Colosenses 4 - Dios Rimashca Shimicunami

¹ Amocuna, cancunapish jahua pachapi, shuj Amota charishcata yachashcamanta, cancunapajta rurajcunapajca imapipish cashcata allita ruraichij.

² Diosta mañanataca ama cungarishpa, chai yuyailla pagui nicuichijlla.

³ Cristopaj pi mana yachashcata ñucanchij huillangapaj Mandaj Jesusllataj punguta pascachun ñucanchijmantapish Taita Diosta mañapaichij. Chashna huillacushcamantami prezu cani.

⁴ Ima shina cashcatataj huillangapaj ñucamanta mañaichij.

⁵ Yachaj cashcamanta, mana crijcunahuanca alli caichij. Paicunaman huillanalla cajpica huillaichijlla.

⁶ Cancunapaj rimaicunaca cachihuan mishquichishca shina uyananqui cachun. Chashna cashpami pimanpish jahualla imata cutichina cashcataca yachanguichij.

⁷ Diospajta rurashpa pajtachij, ñucahuan Mandaj Jesuspajta ruraj, c'uyashca huauqui Tiquicomi, tucui ñuca ima shina cashcataca cancunaman alli huillanga.

⁸ Ñucanchij ima shina cashcata huillashpa, cancunata cushichichunllatajmi cancunapajman cacharcani.

⁹ Cancunapuramanta caj tucui imatapish alli ruraj c'uyashca huauqui Onesimomi paihuanca shamun. Tucui caipi ima shinalla tucucushcataca paicunami alli huillanga.

¹⁰ Prezupi ñucahuan caj Aristarco, Bernabepaj sobrino Marcospish alli cashca cachun nincunami. Marcos yachachishcacunataca chasquishcami carcanguichij. Paipish ricunaman rijpica chasquipanguichij.

¹¹ Justo nishca Jesús shuti huauquipish, cancunataca alli cashca cachun ninmi. Paicunallami circuncisionta rurachishcapuramantaca, Dios mandacunpi ñucataca ayudacuncuna. Paicunaca ñucata achcata cushichijcunapishmi.

¹² Cancunapuramanta Cristopajta ruraj Epafraspish, alli cashca cachun ninmi. Paica cancuna tucuipi Taita Dios munashca shina pajtachijcuna, allicunataj, sinchicuna cachunmi Diosta pai mañanapica, mana shaicushpa rogacunlla.

¹³ Cancunamantapish, Laodiceapi, Hierapolispi cajcunamantapish pai yallitaj sustarij cashcataca, ñucataj ricushpami huillani.

¹⁴ C'uyashca jambij doctor Lucaspish Demaspish, cancunataca alli cashca cachun nincunami.

¹⁵ Laodiceapi caj huauquicunata, Ninfasta, paipaj huasipi tandanacushca crijcunatapish alli cashca cachun ninmi nipanguichij.

¹⁶ Cai quillcata cancuna ña rezashca q'uipaca, Laodiceapi tandanacushca crijcunapish caicunata rezachun chaiman cachanguichij. Shinallataj caishuj quillca Laodiceamanta chayamujpica, cancunapish rezanguichij.

¹⁷ Arquipomanpish: “Riqui, Taita Diospajta ruranata Mandaj Jesús cushcata chasquishcataca pajtachingui ninmi” nichij.

¹⁸ Cancuna alli cashca cachun nishpaca, Pablomi ñuca quiquin maquihuantaj quillcani. Ñuca prezu cashcatapish ama cungaringuichijchu. Mana c'uyaipajta c'uyaj canaca cancunahuan cashca cachun. Chashna cachun.