DEUTERONOMIO 1 - Dios Rimashca Shimicunami

Moisesca Horeb urcupi Mandaj Dios cushami nishcacunata israelcunaman yuyachishcami

¹ Jordán yacumanta inti llujshin ladoman caj Arabá shuti shitashca pambapi Moisés cashpaca cai shimicunatami tucui israelcunaman rimarca. Chai pambaca Puca Cucha ch'imbapurapimi. Chai pamba muyundijpica Parán, Tofel, Labán, Hazerot, Dizahab shuti pueblocunami.

² Horeb urcumanta, Seir urcuta rishpa Cades-barneamanca chunga shuj punlla purimi carca.

³ Egiptomanta israelcuna llujshishcaca ñami chuscu chunga huata tucurca. Chai huatapaj chunga shuj quilla callari punllapimi, Moisesca Mandaj Dios paicunata ima shina mandashca shinallataj israelcunaman huillarca.

⁴ Hesbonpi causaj amorreocunata jatun mandaj Sehonta, Edrei llajtapi caj Astarot pueblopi causaj Basanta jatun mandaj Ogta mishashca q'uipami caicunataca huillarca.

⁵ Moisesca Jordán yacumanta inti llujshin ladoman caj Moab llajtapimi, cai mandashcataca israelcunamanca cashna nishpa yachachirca:

⁶ “Mandaj Dios ñucanchij Taita Diosca Horeb urcupimi ñucanchijmanca cashna nirca: Cancunaca cai urcupica ñami unita canguichij.

⁷ Cancunaca amorreocunapaj urcuman, chai c'uchullapi caj llajtacunaman richij. Arabá llajta urcucunapi, pugru pambacunapi, Neguev pambapi, mama cucha c'uchullapi causaj cananeocunapaj llajtapi, Líbano llajtapi, Éufrates jatun yacucama tucui chai llajtacunapi causagrichij.

⁸ Riquichij, chai llajtataca ñucaca ñami cancunaman cuni. Chaitaca cancunapaj ñaupa yaya Abraham, Isaac, Jacobman paicunapaj q'uipa huahua huahuacunamanmi ñuca shimihuantaj cushatajmi nircani. Cancunaca chai llajtaman yaicushpa cancunapajtaj cachun japigrichijlla ninmi” nircami.

Juezcunata Moisés churashcami

⁹ Chai punllacunallatajmi ñucaca cancunamanca cashna nircani: Cancunataca, ñucallaca ña mana pushai tucunichu.

¹⁰ Mandaj Dios cancunapaj Taita Diosmi cancunataca yallitaj mirachishca. Chaimantami cunan cancunaca jahua pachapi tiyaj luzerocuna shina yallitaj achcacuna canguichij.

¹¹ Mandaj Dios cancunapaj ñaupa yayacunapaj Taita Diosca cunan cancuna mashna cashcamantaca huaranga cutihuan yallita mirachishca cachun. Pai cancunaman cushami nishca shinallataj allicunata cushca cachun.

¹² Cancunapurapi yallitaj llaquirinacui, p'iñanacui yallitaj rimanacuicunataca ¿ima shinataj ñucallaca allichi tucushari?

¹³ Cancunata pushachun ñuca churangapajca, cancunapaj aillucunapuramanta yachaisapa, yuyaisapa, pushanata alli yachaj runacunata agllashpa pushamuichij nircanimi.

¹⁴ Chaimi cancunaca: Can nishca shina ruranaca allimari nircanguichij.

¹⁵ Chaimi ñucaca cancunapaj aillucunapuramantaca yachaisapa, alli pushanata yachajcunata agllashpa cancunata pushaj cachun churarcani. Paicunataca shujtaca huarangacunata, caishujtaca patsajcunata, chaishujtaca pichca chungacunata, shujtajtaca chungacunata mandajcuna cachunmi churarcani. Shujcunataca tucui aillucunata mandaj cachunmi churarcani.

¹⁶ Cancunapaj juezcunataca cashnami mandarcani: Cancunapaj huauquicuna shamujpica paicuna huillashcata alli uyashpa, paicunataca ima shina cashcatataj ricuchinguichij. Paicunataca cancunapura cajpipish, shujtaj llajtamanta shamushcacuna cajpipish chai shinallataj ruranguichij.

¹⁷ Ima shina cashcata ricuchicushpaca, ama ñahuita ricushpalla llaquichinguichij. Jatun nishcacuna yangallacuna huillajpipish ishquindijtataj chai shinallataj alli uyanguichij. Cancunaca maijanta ama manchanguichijchu. Taita Dios mandashcata ruracushcamantaca chai rurashcaca Taita Diospajmi. Imapish cancuna mana allichi tucuipaj cajllata ñucapajmanca apamunguichij. Chaitaca ñucami uyasha nircanimi.

¹⁸ Chai punllacunami cancuna imalla rurana cashcataca chashna alli mandarcani.

Chunga ishqui runacunata purij shinalla ricumuchunca imapaj cachashcami

¹⁹ Horeb urcumanta llujshishpaca cancuna ricushca shinallataj manchanana shitashca jatun pambatami shamurcanchij. Mandaj Dios, ñucanchij Taita Dios mandashca shinallataj amorreocunapaj urcu chaqui ñanta shamushpami Cades-barneaman chayarcanchij.

²⁰ Chaipimi cancunataca: Amorreocuna causan urcumanmi chayamushcanchij. Chaitaca Mandaj Dios ñucanchij Taita Diosmi ñucanchijman curca.

²¹ Riquichij, chai llajtataca Mandaj Dios cancunapaj Taita Diosmi cancunaman curca. Cancunapaj ñaupa yayacunapaj Mandaj Taita Dios ima shina nishca shinallataj chaiman huichiyashpa cancunapaj cachun japigrichijlla. Ama manchanguichijchu, ama shaicuringuichijchu nircanimi.

²² Chaipimi tucui cancuna ñucapajman c'uchuyashpaca: Llajtacunata purij shinalla ricushpa ñucanchijman huillanaman tigramuchun ñucanchijpuramanta maijancunata ñaupachishpa cachashun. Paicuna rishpami mai ñanta huichiyanata, maijan pueblocunamanraj chayanata ricushpa huillanaman tigramungacuna nircanguichij.

²³ Chai nishcaca ñucapi alli ricurijpimi, cancunapuramanta, chunga ishqui aillucunamanta shuj shuj runacunata agllarcani.

²⁴ Paicuna rishpaca urcuman huichiyashpami, Escol pugru pambaman chayashpa chai llajtataca alli rijsircacuna.

²⁵ Paicunaca chai llajtapi p'ucushca granocunata apamushpami ñucanchijmanca: Mandaj Dios ñucanchij Taita Dios ñucanchijman cushca allpaca alli allpamari cashca nishpa huillarcacuna.

²⁶ Chaita uyashpapish cancunaca mana huichiyashun nishpami Mandaj Dios cancunapaj Taita Dios mandashcacunata c'ariyashpa mana cazurcanguichij.

²⁷ Ashtahuanpish cancunapaj carpa huasicunapimi cashna ninacurcanguichij: Mandaj Diosca ñucanchijhuan p'iñarishpami ñucanchijtaca amorreocunapaj maquipi churashpa tucuchingapaj, Egiptomantaca llujshichimushca.

²⁸ Cunanca ¿maimantaj huichiyashunyari? Ñucanchij huauquicunapish ñucanchijmanca cashna nishpami mancharinata huillancuna: “Chai llajtapi causajcunaca ñucanchijta yalli c'ari c'ari jatun runacunamari. Chai pueblocunaca yallitaj jatun, muyundijta pircacunapish jahua pachaman tupajta yallitaj jatunmi. Chaipica Anacpaj huahua huahuacunatapishmari ricumunchij nincunami” nircanguichijmi.

²⁹ Cancuna chashna ninacucujpipish ñucaca: Ama mancharichijchu, paicunataca ama manchaichijchu.

³⁰ Cancunata ñaupashpa ricuj Mandaj Dios, cancunapaj Taita Diosmi chaicunahuanca cancunapaj randi macanacunga. Egiptopi ima shinami cancunapaj ñaupajpi rurarca cunanpish chashnallatajmi ruranga.

³¹ Mandaj Dios cancunapaj Taita Dios shitashca pambata ima shina cuidamujtaca ricurcanguichijmi. Cancunataca shuj yaya paipaj quiquin churita cuidaj shinami tucui ñanpi caiman chayamungacama cuidamurca.

³² Chashna cajpipish cancunaca Mandaj Dios cancunapaj Taita Diostaca mana crircanguichijchu.

³³ Paimi cancuna maipi carpacunata shayachishpa tiyarinata ricuchingapajca ñanta ñaupashpa mashcashpa shamuj carca. Paica tutaca ninahuan, punllaca p'uyuhuanmi cancuna maita rina ñanta ricuchishpa ñaupaj carca.

Israelcunata Taita Dios llaquichishcami

³⁴ Mandaj Diosca cancuna paita rimashcata uyashpami, yallitaj p'iñarishpa cunantajca llaquichishatajmi nirca.

³⁵ Paicunapaj ñaupa yayacunaman ñuca cunitajmi nishca sumaj llajtamanca cai millaicunaca shujllapish mana yaicungachu.

³⁶ Jefonepaj churi Calebllami chai llajtamanca yaicunga. Paillami chaitaca ricunga. Ñucami pai maillata purimushca llajtataca paiman, paipaj huahuacunaman cusha. Pailla Mandaj Diospi shunguta churashpa catishcamantami chaimanca yaicunga nircami.

³⁷ Mandaj Diosca, cancunamanta ñucahuanpish p'iñarishpami: Canpish chai llajtamanca mana yaicunguichu.

³⁸ Chai llajtamanca canta ayudashpa pushacuj Nunpaj churi Josuemi yaicunga. Paimi israelcunamanca paicuna japina cashca llajtataca cunga. Paimanca ashtahuan alli yuyaicunata cungui.

³⁹ Cancunaca ñucanchij huahuacunataca macanacuipi mishashcamantami apangacuna nircanguichijmi. Cancunapaj huahuacunaca allitapish, mana allitapish cunancama manaraj yachancunachu. Paicunami chai llajtamanca yaicungacuna. Paicunaman cujpimi chai llajtataca paicunapaj cachun japingacuna.

⁴⁰ Ashtahuanpish cancunaca Puca Cuchaman rina ñanta shitashca pambaman tigrashpa richijlla nircami.

Horma pueblopi macanacushpa israelcunata mishashcami

⁴¹ Chaipimi cancunaca ñucataca cashna nircanguichij: Mandaj Diosta p'iñachishpamari juchallishcanchij. Mandaj Dios ñucanchij Taita Dios mandashca shina, paicunahuan macanacungapaj huichiyashunchijlla nishpami cancunaca cada quiquin macanacunacunata japishpa, chai urcunaman huichiyangapaj allichirircanguichij.

⁴² Ashtahuanpish Mandaj Diosca: Ñucaca ña mana cancunapaj chaupipichu cani. Cancunata p'iñajcuna ama mishachun cancunaca ama huichiyanguichijchu, ama macanacunguichijchu nishpa jarcai ninmi nircanimi.

⁴³ Ñuca chashna huillajpipish cancunaca mana uyarcanguichijchu. Ashtahuanpish Mandaj Dios mandashcata mana cazushpami, jatun tucushpa chai urcumanca huichiyarcanguichij.

⁴⁴ Ashtahuanpish chai urcupi causaj amorreocuna cancunahuan tupanaman llujshishpami cancunataca avispacuna shina catircacuna. Cancunataca Seir urcupi mishashpami, Horma pueblocama catircacuna.

⁴⁵ Cancuna tigrashpaca, Mandaj Diospaj ñaupajpimi huacarcanguichij. Ashtahuanpish Mandaj Diosca cancuna mañashcataca mana uyasha nishpa manataj uyarcachu.

⁴⁶ Chaimantami cancunaca Cadespi, chai tucui huatacunata causana tucurcanguichij.