DEUTERONOMIO 27 - Dios Rimashca Shimicunami

Mandashcata rumipi quillcashcami

¹ Moisespish israelcunata cunaj yuyajcunapish israelcunataca cashnami nirca: “Cunan ñuca cancunaman quillcashpa mandashcacunataca tucuita pajtachinguichij.

² Jordán yacuta ch'imbashpa, Mandaj Dios cancunapaj Taita Dios cushca llajtaman yaicungapaj ch'imbai punllaca, jatun rumicunata shayachishpa calhuan llambujllata ruranguichij.

³ Lechepish, sacha chuspipaj mishquipish yacu llujshicuj shina tiyaj llajtata Mandaj Dios cancunapaj Taita Dios cancunapaj ñaupa yayacunaman nishca shinallataj cancunaman cushca llajtaman yaicushca q'uipaca chai rumicunapica tucui cai mandashcapi nishcacunata quillcanguichij.

⁴ Cancunata cunan ñuca mandashpa shayachinguichij nishca rumicunataca ña Jordán yacuta ch'imbashpa Ebal urcupi shayachishpa calhuan llambujllata ruranguichij.

⁵ Mandaj Dios cancunapaj Taita Diospaj shuj altartapish chaillapitaj rumicunahuan ruranguichij. Chai rumicunataca ama ima fierrocunahuan labranguichijchu.

⁶ Mandaj Dios cancunapaj Taita Diospaj altartaca mana p'aquishca rumicunahuan rurashpa chai altar jahuapi, Mandaj Dios cancunapaj Taita Diosman tucuita cushpa tucui rupachinguichij.

⁷ Sumaj causaimanta cunapajpish animalta huañuchishpa Taita Diosman cunguichij. Chai aichataca Mandaj Dios cancunapaj Taita Diospaj ñaupajpi micushpa cushicunguichij.

⁸ Chai rumicunapica cai mandashcapi tucui imalla nishcacunata ricunallata quillcanguichij” nishpami mandarca.

⁹ Chai q'uipaca Moisesca levita curacunahuan tandanacushpami israelcunataca cashna nirca: “Israelcuna, upajlla uyaichij. Cunanca Mandaj Dios cancunapaj Taita Diospajllacunami tucushcanguichij.

¹⁰ Mandaj Dios cancunapaj Taita Dios rimashcata uyashpa pai mandashcacunata, pai chaitataj pajtachichun nishcacunata cunan ñuca cancunaman yachachishcacunataca tucuita pajtachinguichij” nircami.

Dios mandashcata p'aquijca llaqui tucuna cashcami

¹¹ Chai punllallatajmi Moisesca, israelcunataca cashna yachachirca:

¹² Jordán yacuta ña ch'imbashpaca tucui israelcuna alli canata huillangapajca Gerizim urcu jahuapica: Simeonpaj, Levipaj, Judapaj, Isacarpaj, Josepaj, Benjaminpaj aillucunami chai urcu jahuapi cangacuna.

¹³ Llaqui tucuna cashcata huillangapajpish Ebal urcu jahuapica: Rubenpaj, Gadpaj, Aserpaj, Zabulonpaj, Danpaj, Neftalipaj aillucunami chaipi cangacuna.

¹⁴ Chaipimi levitacunaca caparishpa tucui israelcunataca cashna ningacuna:

¹⁵ Maijanpish caspita diostajllata rurajcunapish, imata yacuyachishpa diostajllata rurajcunapish, imatapish ruranata yachajcuna maquihuan rurashca Diostajllacunata pacashpa charijcunaca Mandaj Dios millananatami rurangacuna. Chaicunaca llaqui tucushca cachun nijpica tucuicuna: Chashnataj cashca cachun ninguichij.

¹⁶ Maijanpish paipaj yayata paipaj mamata yanganchishpa p'iñajcunaca llaqui tucushca cachun nijpica, tucuicuna: Chashnataj cashca cachun ninguichij.

¹⁷ Maijanpish shujtajpaj allpa maillata cashcata ricuchij rumita anchuchijca llaqui tucushca cachun nijpica, tucuicuna: Chashnataj cashca cachun ninguichij.

¹⁸ Ñahui mana ricujta shujtaj ñanta cachaj runaca llaqui tucushca cachun nijpica, tucuicuna: Chashnataj cashca cachun ninguichij.

¹⁹ Shujtaj llajtamanta shamujcunata, yaya mama illaj huahuacunata, viudacunata, maijanpish chaicunapaj imalla rurana cashcata mana rurashpa, ashtahuanpish shujtajman tucujca llaqui tucushca cachun nijpica, tucuicuna: Chashnataj cashca cachun ninguichij.

²⁰ Maijanpish paipaj yayapaj huarmihuan siririshpa paipaj yaya llatanashpa ricunata ricujca llaqui tucushca cachun nijpica, tucuicuna: Chashnataj cashca cachun ninguichij.

²¹ Maijanpish animalhuan chayarinacujca llaqui tucushca cachun nijpica, tucuicuna: Chashnataj cashca cachun ninguichij.

²² Yayamanta cashpa, mamamanta cashpa lapanihuan siririjca llaqui tucushca cachun nijpica, tucuicuna: Chashnataj cashca cachun ninguichij.

²³ Maijanpish paipaj suegrahuan siririjca llaqui tucushca cachun nijpica, tucuicuna: Chashnataj cashca cachun ninguichij.

²⁴ Maijanpish cungaillapi pita huañuchijca llaqui tucushca cachun nijpica, tucuicuna: Chashnataj cashca cachun ninguichij.

²⁵ Maijanpish imapi mana juchachipaj runata huañuchingapaj cullquita chasquijca llaqui tucushca cachun nijpica, tucuicuna: Chashnataj cashca cachun ninguichij.

²⁶ Maijanpish cai mandashcacunata chaitataj tucuita mana pajtachijca llaqui tucushca cachun nijpica, tucuicuna: Chashnataj cashca cachun ninguichij.