DEUTERONOMIO 22 - Dios Rimashca Shimicunami

¹ Maijan cancunapurapaj huagra cashpa, oveja cashpa chingarishca cajta ricushpaca ama mana ricushca shina tucunguichu. Ashtahuanpish paimanca tigrachinguilla.

² Chai animalyujca mana cambaj c'uchullapi causaj, mana rijsishca cajpica, chai animaltaca cambaj huasiman apashpa, mashcanaman shamujpi tigrachingapaj charicunguilla.

³ Burrota cashpa, churanata cashpa, ima shujtaj charinacunata cashpapish tarishpaca, cancunapurapajta cashpa, shujtajpajta cashpa ama mana japishca shina tucunguichijchu ashtahuanpish tigrachinguichijlla.

⁴ Cancunapurapaj burro cashpa, huagra cashpa ñanpi urmashca siricujta ricushpaca ama pasanguichijllachu. Ashtahuanpish ayudashpa jatarichinguichij.

⁵ Huarmicunaca c'aricunapaj churanataca ama churaringuichijchu. C'aricunapish huarmicunapaj churanataca mana churaringuichijchu. Chashnaca Mandaj Dios cancunapaj Taita Diospajca millananami tucun.

⁶ Ñanta ricushpa maijan yurapi mana cashpaca, pambapi ima pájaro tazinpi huahuacunata cashpa, luluncunata cashpa ugllashpa siricuj mama pajarota ricushpaca chai tazintaca mamandij huahuacunandijca ama japinguichijchu.

⁷ Mama pajarotaca richun saquishpa huahua pajarocunallata apanguichij. Alli unita causangapajmi chashna rurana canguichij.

⁸ Terrasayuj huasita rurashpaca chai muyundijta pircanguichij. Chashna rurashpami maijan chai jahuamanta urmashpa huañujpica, cancunapaj huasi ucupuracunataca mana juchachishca canguichij.

⁹ Cancuna uvata tarpushpaca ama ch'ican ch'ican muyucunandij tarpunguichijchu. Chashna tarpushpaca, tarpushca muyucunandij, tarpushca uvacunandij tucuita chingachinguichijman.

¹⁰ Huagrahuan, burrohuanca ama yapunguichijchu.

¹¹ Oveja millmahuan, linohuan chagrushpa ahuashca churanatapish ama churanguichijchu.

¹² Cancuna churarishca jahua churanapica, chuscu esquinacunapitaj flecoscunata churanguichij.

Japirijcunata, huainayajcunata ima shina rurachun mandashcami

¹³ Maijan cashpapish cazarashpa paipaj huarmipi chayarishca q'uipa mana ricunachingachari.

¹⁴ Yangalla juchachishpa cashna ningachari: Ñucami cai huarmihuan cazararcani. Paipi chayarishpaca shujtaj c'arihuan ña chayarinacushca cashcatami ricuni nishpa huillangachari.

¹⁵ Chashna nijpica chai huarmipaj yaya mamaca paicunapaj ushushi, pi c'arihuan manaraj chayarinacushca cashcata ricuchij señaltami pueblo pungupi caj cunaj yuyajcunapaj ñaupajman apangacuna.

¹⁶ Chai huarmipaj yayaca cunaj yuyajcunamanca: Ñucami cai runaman paipaj huarmi cachun ñuca ushushita curcani. Paica p'iñashpami,

¹⁷ “cambaj ushushica ña shujtaj c'arihuan chayarinacushcamari cashca” ninmi. Shina cajpipish ñuca ushushi pi shujtaj c'arihuan manaraj chayarinacushca cashcata ricuchij señalta ricuichij nishpaca chai pueblopi caj cunaj yuyajcunapaj ñaupajpimi paipaj ushushi mantashca linsota tendishpa ricuchinga.

¹⁸ Chaita ricushpaca chai pueblopi caj cunaj yuyajcunaca chai runata japishpa llaquichichuncuna.

¹⁹ Chai runataca, Israel solterata yangamanta millaita ruraj huarmita shina rurashcamantaca patsaj cullquita pagachishpa chai solterapaj yayaman cuchun. Chai jahuapish chai huarmica chai runapaj huarmillatajmi canga. Chai runaca tucui causaipi mana shitai tucungachu.

²⁰ Chai huarmi ña shujtaj c'arihuan chayarinacushca cajpica,

²¹ paipaj yayapaj huasi punguman llujshichishpa, chai pueblopi causaj c'aricuna huañungacama rumicunahuan shitachuncuna. Chai huarmica paipaj yayapaj huasipi huainayashpa israelcunapurapi millaita rurashcamantami chashna rurana canguichij. Chashnami cancunapuramantaca chai millaitaca anchuchinguichij.

²² Cusayuj cazada huarmihuan siricujta japishpaca, c'aritapish, huarmitapish ishquitatajmi huañuchina canguichij. Chashnami israelcunapuramanta millaitaca anchuchinguichij.

²³ C'arihuan manaraj chayarinacushca shuj soltera maijanhuan cazarangapaj ari ninacushca cangachari. Chai solterataca pueblopi shuj c'ari japishpa paihuan siriringachari.

²⁴ Chashna rurajcunataca, ishquitatajmi pueblo punguman llujshichishpa rumicunahuan shitashpa huañuchina canguichij. Chai huarmitaca pueblollapitaj cashca jahua mana caparirishcamanta, c'aritaca shujtajhuan ari ninacushca huarmita pingachishcamantami huañuchina canguichij. Chashnami israelcunapuramanta millaita anchuchinguichij.

²⁵ Ashtahuanpish maijan c'arica, shujtajhuan ari ninacushca soltera chagrapi puricujpi japishpa paihuan siriringachari. Chai solterata japirijtaca paillatami huañuchina canguichij.

²⁶ Chai solterapica huañuipaj jucha mana tiyashcamanta ama imata ruranguichijchu. Chashna japirishcaca, shuj runa shujtaj runata japishpa huañuchishca shinami.

²⁷ Shujtajhuan ari ninacushca soltera chagrapi pailla cajpi japirishcamantaca caparirijpipish ¿pitaj mitsanmanri?

²⁸ C'arihuan manaraj chayarinacushca, cazarangapajpish pihuan manaraj ari ninacushca shuj solterata maijan runa japishpa paihuan siriringachari. Chai yacharijpica,

²⁹ chai solterahuan siririj runaca chai solterapaj yayamanca, pichca chunga cullquita cuchun. Chai solterata pinganchishcamantaca chai solteraca ña paipaj huarmimi canga. Paitaca paipaj tucui causaipi mana shitai tucungachu.

³⁰ Yayapaj huarmitaca ni pi ama paipaj huarmi cachun japichun. Yayapaj camatapish ni pi ama mapayachinguichijchu.