DEUTERONOMIO 26 - Dios Rimashca Shimicunami

Punta p'ucushca granocunatapish chungamanta shujta ch'icanchinatapish mandashcami

¹ Mandaj Dios cancunapaj Taita Dios cancunapaj cachun cushca llajtaman chayashpa ña chaipi causashpaca,

² Mandaj Dios cancunapaj Taita Dios cancunaman cushca llajtaman chayashpa cancuna punta tarpushca punta p'ucushca granocunamantaca tucuita ch'icanchishpa shuj canastapi churashpa Mandaj Dios cancunapaj Taita Dios paipaj shuti chaipi cachun agllashca puebloman apanguichij.

³ Chaipica, chai punllacuna Diospajta ruracuj curapaj ñaupajman rishpa cashna ninguichij: Mandaj Diospaj ñaupajpimi ñucanchij ñaupa yayacunaman pai cusha nishca llajtaman ñami yaicunchij nishpa Mandaj Diosman huillanchij ninguichij.

⁴ Chashna nijpica cancunapaj maquimanta canastata cura japishpami, Mandaj Dios cancunapaj Taita Diospaj altar ñaupajpi churanga.

⁵ Chaipica, Mandaj Dios cancunapaj Taita Diospaj ñaupajpi cashna ninguichij: Ñucanchij ñaupa yayaca arameo maiman chayanata mana yachashpa chingarinalla puricushpami, paica Egipto llajtaman uriyashpa ashalla runacunahuan chaipi causarca. Chaipimi achcata mirarishpa c'ari c'ari yallitaj achca jatun mama llajta tucurca.

⁶ Egipciocunaca ñucanchijtaca maipish cachun charishpa, yallitaj llaquichishpami, sinchi trabajocunata rurachishpa charircacuna.

⁷ Chaimantami Mandaj Dios ñucanchij ñaupa yayacunapaj Taita Diostaca, c'uyailla tucushpa llaquihuai nishpa mañarcanchij. Mandaj Diosca ñucanchij mañashcata uyarcami. Ñucanchij llaquita apacujta, ñucanchijta llaquichishpa sinchita trabajachicujtaca paica ricurcami.

⁸ Ñucanchijtaca Mandaj Diosmi paipaj tucuita rurai tucuj maquihuan, paipaj rigrata chutashpa jatun mancharinacunata rurashpa señalcunata milagrocunata rurashpa Egiptomantaca llujshichimurca.

⁹ Ña llujshichimushpa caiman pushamushpaca lechepish, sacha chuspipaj mishquipish yacu llujshicuj shina tiyan cai llajtatami ñucanchijman curca.

¹⁰ Mandaj Dioslla, cunan can ñucanchijman cushca cai allpapi ñucanchij punta tarpushca punta p'ucushca granocunamanta ch'icanchishcatami apamunchij ninguichij. Shina nishpaca cancuna apashca canastata Mandaj Dios cancunapaj Taita Diospaj ñaupajpi churashpa, Mandaj Dios cancunapaj Taita Diosta adoranguichij.

¹¹ Mandaj Dios cancunapaj Taita Dios cancunamanpish, cancunapaj huasi ucupuracunamanpish allicunata cushcamanta cushicunguichij. Cancunapish, levitacunapish, shujtaj llajtamanta caj cancunapurapi causajcunapish cushicunguichij.

¹² Quimsa huatacama cada huata cancunapaj chagrapi p'ucushcacunata chungamanta shujta ch'icanchishcataca ña quimsa huatapica chai ch'icanchishcacunataca levitacunaman, shujtaj llajtamanta cajcunaman, yaya mama illaj huahuacunaman, viudacunaman cunguichij. Chashna cujpimi, cancunapaj llajtacunapica tucuicuna huijsa pajtajta micushpa causangacuna.

¹³ Mandaj Dios cancunapaj Taita Diosmanca cashna ninguichij: “Ñucanchij cambaj ch'icanchishpa, catishcacunataca ñucanchij huasimanta llujshichishpami apamunchij. Chaicunataca levitacunamanpish, shujtaj llajtamanta cajcunamanpish, yaya mama illaj huahuacunamanpish, viudacunamanpish can ñucanchijta mandashca shinallatajmi curcanchij. Can mandashcacunataca mana p'aquishcanchijchu, maijanta mana cungarishcanchijchu tucuitami pajtachishcanchij” ninguichij.

¹⁴ Cambaj ch'icanchishpa caticushcacunataca ñucaca llaquihuan cashpapish mana micushcanichu, imamanta mapayashca cashpapish chaipi mana imapi perdishcanichu. Huañushcacunamanpish imata mana curcanichu. Chashnami Mandaj Dios ñucanchij Taita Dios imalla nishcacunataca cazurcani. Can mandashcacunataca tucuitami pajtachircani.

¹⁵ Can cushca llajtapi caj israelcunataca can causacun jucha illaj jahua pachamanta ricushpa alli cashca cachun nipangui. Lechepish, sacha chuspipaj mishquipish yacu llujshicuj shina tiyan llajtata ñucanchij ñaupa yayacunaman cunitajmi can nishca llajtapi causajcunatami chashna alli cashca cachun nina cangui ninguichij.

¹⁶ Mandaj Dios cancunapaj Taita Diosmi cunanca cai chaitataj pajtachichun nishcacunata, pajtachinguitaj nishcacunata pajtachichun cancunataca mandan. Chaicunataca tucui cancunapaj shunguhuan, tucui cancunapaj almahuan chaita rurana yuyailla tucushpa pajtachinguichij.

¹⁷ Cunan cancunaca: “Mandaj Diosca ñucanchij Taita Diosmi. Cunanca ima shina pai causachun nishca shinami causashun, pai chaitataj pajtachichun nishcacunatami pajtachishun, pai mandashcacunata, pai pajtachinguitaj nishcacunatami pajtachishun, pai imalla nishcacunatapish uyashunmi ninguichijmi.

¹⁸ Mandaj Diosca pai nishca shinallatataj pajtachishpami cancunataca cunanca ñuca agllashcacunami canguichij nishpa cancunataca chaipi causai callarichun nirca. Tucui pai mandashcacunata huaquichichunmi chashna nirca.

¹⁹ Tucui pai rurashca llajtacunamantaca cancuna jatun llajta nishca, c'ari c'aricuna alli nishcacuna cachunmi chashna nirca. Mandaj Dios cancunapaj Taita Diosca pai nishca shina paipajlla ch'icanchishcacuna cachunmi chashna nirca” nircami.