DANIEL 9 - Dios Rimashca Shimicunami

Danielca israelcunamanta Diosta mañashcami

¹ Media shuti llajtamanta caj Asueropaj churi Dariomi caldeocunata jatun mandaj tucurca. Paica ñami shuj huatata mandacurca.

² Pai mandai callarishca huatapimi Daniel ñucaca, profeta Jeremiasman Mandaj Dios quillcachishca quillcata callarishpa tucui yuyaihuan alli alli ricucurcani. Chai quillcapica, canchis chunga huatata Jerusalén shitashca sirina cashcatami huillacun. Chai huatacuna ña pajtashcata, manaraj pajtashcata yachangapajmi rezacurcani.

³ Chaita ricushpaca, mana micushpa, cañamazuta churarishpa, ushpata shitarishpa Taita Diosta, Jatun Diosta mañashpa rogarishpa mashcangapajmi paipaj ladoman ñuca ñahuita churarcani.

⁴ Mandaj ñuca Taita Diosta mañashpa, paiman tucuita huillashpaca cashnami nircani: “Jatun Dios quiquinca manchashca cana jatun Taita Diosmi cangui. Quiquinta c'uyajcunata, quiquinpaj mandashcacunata huaquichijcunapajca, paicunapaj imata rurasha nishpa ari nishcatapish, llaquij canatapish pajtachijmi cangui.

⁵ Ñucanchijmari juchallishcanchij, millaitamari rurashcanchij, quiquinta mana rijsijcuna shinamari rurashcanchij, c'ariyajcunami cashcanchij, quiquin mandashcacunamantapish, quiquin chashnataj rurachun nishcacunamantapish anchurishcanchijmi.

⁶ Quiquinpajta ruraj profetacunatapish mana cazushcanchijchu. Paicunaca Taita Diosmi huillachin nishpami ñucanchij jatun mandajcunamanpish, ñucanchij mandajcunamanpish, ñucanchij yayacunamanpish, cai pachapi causaj tucuicunamanpish huillarcacuna.

⁷ Jatun Dios, quiquinca cashcatami rurashcangui. Ashtahuanpish ñucanchijca quiquinpaj ñaupajpica ima ñahui mana ricuripajmi tucushcanchij. Cunan punllaca judacuna cashpapish, Jerusalenpi causajcuna cashpapish tucui israelcunami urata, janajta maitapish cachashca c'uchullapi cashpa carupi cashpa causacunchij. Quiquinta mana cazushcamantami chashna causacunchij.

⁸ Mandaj Dios, ñucanchij jatun mandajcunapish, ñucanchij mandajcunapish, ñucanchij yayacunapish, ñucanchijllatajpish quiquinta p'iñachishpa juchallishcamantami cambaj ñaupajpica ima ñahui mana ricuripaj tucushcanchij.

⁹ Ñucanchijca Taita Diosta mana cazushpami c'ariyashcanchij. Cunanca Mandaj ñucanchij Diospimi llaquij canapish, perdonaj canapish tiyan.

¹⁰ Ñucanchij Mandaj Taita Dios pai mandashcapi nishca shina purichun nishpa rimashcatami mana cazushcanchij. Paica paipajta ruraj profetacunaman huillachishpami chai mandashcataca ñucanchijman curca.

¹¹ Tucui israelcunami quiquin mandashcata p'aquishpa, quiquin rimashcata mana cazungapaj quiquinmanta anchurishcacuna. Chashna rurashpaca Taita Diosta p'iñachishpamari juchallishcanchij. Chaimantami Taita Diospajta ruraj Moisesta quillcachishca mandashcapi mana cazujpica llaqui tucushca canman nishcaca ñucanchij jahuapi urmashca.

¹² Paica ñucanchijtapish, ñucanchij mandajcunatapish jatunta llaquichishami nishcataca llaquichishpatajmi pajtachishca. Jerusalenta llaquichishca shinaca, tucui cai pachapica nunca maipi mana llaquichishcachu.

¹³ Moisesta quillcachishpa mandashcapi nishca shinami, tucui cai llaquicunaca ñucanchij jahuaman shamushca. Ñucanchijta Mandaj Taita Diostaca ama ashtahuan llaquichihuaichu nishpaca manamari mañashcanchijchu. Ñucanchij mana allita ruranacunatapish manamari saquishcanchijchu. Mana llulla shimitapish manamari entendishcanchijchu.

¹⁴ Chaimi Mandaj Diosca llaquichina yuyailla tucushpa, cai llaquicunataca ñucanchij jahuaman cachashca. Ñucanchijta Mandaj Taita Dios rurashcacunaca tucui imapish chashna rurana cajpitaj rurashcami. Ñucanchijmari pai rimashcataca mana cazushcanchij.

¹⁵ Jatun Dios, ñucanchij Taita Dios quiquin agllashcacunataca quiquinpaj tucuita rurai tucuj maquihuanmi Egiptomanta llujshichircangui. Chashna rurashpami quiquinca tucuita rurai tucuj cashca rijsirircangui. Ñucanchijmari juchallishcanchij, quiquinta mana rijsijcuna shinami millaita rurashcanchij.

¹⁶ Jatun Dios, quiquinca ima shina cashcatataj ricushpa rurajmi cangui. Cunanca quiquinpaj Jerusalén pueblotapish, quiquinpaj jucha illaj urcutapish quiquin yallitaj p'iñarishpa mana ricunachicushcataca cungaripaiyari. Ñucanchij juchacunamanta, ñucanchij yayacuna mana allita rurashcamantami Jerusalén pueblopish, quiquinpaj agllashcacunapish ñucanchij muyundijpi causaj tucuicuna c'amishca causanchij.

¹⁷ Cunanca ñucanchij Taita Dios, quiquinpajta ruraj ñuca mañashcata, rogarishcata uyahuayari. Jatun Dios quiquinpaj shuti ama yanga cachunca, urmashca siricuj quiquinpaj huasita quiquinpaj ñahuihuan ricushpa achijyachihuai.

¹⁸ Ñuca Dioslla, quiquinpaj rinrinta ñuca ladoman churashpa uyahuayari. Quiquinta mañana pueblo urmachishca shitashca siricujtaca ricuhuayari. Ñucanchijca allitamari rurashcanchij llaquihuayari nishpaca mana mañanchijchu. Ashtahuanpish quiquinpaj jatun c'uyaipi shunguta churashpallami, quiquintaca mañapanchij.

¹⁹ ¡Jatun Dios uyahuayari! ¡Jatun Dios perdonahuayari! ¡Jatun Dios, quiquinpaj rinrinhuan uyashpa ñucanchij mañashcata rurahuayari! Ñuca Taita Dios, quiquinpaj shutita c'uyashcamanta, quiquinpaj shutita mañacun pueblota, quiquin agllashcacunata c'uyashcamanta llaquinataca ama uniyaichu” nishpami mañarcani.

Canchis chunga semanacunapi imalla tucunata huillashcami

²⁰ Ñucaca ñuca juchallishcatapish, ñuca aillupura israelcuna juchallishcatapish ñucata Mandaj Taita Diospaj ñaupajpi huillashpa tucui shunguhuan rogarishpami mañacurcani. Ñuca Diospaj jucha illaj urcumantapishmi mañacurcani.

²¹ Ñuca chashna mañacujpirajmi, muscuipi shina ñaupaman ricushca Gabriel shuti angelca, huairapi callpashpa ñucapajman shamurca. Chaica animalcunata huañuchishpa Diosman cuna shina chishi horasmi carca.

²² Paica ñucahuan parlashpa ñucaman alli entendichishpami cashna nirca: Daniel, cunanca canman alli yachaita cushpa, alli entendichingapajmi shamurcani.

²³ Can mañai callaricujpimi, ñucataca cacharca. Chaimi ñucaca canman yachachingapaj shamurcani. Canca yallitaj c'uyashcami cangui. Muscuipi shina ricushca imata nisha nishcata alli entendingapajca, ñuca huillashcata uyai nishpami cashna nirca:

²⁴ Chai chunga canchis semanacunataca cambaj llajtapurata, Diospajlla ch'icanchishca cambaj pueblota llaquichingapajmi chashna churashca. Dios mandashca shina mana ruracushcata chingachingapaj, juchata tucuchingapaj, millaita ruranata tucuitaj anchuchingapajmi chashna rurashca. Huiñaipaj cashcata ruraj canata rurangapaj, muscuipi shina ricushcatapish, profetacuna huillashcatapish sellashpa churangapaj, jucha illajcunata ashtahuan yalli Jucha illajta aceitehuan churangapajmi chashna rurashca.

²⁵ Caitaca allimi entendina cangui: Jerusalenta cutin shayachichun nishpa mandashcamantapacha, Mesías nishca Mandaj shamungacamaca canchis semanacuna, sujta chunga ishqui semanacunami canga. Plaza pambatapish, pueblo muyundij pircatapish llaqui punllacunapimi allichingacuna.

²⁶ Sujta chunga ishqui semanacuna q'uipaca, Mesiaspaj causaitami quichunga. Paicuna quiquinllamantatajca mana huañuchingacunachu. Shamunapaj caj mandajpaj gentecunami Jerusalentapish, Diospaj huasitapish tucui urmachinga. Chaipica ima mana saquiringachu. Yacu jundai shina cungaimanta shamushpami chai macanacuica tucuringacama catinga.

²⁷ Shuj semanapica paica achcacunahuanmi shuj ruranata ari ninacunga. Chaupi semanapica Diosman animalcunata cushpa huañuchinatapish, Diosman cunatapishmi anchuchinga. Chai q'uipaca llaquichicujca, yallitaj jatun millaitami ruranga. Chai llaquichijca, paita llaquichishpa tucuchina chayamungacamami chashna ruranga.