DEUTERONOMIO 14 - Dios Rimashca Shimicunami

¹ Cancunaca Mandaj Dios cancunapaj Taita Diospaj huahuacunami canguichij. Maijan huañushcamantaca, cancunapaj aichata ama chugrichiringuichijchu. Uma ajchata ama p'itiringuichijchu.

² Cancunaca Mandaj Dios cancunapaj Taita Diospaj jucha illajcunami canguichij. Paica tucui cai pachapi causajcunamantaca cancunalla Mandaj Diospajlla agllashcacuna cachunmi cancunataca agllarca.

Micuna animalcunamantapish, mana micuna animalcunamantapish

³ Tucui imatapish Dios mapami nishcataca ama micunguichu.

⁴ Cancunaca cai animalcunallatami micui tucunguichij: Huagrata, ovejata, chivota,

⁵ ciervo nishca, gacela nishca, corzo nishca tarugacunata, sacha chivota, íbice nishcata, antílope nishca tarugata, sacha carnerocunallatami micui tucunguichij.

⁶ Pallca silluta charij tigrachishpa cashtuj tucui animalcunallatami micui tucunguichij.

⁷ Tigrachishpa cashtuj cajpipish, pallca sillucunayuj cajpipish, cai animalcunatami mana micuna canguichij: Camellota, liebre nishcata, cunutami mana micuna canguichij. Chaicunaca tigrachishpa cashtuj cashpapish mana pallca sillucunata charincunachu. Chai animalcunaca cancunapajca mapami canga.

⁸ C'uchipish pallca sillucunayuj cashpapish mana tigrachishpa cashtuj cashcamanta mapa animalmi. Chaicunapaj aichataca amataj micunguichijchu. Chai animalcunapica huañushcapipish amataj tuparinguichijchu.

⁹ Yacupi causaj tucui animalcunamantaca caicunata micunguichij: Alasyuj, escamacunayuj cajcunallatami micui tucunguichij.

¹⁰ Mana alasyuj mana escamayuj animalcunataca mana micunguichijchu. Chaicunaca cancunapajca mapa animalcunami.

¹¹ Alasyuj animalcunataca mana mapa animalcunataca tucuita micui tucunguichijmi.

¹² Ashtahuanpish caicunatami mana micui tucunguichij: Aguilata, quebrantahuesosta, azorta,

¹³ gallinazota, milanota chai shina angacunata,

¹⁴ tucui laya cuervocunata,

¹⁵ avestruzta, lechuzata, gaviotata, tucui laya gavilancunata,

¹⁶ chushijta, ibista, calamonta,

¹⁷ pelicanota, buitreta, somormujota,

¹⁸ cigüeñata, tucui laya garzacunata, abubilla nishcata, murcielagotapish mana micunachu canguichij.

¹⁹ Alasyuj chuspicunaca tucuicuna mapami. Chaicunataca ama micunguichijchu.

²⁰ Mana mapa caj alasyuj animalcunataca micui tucunguichijmi.

²¹ Huañushca animaltaca ima animal aicha cajpipish ama micunguichijchu. Chaitaca shujtaj llajtamanta shamushca cancunapaj llajtapi causacujcunaman cunguichij, paicunaca micui tucunmi. Mana cashpaca shujtaj llajtamanta shamujcunaman c'atunguichij. Ashtahuanpish cancunaca Mandaj Dios cancunapaj Taita Diospajlla ch'icanchishca cashcamantami mana micuna canguichij. Chivo aichataca mamapaj lechellapitajca ama yanunguichijchu.

Chungamanta shujta cuchun mandashcami

²² Cancunapaj allpapi p'ucushca granocunataca, tucuimantami huatanta chungamanta shujta cuna cashcataca cunataj canguichij.

²³ Chai chungamanta ch'icanchishca trigota, vinota, aceiteta, punta huacharishca huagracunata, ovejacunataca Mandaj Dios cancunapaj Taita Dios paipaj shutita churangapaj pai agllashca pueblopimi paipaj ñaupajpi micuna canguichij. Mandaj Dios cancunapaj Taita Diosta tucui cancunapaj causaipi manchashpa causanata yachangapajmi chashna rurana canguichij.

²⁴ Mandaj Dios cancunapaj Taita Dios cancunaman cushcacunamanta chungamanta shujta ch'icanchishpaca Mandaj Dios cancunapaj Taita Dios paipaj shutita churangapaj agllashca pueblomanmi apana canguichij. Chaiman apanapaj cancuna causacunmanta yalli caru cajpi mana apai tucushpaca,

²⁵ chai chungamanta shujta cushcacunataca c'atunguichij. Chai c'atushca cullquitaca Mandaj Dios cancunapaj Taita Dios agllashca puebloman apashpa ringuichij.

²⁶ Chaiman chayashpaca, chai cullquihuanca cancuna imata munashcata randinguichij. Vacacunata cashpa, ovejacunata cashpa, vinota cashpa, sidrata cashpa, ima shujtajcunata cancuna munashcatapish randinguichij. Chaipica Mandaj Dios cancunapaj Taita Diospaj ñaupajpi cancunapish, cancunapaj tucui familiacunapish jatun micuita rurashpa cushicunguichij.

²⁷ Chaita rurashpaca, cancunapaj llajtapi causaj levitacunataca ama cungaringuichijchu. Paicunaca cancuna shina ima japinatapish allpata japinatapish mana charinchu.

²⁸ Cancunapaj allpapi p'ucushca granocunataca cada quimsa huatapimi chai huata p'ucushca granocunataca chungamanta shujta ch'icanchishpa cancunapaj pueblocunallapitaj huaquichina canguichij.

²⁹ Cancunapurapi ima allpata mana charij levitacuna, shujtaj pueblomanta shamushcacuna, yaya mama illajlla huahuacuna, cancuna causacunpi tiyaj viudacunami chai micunata micungapaj cancunapajman shamushpa huijsa pajtata micungacuna. Cancunapaj maquihuan imata rurajpipish chaipi Mandaj Dios allicunata cuchunmi chashna rurana canguichij.