DANIEL 5 - Dios Rimashca Shimicunami

Shuj quillca pata quinripi ricurishcami

¹ Jatun mandaj Belsasarca pai churashca huaranga mandajcunahuan jatun micuita rurashpami, chai huaranga mandajcunahuan vinota ubyacurca.

² Belsasarca vinohuan machashpami, Jerusalenpi caj Diospaj huasimanta paipaj yaya Nabucodonosor apamushca curi vasocunata, cullqui vasocunata apamuchun mandarca. Pai jatun mandajpish, pai churashca mandajcunapish, paipaj huarmicunapish, paipaj caishuj huarmicunahuanpish chai vasocunapi ubyangapajmi apaj cacharca.

³ Jerusalenpi cashca Diospaj huasimanta apamushca curi vasocunata ña apamujpica, jatun mandajpish, pai churashca mandajcunapish, paipaj huarmicunapish, paipaj caishuj huarmicunapishmi chai vasocunapi ubyarcacuna.

⁴ Vinota ubyashpaca, curimanta, cullquimanta, broncemanta, fierromanta, caspimanta, rumimanta rurashca dioscunatami adoracurcacuna.

⁵ Chaipimi candelero tiyacun chaipi shuj c'aripaj maqui ricurishpa, mandana huasi pata quinrita calhuan yurajyachishcapi dedocunahuan quillcacuj ricurirca. Chai maqui quillcacujta jatun mandaj ricushpaca,

⁶ quillu quillu ñahui tucushpami, paipaj yuyaicuna musparirca. Chashna irquiyashpami cintura tullucunapish, sanpi tullucunapish caishuj chaishuj huajtaricurca.

⁷ Jatun mandajca sinchita caparishpami jatun yachajcunatapish, caldeocunatapish, adivinocunatapish paipajman pushamuchishpa Babiloniapaj jatun yachajcunataca cashna nirca: –Maijanpish chai quillcata rezashpa chai imata nisha nishcata huillajmanca morado sumaj churanatami churachisha, cungapipish shuj curi huallcatami apachisha. Ñuca mandacunpipish, ñuca churashca mandajpaj q'uipa mandaj cachunmi churasha– nircami.

⁸ Jatun mandajpaj adivinajcuna tucuicuna paipajman yaicushpaca, chai quillcataca mana rezai tucurcacunachu, chai imata nisha nishcatapish mana huillai tucurcacunachu.

⁹ Chaipicarin jatun mandaj Belsasarca, ashtahuan ñahui quilluyashpami yallitaj musparirca. Pai churashca mandajcunapish ñahuicuna pucayashpa imata mana ni tucurcacunachu.

¹⁰ Jatun mandajpish, pai churashca mandajcunapish sinchita rimanacucujta uyashpami, jatun mandajpaj huarmica paicuna jatun micuita micucun ucuman yaicushpa cashna nirca: –¡Jatun mandajlla, cambaj causaica huiñaita cashca cachun! Cambaj yuyaipi caita chaita yuyashpa ama musparichu. Cambaj ñahuipish ama shujtajyaricuichu.

¹¹ Can mandacun llajtallapitajmari shuj runa tiyan. Paipica jucha illaj dioscunapaj espiritumari causan. Cambaj yaya mandacui punllacunapimi paipica yachaisapa dioscunapi shinallataj luz tiyashcata, alli yuyaiyuj cashcata, yachaisapa cashcata japircanchij. Jatun mandajlla, jatun mandaj Nabucodonosor cambaj yayaca paitamari jatun yachajcunata, luzerocunamanta yachajcunata, caldeocunata, adivinocunata mandaj cachun churarca.

¹² Paipimi ima mana yachaipajtapish yachajlla yuyaita charij cashcata, imatapish yachaj, alli entendij, imata muscushcatapish, chai imata nisha nishcatapish, pi mana huillai tucushcatapish, caita chaita yuyacushcatapish imamanta chashnacushcata chaitataj huillaj cashcata japirca. Paica Danielmi. Paitami jatun mandajca Beltsasar shutita shutichirca. Cunanca chai Danielta cayamuchun mandai. Paimi chai quillca imata nisha nishcataca huillanga– nirca.

¹³ Danielta jatun mandajpajman pushamujpimi, jatun mandajca Danieltaca cashna nirca: –¿Canchu Judá llajtamanta ñuca yaya prezu apamushcacunapura Daniel cangui?

¹⁴ Canpica jucha illaj dioscunapaj espíritu tiyan nijtami uyani. Canpica luz tiyan nijta, imatapish alli entendij nijta, yallitaj yachaisapa caj nijtami uyani.

¹⁵ Cai quillcata rezashpa, chai imata nisha nishcata huillachunmari ñucapajmanca jatun yachajcunata, luzerocunamanta yachajcunata pushamurcacuna. Ashtahuanpish paicunaca chai imata nisha nishcataca mana huillai tucurcacunachu.

¹⁶ Ñucaca cantaca imatapish ricushpa chai imata nisha nishcatapish, pi mana huillai tucushcatapish huillajlla cashcatami uyarcani. Cunan cai quillcata rezashpa, chai imata nisha nishcata huillajpica, morado sumaj churanatami churachishca cangui. Cambaj cungapipish shuj curi huallcatami apachishca cangui. Ñuca mandacunpipish, ñuca churashca mandajpaj q'uipa mandaj cachunmi churasha– nircami.

¹⁷ Shina nijpimi Danielca jatun mandajtaca: –Can ñucaman cusha nishcacunapish cambajllataj cachunlla. Ñucata jatun canapi churasha nishcapipish shujtajcunata churailla. Ñucaca chai quillcataca rezashallami. Chai imata nisha nishcatapish huillashallami.

¹⁸ Jatun mandajlla, jahua pacha Taita Diosmari cambaj yaya Nabucodonosormanca mandanatapish, jatun canatapish, alli nishca canatapish, tucuita mandaj canatapish curca.

¹⁹ Jatun canata cushcamantami tucui gentecunapish, llajtacunapish, ch'ican ch'ican rimaita rimajcunapish paipaj ñaupajpica manchaihuan chujchujcuna carca. Paica maijanta huañuchisha nishpaca, huañuchircallami. Maijanta causachun saquisha nishpaca causachun saquircallami. Jatun canapi maijanta churasha nishpaca, churarcallami. Maijanta cumurichisha nishpaca cumurichircallami.

²⁰ Ashtahuanpish paipaj shungupica yallitaj jatun cashcata yuyashpa, chai jatun cashcapi rumi shungu tucushpa millai tucujpimi, pai mandanatapish quichushpa pai jatun tucushca cashcatapish yallitaj yangapi churarca.

²¹ Gentecunapuramanta anchuchishcami carca. Paipaj yuyaitaca animalcunapaj yuyaita shinami rurarca. Sacha burrocunahuanmi causarca. Huagraman shinami q'uihuata cararca. Paipaj cuerpopish jahua pacha garhuahuanmi shutujyarca. Runacuna mandacun jahuapica jahua pacha Taita Dios mandacushcata, mandaj cachunca Taita Dios pita pai churasha nishcata churaj cashcata yachangacamami chashna rurarca.

²² Nabucodonosorpaj churi Belsasar, canpish tucui chaicunata yachashca jahuamari Taita Diospaj ñaupajpica mana cumurij shungu cangui.

²³ Ashtahuanpish jahua pacha Jatun Diosta c'ariyashpa jatun tucushpami, paipaj huasimanta apamushca vasocunata cambaj ñaupajman apaj cachashpa, canpish can churashca mandajcunapish, cambaj huarmicunapish, cambaj caishuj huarmicunapish chaipi vinota ubyashcanguichij. Chashna rurashca jahuapish cullquimanta, curimanta, broncemanta, fierromanta, caspimanta, rumimanta rurashca mana ricuj, mana uyaj, mana imata yachaj dioscunatamari alabangui. Ashtahuanpish cambaj causaita paipaj maquipi charicuj, pai munashpalla can imatapish rurachun saquij Taita Diostaca manamari shuj cutinllapish alabanguichu.

²⁴ Chaimi pai cachajpi chai maqui ricurishpa cai shimicunata quillcashca.

²⁵ Chai quillcapica: MENE, MENE, TEKEL, UPARSIN nishcami tiyacun.

²⁶ Chai imata nisha nishcaca caimi: “MENE” nishca shimica: Taita Diosca can mandacushcata ricushpa ña caicamalla mandachun nishcatami ricuchin.

²⁷ TEKEL nishca shimica: Canta balanzapi pizajpica, achca illajta pizashcami ricurishcangui.

²⁸ PERES nishca shimica: Can mandacuntaca chaupishpa, medocunaman, persacunaman cuna cashcatami ricuchin– nircami.

²⁹ Shina nijpimi Belsasarca, Danielmanca morado churanata churachishpa, shuj curi huallcata cungapi apachishpa, pai churashca mandajpaj q'uipa mandajmi nishpa tucuicunaman huillachun mandarca.

³⁰ Caldeocunata jatun mandaj Belsasartaca, chai tutallatajmi huañuchirca.

³¹ Pai mandanataca Media llajtamanta caj Dariomi japirca. Paica sujta chunga ishqui huatayujmi carca.