyaj diostaca charincunari?

⁸ Chaitataj pajtachichun nishcacunata, ima shina cashcatataj ricushpa ricuchichun mandashcacunata cunan ñuca cancunaman cushca shinataca maijan shujtaj jatun llajtapish mana charinchu.

⁹ Chaimanta cancuna cancunapaj ñahuihuan imallata ricushcata tucui cancunapaj causaipi ama cungaringapaj, chaicunamanta ama anchuringapajca cancunapaj shungupi yuyaipi huaquichinguichij. Ashtahuanpish chaicunataca cancunapaj huahuacunaman, cancunapaj huahuacunapaj huahuacunamanpish yachachinguichij.

Horeb urcupi israelcunahuan Taita Dios pai quiquintaj rimashcami

¹⁰ Cancunata Mandaj Dios Horeb urcu c'uchupi cajpi, cancuna paipaj ñaupajpi cashca punllata chaipi ima nishcata yuyarichigari. Chaipica ñucataca: Tucui cai pachapi causashca punllacunacama ñucata manchanata yachachun ñucataj rimashpa yachachingapaj tucuicunata tandachi. Chaitaca paicunapaj huahuacunamanpish yachachichuncuna nircami.

¹¹ Chaipimi, cancunaca chai urcu chaquiman c'uchuyashpa shayarircanguichij. Chai urcuca chaupi jahua pachacama nina lunyashpami, yana cushni llujshishpa amsayashpa rupacurca.

¹² Mandaj Diosca chai nina rupacuj chaupimantami cancunata rimarca. Cancunaca pai rimashcata uyashpapish, pai ima shina cashcataca mana ricurcanguichijchu.

¹³ Mandaj Diosca imallata ari ninacunataca chaipimi cancunaman huillarca. Chunga mandashcacunata chai yuyailla tucushpa pajtachichunmi mandarca. Chaitaca tablajlla ishqui rumipi quillcashpami curca.

¹⁴ Cancunapaj cachun japigricun llajtaman chayashpa ima shinalla cana cashcata, imallata pajtachina cashcata chai yuyailla tucushpa pajtachichunmi cancunata yachachichun ñucatapish mandarca.

Rurashcalla dioscunata ama yuyaringuichijchu nishcami

¹⁵ Mandaj Dios nina chaupimanta cancunahuan rimai punllaca, rimashcata uyashpapish pai ima shina cashcataca mana ricurcanguichijchu. Chaimanta cancunaca alli yuyaihuan canguichij.

¹⁶ Ñataj cancunaca labrashpa rurashca imaman rijchajtapish, shujtaj imaman rijchajtapish c'ariman, huarmiman rijchajcunatapish rurashpa pandaringuichijman.

¹⁷ Cai pachapi tiyaj ima animalman rijchajtapish, jahua huairata purij ima animalman rijchajtapish,

¹⁸ pambata llucashpa purij ima animalman rijchajtapish, yacupi tiyaj maijan chalhuaman rijchajtapish pajta ruranguichijman.

¹⁹ Jahua pachata huichilla ricushpapish intita, lunata, luzerocunata, tucui ima tiyajcunatapish ñataj paicunata cungurina yuyaita japishpa paicunapajta ruranguichijman. Chaicunataca Mandaj Dios cancunapaj Taita Diosmi tucui cai pachapi causajcunapaj rurarca.

²⁰ Egiptomantaca fierrota yacuyachina hornomanta shina japishpami Mandaj Diosca cancunataca llujshichimurca. Cunan punlla ima shinami paipajlla canguichij, chai shinallataj cachunmi cancunataca llujshichimurca.

²¹ “Mandaj Diosca cancunapaj juchamanta ñucahuan p'iñarishpami, ñucataca Jordán yacutaca ña manataj ch'imbanguichu, Mandaj Dios cancunapaj Taita Dios cambaj cachun cushca alli allpamanca manataj yaicunguichu” nirca.

²² Chaimanta ñucaca cai llajtapimi huañugrini. Jordán yacutaca mana ch'imbagrinichu. Ashtahuanpish cancunaca ch'imbanguichijmi, chai alli allpatapish cancunapaj cachun japinguichijmi.

²³ Mandaj Dios cancunapaj Taita Dioshuan cancunahuan imallata ari ninacushcataca amataj cungaringuichijchu. Labrashpa imaman rijchajcunata Mandaj Dios cancunapaj Taita Dios amataj ruranguichij nishcataca ñataj ruranguichijman.

²⁴ Mandaj Dios cancunapaj Taita Diosca rupachishpa tucuchij ninami. Paipajlla cachun munaj Taita Diosmi.

²⁵ Cancuna ña chai llajtapi cashpaca huahuacunayuj, nietocunayuj, yuyajcuna tucushpaca ñataj maquihuan rurashca dios nishcacunata, imamanpish rijchajcunata rurashpa millaita ruranguichijman. Millaita rurashpaca Mandaj Dios cancunapaj Taita Diospaj ñahuipica paita p'iñachishpa millaita rurashcami canga.

²⁶ Cancuna chashna rurajpi ima tucuna cashcataca jahua pachapish, cai pachapish ricucunpimi cashna nini: Jordán yacuta ch'imbashpa cancunapaj cachun japishca allpamantaca utcami chingaringuichij. Cancuna mana cazushcamantami chai llajtapica mana uni punllacunata causanguichij.

²⁷ Mandaj Diosllataj cancunataca shujtaj llajtacunaman urata janajta cachajpimi urata janajta rishpaca chaicunapica ashacunalla saquiringuichij.

²⁸ Chai llajtacunapimi cancunaca caspimanta, rumimanta runacuna rurashca mana ricuj, mana uyaj, mana micuj, mana mutquij dioscunapajta ruranguichij.

²⁹ Chai llajtacunapi cashpapish cancunata Mandaj Diosta tucui shunguhuan, tucui yuyaihuan mashcashpaca japinguichijmi.

³⁰ Chai llaquicuna japijpi, chai llaquicunahuan cai punllacunami Mandaj Dios cancunapaj Taita Diosman cutirishpa pai rimashcata uyanguichij.

³¹ Mandaj Dios cancunapaj Taita Diosca llaquij Taita Diosmi. Paica mana saquingachu, mana chingachingachu. Cancunapaj ñaupa yayacunahuan ari ninacushcatapish manataj cungaringachu.

³² Ñaupa cancuna manaraj tiyajpi Dios runata rurashpa cai pachapi churashca pachamanta cai pacha shuj ladomanta caishuj ladocama maipi chashna rurashcata, chashna tucushcata pi uyashcachu imamí chaita tapui.

³³ ¿Shujtaj llajtapi causajcunaca nina rupacuj chaupimanta Taita Dios rimashcata cancuna shina uyashpapish mana huañujcuna tiyanchu?

³⁴ Maijan diostaj shuj llajtapaj chaupimanta shuj llajtata paipajlla cachun llaquicunahuan, ricuchinacunahuan, milagrocunahuan, jatun macanacuicunahuan paipaj tucuita rurai tucuj maquihuan, paipaj rigra chutashcahuan mancharinacunata rurashcahuan llujshichinata yuyarishcari. Mandaj Dios cancunapaj Taita Diosmi Egiptomantaca cancunapaj ñaupajpi tucui chaicunata rurashpa cancunataca llujshichimurca.

³⁵ Mandaj Diosca Diostaj cashcata, pi shujtaj pai shinaca mana tiyashcata yachachunmi tucui chaicunataca canpi ricuchirca.

³⁶ Taita Diosca cancunata yachachingapajmi jahua pachamanta pai rimashcata uyachirca. Cai pachapica paipaj jatun ninatami ricuchirca. Nina chaupimanta rimashcatami uyarcanguichij.

³⁷ Paica cancunapaj ñaupa yayacunata c'uyashcamantami paicunapaj q'uipa huahua huahuacunataca agllarca. Paimi Egiptomantaca, pai quiquintaj tucuita rurai tucuj cashcahuan llujshichimurca.

³⁸ Cancunapaj ñaupajmanta jatun llajtacunata, cancunata yalli c'ari c'aricunata llujshichishpa cachashpa cancunapaj cachun cushca allpaman cancunata pushangapajmi chashna rurarca. Ñami cunanca chashna tucucun.

³⁹ “Cunanca chaita alli yachashpa cancunapaj shungupi alli yuyaringuichij. Jahua pachapipish, cai pachapipish Taita Diosca Mandaj Dios cashcata yuyaringuichij. Pi shujtajca mana tiyanchu.

⁴⁰ Pai chaitataj pajtachichun nishcacunata, pai mandashcacunataca cancuna pajtachichuntajmi mandashpa cuni. Chaimanta huiñaicama Mandaj Dios cancunapaj Taita Dios cancunaman cushca llajtapi cashpa canpish cambaj huahua huahuacunapish alli cangapaj, uni huatacunata chai llajtapi causangapajmi chai mandashcacunataca pajtachina canguichij” nircami.

Jordán yacumanta inti llujshin ladoman miticuna pueblocunata rurashcami

⁴¹ Chaipimi Moisesca, Jordán yacumanta inti llujshin ladoman caj llajtacunapica quimsa pueblocunata ch'icanchirca.

⁴² Mana huañuchina yuyaihuan cashpapish maijanta huañuchishpa miticunapajmi ch'icanchirca. Ñaupamanca imapi nunca mana p'iñanacushca cashca cashpapish cungaillapi huañuchishca cashpaca chai pueblocunapi miticushpami paicunapaj causaita quishpichina carca.

⁴³ Chai pueblocunaca caicunami: Shitashca pambapi caj pugru pambapica Beser pueblotami rubenitacunapaj ch'icanchirca. Galaadpi caj Ramot pueblotaca gaditacunapajmi ch'icanchirca. Basanpi caj Golán pueblotaca manasescunapajmi ch'icanchirca.

Taita Dios mandashcacunata Moisés cutin yuyachishcami

⁴⁴ Cai mandashcatami Moisesca israelcunaman yachachirca.

⁴⁵ Egiptomanta israelcuna ña llujshimujpi ima shina causanata, chaitataj pajtachichun nishcacunata, pajtachinguitaj nishcacunata Moisés paicunaman yachachishcaca tucui caicunami.

⁴⁶ Moisesca Jordán yacumantaca, inti llujshin ladopi caj Bet-peor pueblo ch'imbanij pugru pambapi cashpami caitaca yachachirca. Chai puebloca Hesbonpi causaj amorreocunata jatun mandaj Sehonpaj llajtapimi carca. Paitami Moisesca israelcunahuan Egiptomanta llujshichimucushpa macanacushpa misharca.

⁴⁷ Israelcunaca jatun mandaj Sehonpaj llajtatapish, Basanta jatun mandaj Ogpaj llajtatapishmi japircacuna. Jordán yacumanta inti llujshin ladoman caj amorreocunata ishqui jatun mandajcunapaj llajtacunami carca.

⁴⁸ Chai llajtacunaca Arnón yacu huaicu c'uchupi caj Aroer llajtamantaca Hermón nishca Sión urcucamami carca.

⁴⁹ Jordán yacumanta inti llujshin ladoman caj tucui Arabá llajtandij, Pisga urcu chaquipi caj Arabá cuchacamami carca.