DEUTERONOMIO 24 - Dios Rimashca Shimicunami

¹ Maijan runa shuj huarmihuan cazarashpa chai huarmi paipi mana alli ricurijpi, pai munashca mana cajpica, chai huarmimanca, shitashcata ricuchij shuj quillcata paipaj maquipi churashpa cai huasimantaca rilla nishpa cachachunlla.

² Chai huarmica cusapaj huasimanta llujshishpa rishca cashcamantaca, shujtaj c'arihuan cazarai tucunmi.

³ Paipaj huarmi cachun japij q'uipa cusapish mana munashcamanta, shitashcata ricuchij quillcata paipaj maquipi churashpa cai huasimanta rilla nijpi, mana cashpaca chai cusaca huañujpi,

⁴ ñaupaman shitaj cusaca chai huarmitaca ña paipaj huarmi cachun mana cutin japi tucunchu. Chai huarmica shujtaj c'arihuan chayarinacushpa mapayashca cashcamantami mana cutin japi tucun. Chashna ruranaca Mandaj Diospaj ñaupajpica millanana cashcamantami mana cutin japi tucun. Mandaj Dios cancunapaj Taita Dios cancunapaj cachun cushca llajtataca cancunaca mana chashna mapayachinachu canguichij.

⁵ Maijan runa cunanlla cazarashca cashpaca, jatun macanacuimanpish ama llujshichun. Pai cazarashca huarmita cushichingapajca ima shujtajta rurangapajpish huasimantaca huata jundacama ama maiman llujshichun.

⁶ Maijan imata mañajpica, chai mañashcata cutichingacama cutana molinota ucu ladota cashpa jahua ladota cashpa ñataj prendata japinguichijman. Chaita rurashpaca paipaj causaita quichushca shinami canga.

⁷ Israelcunapurallamantataj maijan runa paipajta rurachun, mana cashpaca shujtajcunaman c'atungapaj maijan runata shuhuashcata japishpaca, chai runataca huañuchinami canguichij. Chashnami cancunapuramanta, millaita anchuchinguichij.

⁸ Millai lepra ungüitaca alli chaparashpa cuidaringui. Levita curacuna yachachijpica, paicuna yachachishca shina rurangui. Ñuca ima shina cuidarichun nishca shinataj cuidaringuichij.

⁹ Cancuna Egiptomanta llujshishpa ñanta shamucujpi Mandaj Dios cancunapaj Taita Dios, Mariata lepra ungüihuan llaquichishcataca yuyarichigari.

¹⁰ Cancunapurallamantaj maijanman imata mañachishpaca, mañachishcata tigrachingacama prendata apangapaj paicunapaj huasiman ama yaicunguichijchu.

¹¹ Mañachishcata tigrachingacama pai imata cusha nishcata, paillataj llujshichishpa cungacama canllallapi shuyanguichij.

¹² Chai runa huajcha cajpica, mañachishcamanta ima prendata japishcata manaraj tigrachishpaca ama dormij siriringuichu.

¹³ Mañachishcamanta ima prendata apashcataca manaraj inti huashicujpi tigrachinguichij. Cancuna tigrachijpimi paica chai churanahuan c'atarishpa dormishpaca cancunataca alli cashca cachun ninga. Cancuna chashna rurashpaca Mandaj Dios cancunapaj Taita Diospaj ñaupajpimi cashcata rurajcuna ricuringuichij.

¹⁴ Shujpi shujpi trabajaj imapish illaj huajcha runataca cancunapura cajpipish, shujtaj llajta runa cancunapaj maijan pueblopi causacuj cajpipish ama cancuna munashca shina trabajachishpa llaquichinguichijchu.

¹⁵ Pai trabajashcamantaca amaraj inti huashicujpi chai punllallataj paganguichij. Huajcha cashcamanta paica chai ganashcallahuan causajmi. Cancuna chashna cajpica paica mana caparishpa canta juchachishpa Mandaj Diosta mañangachu. Cancunaca ña mana chaimanta juchayujchu canguichij.

¹⁶ Huahuacunapaj juchamantaca yaya mamaca mana huañungachu. Yaya mamapaj juchamantapish huahuacunaca mana huañungachu. Maijanpish juchallijca chai juchamantaca paimi huañunga.

¹⁷ Cancunaca shujtaj llajtamanta cajcunatapish, yaya mama illajcunatapish paicunapaj ima shinalla rurana cashcataca ñataj mana ruranguichijman. Viuda huarmi imata mañajpica tigrachingacama ama ima prendata apanguichijchu.

¹⁸ Ashtahuanpish cancunapish Egiptopi cashpa, shujtajpajta rurajcuna cashcata yuyaringuichij. Mandaj Dios cancunapaj Taita Diosmi cancunataca chaimanta llujshichimurca. Chaimantami cancunataca cai ruranacunata rurachun mandani.

¹⁹ Cancunapaj chagrapi cozicha punlla cozichacushpa, maijan gavillata cungashca cashpaca ama apanaman tigranguichijchu. Chaica shujtaj llajtamanta shamujcunapaj, yaya mama illaj huahuacunapaj, viudacunapajpishmi canga. Chaitaca Mandaj Dios cancunapaj Taita Dios cancunapaj maquihuan tucui imalla rurashcacunapi allicunata cuchunmi chashna rurana canguichij.

²⁰ Olivos yurata cuyuchishpa cancuna olivosta tandacushpaca ramacunapi saquirishcacunata japinaman ama tigranguichijchu. Chaicunaca shujtaj llajtamanta shamujcunapaj, yaya mama illaj huahuacunapaj, viudacunapajmi canga.

²¹ Cancunapaj uvata pallacushpapish, ama maipi tiyajta mashcashpa pallanguichijchu. Chaicunaca shujtaj llajtamanta shamujcunapaj, yaya mama illaj huahuacunapaj, viudacunapajmi canga.

²² Cancunapish Egiptopi shujtajpajta rurajcuna cashcata yuyaringuichij. Chaimantami cancunataca caicunata rurachun mandani.