DEUTERONOMIO 10 - Dios Rimashca Shimicunami

Mandashcacunata shujtaj rumicunapi cutin quillcashcami

¹ Chai punllacunapimi Mandaj Diosca ñucataca cashna nirca: Ñaupaman caj shinallataj ishqui tablajlla rumicunata labrashpa ñucapajman cai urcuman huichiyai. Shinallataj caspimanta shuj arcatapish rurangui.

² Can ñaupaman p'aquishca rumicunapi quillcashca shimicunallatatajmi ñucaca quillcasha. Chai rumicunataca chai arcapi huaquichingui nircami.

³ Chashna nijpica, acacia caspimanta shuj arcata rurashpa, ñaupaman caj shinallataj ishqui tablajlla rumicunata labrashpami, chai rumicunataca maquipi apashca urcuman huichiyarcani.

⁴ Mandaj Diosca urcupi cashpa nina rupacuj chaupimanta ñucanchij tandanacushcapi pai imallata rimashca chunga mandashcacunallatatajmi ishqui tablajlla rumicunapica ñaupaman quillcashca shinallataj quillcarca. Chaitami Mandaj Diosca ñucaman curca.

⁵ Chai urcumanta tigrashpa uriyashpaca tablajlla rumicunataca chai rurashca arcapimi churarcani. Chai rumicunaca Mandaj Dios ñucata mandashca shinallatajmi cunancama chai arcapi tiyacun.

⁶ (Chai q'uipaca israelcunaca Beerot-bene-jaacán pugyumantami, Mosera puebloman rircacuna. Chai pueblopimi Aaronca huañurca, chaillapitajmi pambarcacuna. Paipaj randica paipaj churi Eleazarmi cura tucurca.

⁷ Chaimantaca, Gudgoda pueblomanmi rircacuna. Gudgoda pueblomantaca jatun yacucuna callpacuj Jotbata llajtamanmi rircacuna.

⁸ Chai punllacunapimi Mandaj Diosca, Leví aillutaca Mandaj Dioshuan ari ninacushca quillcata huaquichina arcata apaj cachun ch'icanchirca. Paipaj ñaupajpi pai mandashcata rurachun, paipaj shutipi israelcunata alli cashca canguichijman nichunmi ch'icanchirca. Cunan punllacunacamami paicunapaj ruranaca tucui chaicuna.

⁹ Chaimantami levitacunaca paicunapaj huauquicunapurapica ima japinata mana charincuna. Mandaj Dios nishca shinallatajmi paicunapaj japinaca Mandaj Diospajllata rurashpa causana).

¹⁰ Ñaupaman shinallatajmi chuscu chunga punllata, chuscu chunga tutata urcupi carcani. Cunanpish ñuca mañashcata Mandaj Dios uyashpami, cancunataca mana chingachishachu nirca.

¹¹ Chaipimi Mandaj Diosca ñucataca: Paicunapaj ñaupa yayacunaman ñuca cushatajmi nishca llajtaman rishpa, paicunapaj cachun japigrichun paicunataca ima shina rinalla tucuchun ruragri nirca.

Imallata cazuchun Taita Dios mañashcami

¹² Cunanca israelcuna Mandaj Diosca caitami mañan: Mandaj Dios cancunapaj Taita Diosta manchachun, paipaj ñancunallapi purichun, tucui almahuan, tucui shunguhuan paita c'uyashpa pai mandashcata rurachunmi Mandaj Dios cancunapaj Taita Diosca mañan.

¹³ Chaimanta cunan cancunapaj tucui causaipi alli canapaj Mandaj Dios mandashcacunata, pajtachingui nishcacunata cunan ñuca quillcashpa cushcata cancuna pajtachichunmi mañan.

¹⁴ Jahua pachapish, jahua pachamanta ashtahuan jahuaman caj jahua pachapish, cai pachapish chaipi tucui imalla tiyajcunapish Mandaj Dios cancunapaj Taita Diospajmi.

¹⁵ Mandaj Diosca, cancunapaj ñaupa yayacunata c'uyashpa agllanata munashcamantami paicunata agllarca. Cancunaca paicunapaj huahua huahuacunami canguichij. Chashnallatajmi cunanpish cai tucui llajtacunapuramantaca cancunata agllarca.

¹⁶ Circunsicionta ruraj shina shungumanta mapa yuyaita p'itichij. Ama ashtahuan ch'ahuancunallataj caichijchu.

¹⁷ Mandaj Dios cancunapaj Taita Diosca tucui dioscunapaj Diosmi, mandajcunapajpish Mandajmi. Manchana tucuita rurai tucuj Jatun Diosmi. Paica ñahuita ricushpalla mana imatapish rurajchu, camaricunata japishpalla mana maijanpura tucujchu.

¹⁸ Paica yaya mama illaj huahuacunapaj, viudacunapaj cashcata rurajmi. Shujtaj llajtamanta shamujtapish c'uyashpa micunata, churanata cujmi.

¹⁹ Cancunapish caru llajtamanta cajcunata c'uyanguichij. Cancunapish Egiptopi cashpaca caru llajtamanta cajcunallatajmi carcanguichij.

²⁰ Mandaj Dios cancunapaj Taita Diosta manchaichij. Paipajllata ruraichij, paillata catichij, imapish chashnataj cashcata nicushpaca paipaj shutipi nichij.

²¹ Paica cancuna alabanamari. Paimi cancunapaj Taita Dios. Paimi cancunapaj jatun mancharinacunata ruraj. Chaitaca cancunallataj ricurcanguichijmi.

²² Cancunapaj ñaupa yayacunaca, Egiptomanca canchis chungacunallami yaicurcacuna. Ashtahuanpish cunanca Mandaj Diosca cancunataca jahua pachapi caj luzerocunata shina achcatami mirachishca.