DEUTERONOMIO 29 - Dios Rimashca Shimicunami

Mandaj Diosca Moabpi israelcunahuan ari ninacushcami

¹ Tucui cai shimicunaca Mandaj Dios Moisesta israelcuna imallata ruranata cutinllataj Moab llajtapi ari nichishcami. Ñaupaman Horeb urcupi ari nichishca jahuapishmi chaipipish ari nichirca.

² Moisesca tucui israelcunata cayashpami cashna nirca: “Mandaj Diosca Egiptopi faraontapish, tucui paipajta rurajcunatapish, paipaj tucui llajtatapish cancunapaj ñaupajpi imallata rurashcataca cancunallataj ricurcanguichijmi.

³ Jatun ricuchinacunata, señalcunata, jatun mancharinacunata rurashpa llaquichijtaca cancunapaj ñahuihuantajmi ricurcanguichij.

⁴ Chaipi pai imapaj chai tucuita rurashcacunata cancuna entendichun cunancama Mandaj Diosca cancunapaj yuyaitaca manaraj pascashcachu. Chaimantami uyashpapish mana entendinguichij, ricushpapish mana ricushca shina tucunguichij.

⁵ Ñucami cancunataca chuscu chunga huatacunata shitashca pambata pushamurcani. Chai huatacunapica cancunapaj churanacunapish, mana tucurircachu. Cancunapaj pargatecunapish mana tucurircachu.

⁶ Tandatapish mana micurcanguichijchu, vinotapish, sidratapish mana ubyarcanguichijchu. Chaitaca Mandaj Dios cancunapaj Taita Diosca ñucallataj cashcata yachachunmi chashna pushamurcani.

⁷ Cai llajtaman ña chayamujpica, Hesbonta jatun mandaj Sehonpish, Basanta jatun mandaj Ogpishmi ñucanchijhuan macanacunaman llujshircacuna. Ashtahuanpish ñucanchijmi paicunataca misharcanchij.

⁸ Chai llajtacunata japishpaca Rubenpaj, Gadpaj aillucunaman, Manasespaj chaupi aillumanmi paicunapaj cachun curcanchij.

⁹ Cunan cancuna ari nishcataca chai yuyailla tucushpa pajtachinguichij. Tucui imata rurashcapipish ñaupajman ringapajmi chashna rurana canguichij.

¹⁰ Cunanca tucui cancunami Mandaj Dios cancunapaj Taita Diospaj ñaupajpi canguichij. Cancunapaj ailluta mandajcunapish, cancunata cunaj yuyajcunapish, ayudashpa mandajcunapish tucui Israel c'aricunapish,

¹¹ cancunapaj huahuacunapish, cancunapaj huarmicunapish, shujtaj llajtamanta shamushpa cancunapaj carpa huasicuna chaupipi causajcunapish, yantajcunamanta callarishpaca yacuta ashtajcunacamami caipi canguichij.

¹² Mandaj Dios cancunapaj Taita Dioshuan ari nishcapi pajtachingapaj yaicungapajmi caipi canguichij.

¹³ Cancunapaj ñaupa yaya Abrahamman, Isaacman, Jacobman pajtachishatajmi nishcataca cunanmi cancunaca paipajlla agllashcacuna cashcata, paipish cancunapaj Taita Dios cashcata ricuchin.

¹⁴ Cai ari ninacushcataca, chashna rurashatajmi nishcataca mana cancunallahuan ruranichu.

¹⁵ Ashtahuanpish Mandaj Dios ñucanchij Taita Diospaj ñaupajpi cunan ñucanchijhuan caipi cajcunahuanpish, cunan mana ñucanchijhuan caipi cajcunapajpishmi ari ninacunchij.

¹⁶ Egiptopi ima shina causashcatapish, chai llajtamanta llujshimushpa shujtaj llajtacunata pasamucushpa imalla tucushcacunatapish, cancunallataj allimi yachanguichij.

¹⁷ Paicunaca caspimanta, rumimanta, cullquimanta, curimanta rurashca dioscunata adorashpa, millananacunata ruraj cashcatapish ricurcanguichijmi.

¹⁸ Cancunapurapica maijan c'ari cashpa, huarmi cashpa, maijan familia cashpa, maijan aillu cashpapish cunan cai Mandaj Dios ñucanchij Taita Diosmanta anchurishpa, chai llajtacunapaj dioscunapaj ruranacunata rurajcuna ñataj tucunguichijman. Chaita rurashpaca cancunaca hiel shina, ajenjo shina jayaj sapiyuj yura shinami tucunguichij.

¹⁹ Chai tucui shimicunata uyashpa mana cazujca llaqui tucungami nishca shimicunata uyashpa ñucaca cazushami nishpa ari nishca jahua paipaj shungupica: 'Mana cazushpa ñuca ima munashcata rurashpapish sumajtami causasha yuyashpa mana allita rurajpica tucui llaquicuna paipaj jahuami shamunga.

²⁰ Chashna ruraj runataca, Mandaj Diosca mana perdonana tucushpa manataj perdonangachu. Ashtahuanpish paihuanca nina lunyacuj shina yallitajmi p'iñaringa. Chaimanta cai libropi tiyaj tucui llaquicunaca paipaj jahuapimi urmanga. Mandaj Diosca chai runapaj shutitaca cai pachamanta anchuchingami.

²¹ Mandaj Diosca chai runataca, jatun llaquipajmi tucui Israel aillucunamanta ch'icanchinga. Cai ari ninacushca mandashca libropi nishca shinallataj, llaquicunahuanmi llaquichinga.

²² Cancunapaj huahua huahuacunapish paicunapaj q'uipa huahua huahuacunapish, shujtaj caru llajtacunamanta shamuj shujtaj runacunapish Israel llajtapica jatun llaquicunahuan, ungüicunahuan Mandaj Dios llaquichicujta ricushpami cashna ningacuna:

²³ Tucui cai llajtaca azufrehuan cachihuan rupachishca llajtami. Chaimanta imata mana tarpuipajmi, ima mana p'ucuipajmi, cai allpapica ima q'uihuapish mana huiñaipajmi. Sodomata, Gomorrata, Admata, Zeboimta tucuchij shinallatajmi, Mandaj Diosca nina sindirij shina yallitaj p'iñarishpa cai llajtatapish llaquichishca” ningacunami.

²⁴ Shujtaj llajtacunapish: “¿Mandaj Diosca ima nishpashi chai llajtataca chashna rurarca? Mandaj Dios chai llajtahuan nina sindirij shina yallitaj p'iñarishcaca ¿imatashi nisha nin?” nishpami tapungacuna.

²⁵ Chaita cutichijca: 'Mandaj Dios paicunapaj ñaupa yayacunapaj Taita Diosmi Egiptomanta paicunata llujshichimucushpaca pai munashca shina causachun ari nichishca carca. Paicunallataj chaita p'aquishpa,

²⁶ shujtaj dioscunapaj ruranacunata rurajcuna tucushpa paicunaman imatapish mana cuj, paicuna mana rijsishca dioscunapaj ñaupajpi cungurircacuna.

²⁷ Chaimi Mandaj Diosca cai llajtapi causajcunahuanca nina sindirij shina yallitaj p'iñarishpa chai libropi quillcashca tiyacuj tucui llaquicunata paicunapaj jahuaman cachana tucushca.

²⁸ Chaimi yallitaj p'iñarishpa manataj ricunachishpa, Mandaj Diosca pai cushca llajtamantaca sapimanta aisaj shina llujshichishpa shujtaj llajtacunaman cacharca. Chaimantami paicunaca cunan cancuna ricucushca shina tucushcacuna' ningacunami.

²⁹ Imatapish Mandaj Dios ñucanchij Taita Dioslla yachana cashcataca paillami yachan. Tucui imallatami runacuna yachana can chaitaca tucuitami ricuchishca. Chaicunaca ñucanchijpish, ñucanchij huahua huahuacunapish pajtachicuchunlla tucui cai mandashcacunami.