DEUTERONOMIO 34 - Dios Rimashca Shimicunami

Moisés huañujpi pambashcami

¹ Moisesca Moab llajtapi caj shitashca pambamantaca, Pisga urcuman rishpami Nebo urcu jahuaman huichiyarca. Chai urcuca Jericó ch'imbapurapimi. Chaimantami Mandaj Diosca paimanca, tucui Galaad llajtata Danpaj llajtacama ricuchirca.

² Neftalipaj, Efrainpaj, Manasespaj Judapaj tucui llajtacunatami, inti huashicun ladopi caj mama cuchacama ricuchirca.

³ Neguev shitashca pambatapish, Jericó pueblo muyundij pugru pambacunatapish, palmera yuracuna tiyan pueblotapish Zoar pueblocamami ricuchirca.

⁴ Mandaj Diosca Moisestaca: “Abrahamman, Isaacman, Jacobmanca: Cai llajtatami cambaj huahua huahuacunamanca cusha” nircani. Chai llajtaman yaicuchun mana saquishpapish cambaj quiquin ñahuihuan ricuchunmi saquini nircami.

⁵ Chai Moab llajtapimi Mandaj Diospajta ruraj Moisesca, Mandaj Dios nishca shinallataj huañurca.

⁶ Paitaca Moab llajtallapitajmi, Bet-peor pueblo ch'imbapurapi caj pugru pambapi pambarca. Paita maipi pambashcataca cunancama pi mana yachancunachu.

⁷ Moisesca 120 huatacunata charishpami huañurca. Huañuna punllacama paipaj ñahuicunaca allimi ricurca. Paica chairaj sinchi runami carca.

⁸ Israelcunaca Moisés huañujpica, quimsa chunga punllacunatami Moab shitashca pambapi huacarcacuna. Chashnami Moisés huañushcamanta huacashpa llaquirina punllacunataca pajtachircacuna.

⁹ Nunpaj churi Josueca, paipaj uma jahuapi Moisés paipaj maquita churashcamantami Diospaj espirituhuanpish, alli yachaihuanpish junda carca. Tucui israelcunaca, Mandaj Dios Moisesta mandashca shinallatajmi Josueta cazurcacuna.

¹⁰ Chaimanta pachami Mandaj Dioshuan Moisés shina ñahui ñahui rimaj profetaca israelpurapica nunca mana tiyan.

¹¹ Tucui señalcunata, jatun mancharinacunata Egiptopi rurachun Mandaj Dios cachajpi Moisés rurashca shinaca pi mana rurashcachu. Chaicunataca faraonpaj ñaupajpi, tucui paipajta rurajcunapaj ñaupajpi, tucui paicunapaj llajtapimi chashna rurarca.

¹² Moisesca pipish mana ruraipajta, jatun mancharinacunatami tucui israelcuna ricucunpi rurarca.