DEUTERONOMIO 25 - Dios Rimashca Shimicunami

¹ Maijancunapi p'iñanacui tiyajpica, juezcunapajman ringuichij. Paicunami ima mana juchachinayujtaca cacharingacuna. Imapish juchachinayujtaca llaquichingacuna.

² Chai mana allita rurajtaca azotina cajpica, juezmi paipaj ñaupajpi chai runataca pambapi sirichishpa azotichinga. Chai runa ima shina millaita rurashca shinallatajmi mashnata azotina cashca shinallatataj azotichinga.

³ Shina cajpipish, chuscu chungacamalla azotinguichij. Chaimanta yallita azotijpica cancunapurallataj caj runaca alli tucuchun azotishcataca mana yuyangachu. Ashtahuanpish llaquichingapaj p'iñashcamanta azotishca cashcatami yuyanga.

⁴ Trillacuj huagrataca ama shimita huatanguichijchu.

Punta huauqui huañujpica c'achunhuan q'uipa huauqui cazarachun mandashcami

⁵ Huauquindijcuna tandalla causacushpa huauqui manaraj huahuacunata charishpa huañujpica, chai huañuj huauquipaj huarmica shujtaj familiamanta caj c'arihuanca ama cazarachun. Chai huañujpaj huauquillataj chai huarmipi chayarishpa chai huarmita paipaj huarmi cachun japishpa cutinllataj familia tucuchun.

⁶ Chai huarmica huañuj cusapaj huauquihuan charishca punta churitaca huañuj cusapaj shutita shutichichun. Chashna rurajpimi chai huañuj huauquipaj shutica israelcunapuramantaca mana chingaringa.

⁷ Ashtahuanpish chai q'uipa huauqui paihuan mana cazarasha nijpica, cachunca cunaj yuyajcuna tiyacun punguman rishpa cashna nichun: Ñuca huañuj cusapaj huauquica israelcunapurapi paipaj huauquipaj shuti ama tiyachun nishpamari ñucahuanca mana cazarasha nin nichun.

⁸ Chashna nijpica, chai pueblopi causaj cunaj yuyajcunaca chai mana cazarasha nij runata cayashpami paihuan rimanga. Chaipipish chai runaca: Mana cazarasha ninichu nijpica,

⁹ paipaj c'achun paipajman c'uchuyashpami, cunaj yuyajcunapaj ñaupajpi paipaj pargateta chaquimanta quichushpa ñahuipi ch'ucashpa cashna ninga: Huauquipaj huasi ucupura tiyachun mana munaj runataca cashnami rurana ningami.

¹⁰ Chai runapaj huasi ucupuracunataca israelcunapurapica: Lluchu chaquilla huasi familiacunami nishpami shutichingacuna.

Shujtaj mandashcacunami

¹¹ Ishqui runacuna macanacucujpi shujpaj huarmi chugrichicujpaj maquimanta paipaj cusata mitsangapaj c'uchuyashpa, caishuj runataca pai charishca aichata lutsashpa llapingachari.

¹² Chashna ruraj huarmipaj maquitaca mana perdonashpami p'itina canguichij.

¹³ Cancunapaj c'atunapi randinapica ama uchilla pezanatapish jatun pezanatapish charinguichijchu.

¹⁴ Cancunapaj huasicunapipish jatun efata, uchilla efataca ama charinguichijchu.

¹⁵ Ashtahuanpish imata pezanataca mana pi juchachipajta, allita pezajta charinguichij. Imata medina efatapish cashcatataj allitataj charinguichij. Chashna rurashpami Mandaj Dios cancunapaj Taita Dios cancunaman cushca llajtapica unita causanguichij.

¹⁶ Pezanacunahuan shuhuashpa, cashcata mana rurajcunaca Mandaj Dios cancunapaj Taita Diospajca millananami.

Amalecitacunata chingachichun mandashcami

¹⁷ Egiptomanta llujshishpa cancuna ñanta shamucujpi, amalecitacuna cancunata imata rurashcata yuyarichij.

¹⁸ Paicunaca ñanman tupanaman llujshishpami huashata caticuj ashtahuan shaicushcacunata japishpa Taita Diostapish imata mana manchashpa huañuchircacuna. Cancuna shaicushcacuna cajpi, fuerza illajllacuna cajpimi chashna rurarca.

¹⁹ Mandaj Dios cancunapaj Taita Dios cancunapaj cachun cushca llajtapi ña causachun churashpa cancunata p'iñaj muyundij llajtacunamanta samachijpica, amalecitacunapaj shutita yuyarinataca tucui chai llajtamanta chingachinguichij. Chaita ruranataca, amataj cungaringuichijchu.