DANIEL 8 - Dios Rimashca Shimicunami

Carnerotapish, chivotapish muscuipi shina ricushcami

¹ Jatun mandaj Belsasar quimsa huatata ña mandacujpimi, Daniel ñucaca ñaupaman shinallataj muscuipi shina ricurcani.

² Chai muscuipica ñucaca, Elam llajtapi, llajtacunata mandana Susa pueblopi, Ulai shuti jatun yacu c'uchupi cashcatami ricurcani.

³ Chaipi huichilla ricushpaca ishqui gachuyuj shuj carnero jatun yacu uripi cajtami ricurcani. Gachucunaca jatun cashpapish shujca ashtahuan yalli jatunmi carca. Chai yalli jatun caj gachuca, q'uipatami huiñarca.

⁴ Chai carnerotaca, inti huashicunman cajcunatapish, janajman cajcunatapish, uraman cajcunatapish paipaj gachucunahuan chugrichijta, ima shujtaj animalpish mana ch'imbapurai tucujta, pai llaquichicunmantaca pi mana quishpiri tucujta, pai munashcata rurashpa ashtahuan ashtahuan fuerzayuj tucujtami ricurcani.

⁵ Ñuca chaita imashi nishpa yuyacujpirajmi, ñapish shuj chivoca inti huashicun ladomanta pambapipish mana sarushpa shamurca. Chai chivoca paipaj ñahuicuna chaupi frentepimi shuj jatun gachuta charirca.

⁶ Chai chivoca jatun yacu uripi ñuca ricushca, ishqui gachucunayuj carneropajmanmi paipaj tucui fuerzahuan yallitaj p'iñarishpa callpamurca.

⁷ Carneropajman chayashpaca paihuan macanacungapaj shayarishpami chugrichishpa ishquindij gachucunata p'aquirca. Carneroca paihuan macanacungapajca mana fuerzata charircachu. Chaimi chai carnerotaca pambapi urmachishpa sarurca. Chai carnerota mitsajca pi mana tiyarcachu.

⁸ Chai chivoca ashtahuan ashtahuan jatun tucushpami catirca. Pai yallitaj jatun cai punllacunami paipaj jatun gachuca p'aquirirca. Chai gachupaj randica paipica chuscu jatun gachucunami cai pacha chuscundij ladoman huiñarca.

⁹ Chai gachucunamanta shujmantaca shuj uchilla gachumi huiñarca. Chai gachuca ura ladomanpish, inti llujshin ladomanpish, Diospajlla sumaj llajta ladomanpishmi huiñashpa catirca.

¹⁰ Jahua pacha Taita Diospaj soldadocunacama chayajta huiñashpami, mirga soldadocunatapish, mirga luzerocunatapish allpaman urmachishpa sarurca.

¹¹ Paica soldadocunata mandajtapish yallitaj jatun tucushpami c'ariyarca. Chaimi Diosman punllanta animalcunata huañuchishpa cunatapish anchuchishpa, Diospajlla huasitapish urmachirca.

¹² Paicunallataj Dios mandashca shina mana rurashcamantami soldadocunatapish, Diosman punllanta animalcunata huañuchishpa cunatapish paipaj maquipi churarca. Mana llullaj shimitaca yanganchishpami pambapi shitarca. Imatapish pai munashcatami rurarca. Chaicunaca paipajca allimi llujshirca.

¹³ Chai q'uipaca jucha illaj shuj rimacujtami uyarcani. Caishuj jucha illajcunamanta shujca chai rimacujtaca: “Diosman punllanta animalcunata huañuchishpa cunata anchuchishcapish, Diosta adorana huasitapish, paipaj soldadocunatapish chai mandajpaj maquipi churashpa saruchishpa, cashna millai juchata rurachun saquishcaca ¿maicamataj cangari?” nishpami tapurca.

¹⁴ Shina nijpica: “2.300 chishicunacama, tutamantacunacamami chashna canga. Chai q'uipaca Diospajlla huasica mapa illajllata rurashcami canga” nircami.

¹⁵ Daniel ñucaca, muscuipi shina ricushcata yuyarishpa, chaica imatashi nishanin nishpa yuyacujpimi, ñapish ñuca ñaupajpica runaman rijchaj shuj shayarirca.

¹⁶ Ulai jatun yacu urimantaca: “Gabriel, muscuipi pai ricushca imata nisha nishcata chai runaman entendichi” nishpa, shuj runa sinchita caparijtami uyarcani.

¹⁷ Shina nijpica, ñuca maipi canmanmi ashtahuan c'uchuyamurca. Pai shamujpica achcata mancharishpami, pambaman tupajta cumurircani. Ashtahuanpish paica: “Riqui runa alli uyai, muscuipi shina can ricushcaca tucuri punllacunapajmi” nircami.

¹⁸ Pai ñucahuan rimacujpica, ñucaca dormirishpami pambaman urisinga urmarcani. Chaimi paica ñucata japishpa jatarichishpa shayachirca.

¹⁹ Paica cashnami nirca: “Dios p'iñarishpa llaquichicuica ima shina tucurinatami huillagrini. Can ricushcaca, tucuri punllacunapajmi.

²⁰ Ishqui gachucunayuj carnerota ricushcaca: Media, Persia llajtacunata jatun mandajcunatami ricuchin.

²¹ Chivoca Grecia llajtata jatun mandajtami ricuchin. Ñahuicuna chaupipi caj jatun gachuca, chai llajtapica pai punta jatun mandaj cashcatami ricuchin.

²² Chivopaj gachu p'aquirijpi, chaipaj randi chuscu gachucuna huiñashcaca, chai llajtaca chuscupi chaupirishca mandanacuna tucuna cashcatami ricuchin. Chaipi mandajcunaca, punta mandaj shina c'ari c'arica mana cangachu.

²³ Chai jatun mandajcunapaj mandana tucuricuipica, millaita rurajcunami yallitaj jundanga. Chaipimi shujtaj jatun mandaj jataringa. Paica jatun tucushca, pi mana yachaipajcunatapish yachaj tucushcami canga.

²⁴ Paica ashtahuan ashtahuan c'ari c'ari tucushpami catinga. Mana paipaj quiquin fuerzahuanchu canga. Jatuntami llaquichinga. Tucui chaicunaca paipajca allimi llujshinga. Pai munashcatami ruranga. C'ari c'aricunatapish chingachingami. Diospajlla cajcunatapish chingachingami.

²⁵ Yachaj tucushca cashcamanta, ashtahuan ashtahuanmi umashpa catinga. Paipaj shungupica, yallitaj jatun cashcatami yuyanga. Cungaillapimi achcacunata chingachinga. Tucui mandajcunata Mandajhuanpish macanacungapajmi jataringa. Shina cashpapish gentecuna huañuchishca mana cashca cashpapish, chingachishcami canga.

²⁶ Muscuipi shina chishicunapi tutamantacunapi canman ricuchishcaca, chashnatajmi tucunga. Muscuipi shina ricushcataca ama huillashpa huaquichilla. Chaicunaca uni huatacuna q'uipami pajtanga” nircami.

²⁷ Chai q'uipaca Daniel ñucaca, tucui aicha ñuturishca shina saquirishpami, achca punllacunata ungushca carcani. Chaimanta jatarishpaca jatun mandajpajta imata ruracushcallatatajmi rurashpa catircani. Ashtahuanpish muscuipi shina ricushcata yuyarishpaca, manchaihuanmi carcani. Chaitaca mana entendircanichu.