DEUTERONOMIO 28 - Dios Rimashca Shimicunami

Cazujcunaca allicunata japinami

¹ Cunan ñuca cancunaman quillcashpa mandashcacunata chai yuyailla tucushpa pajtachingapaj Mandaj Dios cancunapaj Taita Dios rimashcata alli uyajpica, Mandaj Dios cancunapaj Taita Diosca cancunataca tucui cai pacha llajtacunapaj jahuapimi jatun canapi churanga.

² Mandaj Dios cancunapaj Taita Dios imalla nishcata cancuna uyashpa cazujpica, tucui cai allicunami cancunapajman jahuanpi jahuanpi shamushpa catinga.

³ Pueblopi cashpapish, chagrapi cashpapish alli nishcacunami canguichij.

⁴ Cancunapaj huijsamanta llujshishca huahuacunapish, cancunapaj allpapi p'ucushca granocunapish, cancunapaj animalcunapaj huahuacunapish, cancunapaj huagracunapaj huahuacunapish oveja canllapish tucui alli nishcacunami canga.

⁵ Cancunapaj grano canastapish, tandata ruranapaj masana bateapish alli nishca cachun.

⁶ Cancunapaj llujshinapipish cancunapaj yaicunapipish allimi canguichij.

⁷ Cancunata p'iñashpa jatarijcunatapish Mandaj Diosmi mishanga. Cancunahuan macanacungapajca shuj ñanllatami llujshingacuna. Canchis ñancunatami cancunamantaca miticushpa callpangacuna.

⁸ Cancunapaj granocunata huaquichinacunata, cancunapaj maquihuan tucui imallata ruracuncunatami Mandaj Dios cancunapaj Taita Diosca alli cachun ninga. Mandaj Dios cancunapaj Taita Dios cancunaman cushca llajtatapish alli cashca cachun ningami.

⁹ Mandaj Dios cancunapaj Taita Dios mandashcacunata pajtachishpa, paipaj ñanllapi catijpica, Mandaj Diosca pai nishca shinallatajmi jucha illaj paipajlla sinchicuna cachun churanga.

¹⁰ Chashna cajpimi shujtaj llajtacunapi causajcunaca Mandaj Diospaj shuti cancunapaj jahuapi cashcata ricushpa cancunataca manchangacuna.

¹¹ Cunan cancunaman cugrin llajtata cancunapaj ñaupa yayacunaman Mandaj Dios cushatajmi nishca llajtapi ña cancuna cajpica Mandaj Diosca achca charinacunayujta, achca huahuacunayujta, achca animalcunayujtami ruranga. Cancunapaj chagracunapipish jahuanpi jahuanpimi yallitaj p'ucuchinga.

¹² Mandaj Diosca tamyata huaquichishca jahua pachata pascashpami, cancunapaj allpacunapica tamyana punllacunapitaj tamyachishpa cancunapaj maquihuan tucui imalla rurashcacunapica allicunata cunga. Cancunaca achca shujtaj llajtacunaman mañachingapajmi charinguichij. Ashtahuanpish cancunaca pita mana mañanguichijchu.

¹³ Mandaj Diosca cancunataca uma cachunmi churanga, chupa cachunca manataj churangachu. Paica cancunataca punta cachunmi churanga, huashaman cachunca nunca manataj churangachu. Mandaj Dios cancunapaj Taita Dios mandashcata cazuchun cunan ñuca mandashcacunata cazushpa, chaipi imalla nicushcacunata pajtachishpa causajpimi chashna ruranga.

¹⁴ Chaimanta shujtaj dioscunata catishpa, shujtaj dioscunapaj ruranacunata rurangapaj ñataj cunan ñuca cancunata mandashcacunamantaca alli ladomanpish lluqui ladomanpish anchuringuichijman.

Mana cazushpaca llaquita apanami

¹⁵ Mandaj Dios cancunapaj Taita Dios imalla nishcacunata mana uyashpa, tucui pai mandashcacunatapish, pai chaitataj pajtachichun nishcacunatapish, cunan ñuca cancunata mandashcacunatapish mana chai yuyailla tucushpa pajtachijpica, cancunapaj jahuamanca jahuanpi jahuanpimi tucui cai llaquicuna shamunga:

¹⁶ Pueblopi cashpapish, chagrapi cashpapish mana alli nishcacunami canguichij.

¹⁷ Cancunapaj grano canastapish, tandata ruranapaj masana bateapish mana alli nishcami canga.

¹⁸ Cancunapaj huijsamanta llujshishca huahuacunapish, cancunapaj allpapi p'ucushca granocunapish, cancunapaj huagracunapaj huahuacunapish, cancunapaj oveja canllapish tucui mana alli nishcacunami canga.

¹⁹ Cancunapaj llujshinapipish cancunapaj yaicunapipish manataj alli canguichijchu.

²⁰ Tucui can imata ruranapipish ima mana alli llujshinatami cachanga. Jatun llaquicunahuan aij ninatami cachanga. Tucui chaicunataca mandashcata mana cazushpa paimanta anchurishpa mana alli ruranacunallata rurashcamanta cancunata utca tucuchingapajmi chashna cachanga.

²¹ Cancunapaj cachun cancuna japigricun llajtamanta tucui chingachingacamami, Mandaj Diosca cancunapaj jahuamanca huañuchij ungüita cachanga.

²² Mandaj Diosca mana jambipaj ungüita, fiebreta, chuputa, rupari ungüitami cachanga. Shinallataj mana tamyachishpa cungaimanta llaquicunata cachashpa, granocunata chaquichishpami cancunata chingachingacama llaquichinga.

²³ Jahua pachapish bronce shinami canga. Cancunapaj chaqui sarucun allpapish fierro shinami canga.

²⁴ Mandaj Diosca cancunapaj allpamanca tamyapaj randica ñutu allpata, ushpatami cachanga. Cancuna tucuringacamami jahua pachamanta chashna llaquichinga.

²⁵ Cancunata p'iñajcunapaj maquipimi Mandaj Diosca paicuna mishachun cancunataca churanga. Paicunahuan macanacungapaj shuj ñanllata llujshishpapish, canchis ñancunatami paicunata miticushpa callpanguichij. Cancunaca tucui cai pachapi causajcuna mancharinami tucunguichij.

²⁶ Cancunapaj huañushca aichacunaca tucui angacuna, sacha animalcuna micunapajmi canga. Chaicunata manchachishpa catijca pi mana tiyangachu.

²⁷ Mandaj Diosca egipciocunata llaquichishca mana jambiri tucuipaj úlcera ungüihuan, chupu ungüihuan, caracha ungüihuan, shijshi ungüihuanmi cancunataca llaquichinga.

²⁸ Mandaj Diosca uma ungushcatapish, ñahui mana ricujtapish, musparijcunatapish rurashpami cancunataca llaquichinga.

²⁹ Ñahui mana ricuj tantiacuj shinami chaupi punllapi amsapi shina tantianguichij. Cancuna imata rurashcapish mana alli llujshingachu. Ashtahuanpish tucui punllacuna shujtajcuna llaquichishca, shuhuashcallami canguichij. Cancunata quishpichijca pi mana tiyangachu.

³⁰ Cazarangapaj ari ninacushca cajpipish, shujtaj c'arimi chai huarmihuanca dorminga. Huasita shayachishpapish chai huasipica mana causanguichijchu. Uvata tarpushpapish chai uvataca mana cancunachu micushpa cushicunguichij.

³¹ Cancunapaj huagracunataca cancunapaj ñaupajpimi huañuchingacuna. Cancunaca mana micunguichijchu. Cancunapaj burrocunataca cancunapaj ñaupajmantami apashpa ringacuna. Manataj tigrachingacunachu. Ovejacunapish cancunata p'iñajcunapajmi tucunga. Chaitaca pi mana ayudashpa tigrachichingachu.

³² Cancunapaj churicunata, cancunapaj ushushicunataca cancuna ricucujpimi shujtaj llajta gentecunaman cunga. Paicunata punllanta ricunaihuan cashpapish ñahuirajmi amsayanguichij. Imata mana rurai tucunguichijchu.

³³ Cancunapaj allpapi p'ucushcacunatapish, ima shujtajcunata cancuna trabajashcacunatapish cancuna mana rijsishcacunami micungacuna. Ashtahuanpish cancunaca punllanta p'iñashca llaquichishcallami canguichij.

³⁴ Chai tucuita cancuna ricushpaca locomi tucunguichij.

³⁵ Mandaj Diosca cancunataca chaqui puntamanta umacamami sanpicunapipish changacunapipish millai caracha ungüihuan chugrichinga. Chaicunaca pi mana jambi tucuipajmi canga.

³⁶ Mandaj Diosca cancunapish cancunapaj ñaupa yayacunapish mana rijsishca llajtamanmi cancunatapish cancunata mandaj cachun cancunapaj jahuapi churashca mandajtapish apanga. Chai llajtapimi cancunaca caspimanta, rumimanta rurashca dioscunapaj ruranacunata ruranguichij.

³⁷ Mandaj Dios cancunata apashca llajtacunapica cancunaca mancharishpa yuyanami tucunguichij, yuyachij shimicunahuan parlana, chanzata rurashpa asinami tucunguichij.

³⁸ Achca muyucunata llujshichishpa allpapi tarpushpapish, langostacuna micushcamanta ashallatami japinguichij.

³⁹ Uvatapish tarpunguichijmi, allichinatapish allichinguichijmi ashtahuanpish c'urucuna micushcamanta mana pallanguichijchu, vinotapish mana ubyanguichijchu. Chaitaca c'urucunallami micunga.

⁴⁰ Tucui cancunapaj allpacunapimi olivos yuracunata charinguichij. Ashtahuanpish olivos grano tucui urmajpimi cancuna llihuiringapajca ima aceiteta mana charinguichij.

⁴¹ Churicunata, ushushicunata charinguichijmi. Tucuicunata prezu apajpi paicunaca mana cancunapaj cangachu.

⁴² Tucui yuracunatapish, cancunapaj allpacunapi p'ucushcacunatapish langostacunallami tucui micungacuna.

⁴³ Shujtaj llajtamanta caj cancunapaj llajtapi causajcunarajmi ashtahuan ashtahuan charijyashpa catingacuna. Cancunaca ashtahuan ashtahuan urmarishpami catinguichij.

⁴⁴ Paicunaca cancunaman mañachijcunami cangacuna. Ashtahuanpish cancunaca paicunamanca imata mana mañachi tucunguichijchu. Paicunami cancunapaj uma canga cancunaca chupallami canguichij.

⁴⁵ Caipi nishca tucui llaquicuna jahuanpi jahuanpi cancunapaj jahuaman shamushpami tucui tucuringacama chingachinga. Mandaj Dios cancunapaj Taita Dios mandashcacunata, chaitataj pajtachichun nishpa pai mandashcacunata mana uyashcamantami chashna chingachinga.

⁴⁶ Chai llaquicunaca cancunapish, cancunapaj huahua huahuacunapish shujtajcuna ricushpa yuyaricunalla ricunacunami canga.

⁴⁷ Cancunaca imata yallijta charij cai punllacuna Mandaj Dios cancunapaj Taita Diospajllata tucui shunguhuan cushicushpa mana rurashcamantami chashna tucunguichij.

⁴⁸ Ashtahuanpish cancunata p'iñajcunata, Mandaj Dios cancunapajman cachajpimi cancunaca yaricaihuan, yacunaihuan, churana illajlla, tucui imapish illajlla paicunapajta ruranguichij. Mandaj Diosca, cancunapaj cungapi shuj fierro yugota churashpami chingachingacama cancunataca llaquichinga.

⁴⁹ Mandaj Diosca cancunata llaquichichunca, cai pacha tucuri caru llajtamanta cancuna mana entendipaj rimaita rimaj shujtaj gentecunatami apamunga. Paicunaca águila shinami utca callpangacuna.

⁵⁰ Chai runacunaca yuyajcunatapish, huahuacunatapish mana llaquishpami causaita quichunga. Manchanana ñahui runacunami canga.

⁵¹ Chaicunaca cancunapaj animalcuna mirashcatapish, cancunapaj allpapi p'ucushcacunatapish cancuna tucui chingaringacamami micungacuna. Cancunapajca trigotapish, llullu vinotapish, aceitetapish, cancunapaj huagracunapaj, ovejacunapaj huahuacunatapish imata mana saquishpami tucui chingachingacuna.

⁵² Paicunami cancunapaj tucui pueblocunataca muyunchinga. Cancuna shunguta churana jatun pircacunatapishmi urmachingacuna. Mandaj Dios cancunapaj Taita Dios cancunaman cushca tucui pueblocunatami tucui llajtacunapi muyunchingacuna.

⁵³ Cancunata p'iñajcuna cancunapaj pueblocunata muyunchishpa shayacujpi llaquipi cashpaca, Mandaj Dios cancunapaj Taita Dios cushca cancunapaj aichamanta llujshishca churicuna ushushicunatami micunguichij.

⁵⁴ Cancunapurapi caj mana p'iñarij c'uyaj runapish paipaj quiquin huauquita, yallitaj c'uyashca huarmita, caishuj huahuacunatapish p'iña ñahuihuanmi ricunga.

⁵⁵ Paicunapaj huahua aichata micucushcata mana carangapajmi chashna ricunga. Paicunata p'iñajcuna tucui pueblocunata muyunchishca cajpi micuna mana tiyajpimi chashna canga.

⁵⁶ Cancunapurapica mana p'iñarij alli nishca nunca mana allpapi lluchu chaquilla saruj huarmipish yallitaj c'uyaj cusatapish, paipaj churitapish, paipaj ushushitapish p'iña ñahuihuanmi ricunga.

⁵⁷ Cancunata p'iñajcuna cancunapaj tucui pueblocunata muyunchishca cai punllacunapi micungapaj ima mana tiyashcamantami chai huarmica paipaj huachashca huahuatapish, paipaj madretapish micungapaj pacashpa churanga.

⁵⁸ Cancunata Mandaj Diospaj sumaj manchana shutita manchashcamanta cai libropi quillcashca cai mandashca shimicunata pajtachina yuyailla tucushpa mana pajtachijpica,

⁵⁹ Mandaj Diosca cancunapajpish jatun llaquicunata, cancunapaj huahua huahuacunapajpish jatun llaquicunata yallitaj mana tucurij jatun llaquicunata, mana jambi tucuipaj ungüicunatami cachanga.

⁶⁰ Egiptopi llaquichij llaquillatatajmi cancunapaj jahuamanpish apamunga. Yallitaj llaquichishpami samaita aisachunllapish mana saquinga.

⁶¹ Cai mandashca libropi mana quillcashca tiyacuj jatunta llaquichij ungüicunatapishmi Mandaj Diosca tucui cancunata chingachingacama cancunapaj jahuaman cachanga.

⁶² Mandaj Dios cancunapaj Taita Dios rimashcacunata mana cazushcamantami cancunaca, jahua pachapi tiyaj luzerocuna shina yallitaj achcacuna cana cashca cashpapish ashacunalla saquiringuichij.

⁶³ Mandaj Diosca allicunata rurashpa, cancunata achcata mirachishpa cushicuj cashca shinallatajmi, cancunata jatunta llaquichishpa tucuchishpapish cushicunga. Cancuna japigricun llajtamantaca sapimanta aisashpa shitaj shinami anchuchinga.

⁶⁴ Mandaj Diosllatajmi cancunataca tucui cai pacha tucuri llajtacunacama caita chaita cachanga. Chai llajtacunapimi cancunapish, cancunapaj ñaupa yayacunapish mana rijsishca, caspi diospaj, rumi diospaj ruranacunata rurashpa causanguichij.

⁶⁵ Chai llajtacunapi causacushpaca mana samari tucunguichijchu, cancunapaj chaquillatapish mana samachi tucunguichijchu. Chaipica Mandaj Diosca cancunamanca manchacuj shungu canata, llaquijlla ñahui canata, llaquijlla alma canatami cunga.

⁶⁶ Cancunapaj causaica, p'itirinalla puchcahuan imata huarcushca shina cayapish, cunanpish huañuna manchaillami canguichij.

⁶⁷ Chai tucui llaquicunata ricucushpa shungu llaquilla cashpaca tutamantapish utca chishiyanman yuyanguichijmi, chishipish utca pacarinman yuyanguichijmi

⁶⁸ Mandaj Diosca: Cai ñantaca, manataj cutinca tigranguichijchu nishca ñantami Egiptomanca barcocunapi tigrachinga. Chaipica huatashca shina causachunmi cancunataca cancunata p'iñajcunaman c'atungacuna. Cancunataca pi mana randingacunachu.