Colosenses 2 - Dios Rimashca Shimicunami

¹ Cancunamanta jatun macanacuita ñuca charishcata yachachunmi munani. Laodiceapi cajcunamantapish, ñahui ñahui ñucata mana ricuj tucuicunamantapishmi macanacucuni.

² Paicunapaj shungucunapi cushicuchun, c'uyaipi shujlla cashpa alli entendij canata charij canaman chayachunmi macanacucuni. Chashna cashpami Dios Yayamanta, pi mana yachashca pacalla cajca Cristo cashcata alli yachangacuna.

³ Yachaisapa canahuan, yuyaisapa canahuan charij canaca Cristopimi pacashca tiyacun.

⁴ Caitaca catinanqui shimicunahuan huillaj tucushpa cancunata pipish ama umachunmi chashnaca nini.

⁵ Cuerpondij cancunahuan mana cashpapish, espiritupica cancunahuanmi cani. Cristota crishcapica mana maipish cachun, alli sinchitaj cajta ricushpami yallitaj cushicuni.

⁶ Chaimanta ima shinami Mandaj Jesucristota chasquircanguichij, chai shinallataj paihuan shuj shinalla purichij.

⁷ Cristopi sapiyachishca, paipaj jahuapi huasichicuncunami canguichij. Ima shina yachachishca cashca shinallataj, crinapi sinchi caichij, Diosta pagui nicujllacuna caichij.

Cristohuan shujlla cajcunaca mushuj causaihuan jundami nishcami

⁸ Riquichij yanga yachaicunahuan, ñaupamanta runacuna apamushca chushaj yuyaicunahuan, manapish Cristopaj caj, cai pacha yuyaicunahuanca pipish cancunataca ama umachun.

⁹ Dios tucui ima shina cashcaca, Cristopaj cuerpopimi causan.

¹⁰ Cancunapish Cristohuan shujlla cashcamantaca, tucui pai ima shina cashcatami charinguichij. Paica tucui punta mandajcunapaj, poderyujcunapaj umami.

¹¹ Cancunaca paipimi circuncisionta rurashcacuna canguichij. Chai circuncisionca mana runacunapaj maquihuan rurashcachu. Ashtahuanpish Cristollatajmi circuncisionta rurarca. Chaimantami cancunapaj juchata ruranamantaca anchuchishcacuna canguichij.

¹² Cancunaca Cristopaj bautizmopimi, paihuan pambashca carcanguichij. Huañushcacunapaj chaupimanta Diospaj poderhuan causachishcata crishcamantami, paihuan causarircanguichij.

¹³ Cancunaca juchamantapish, aichapi mana circuncisionta rurachishcamantapish huañushcami carcanguichij. Chashna cajpipish, tucui juchacunata perdonashpami, Cristohuan shujllata rurashpa causachirca.

¹⁴ Quillcashca mandashcatami ñucanchijca mana pajtachi tucurcanchij. Chaimantami debe cajpi quillcashca tiyacujta Cristota cruzpi clavashpa ñucanchij debetaca anchuchirca.

¹⁵ Cristota cruzpi chacatashpa, tucuita mishashpami punta mandajcunatapish, mandanata charijcunatapish anchuchishpa tucuicunata paipaj ñaupajpi cumurichirca.

¹⁶ Chaimanta cancunataca ima micunamanta, ima ubyanamanta, fiesta punllacunamanta, llullu luna punllacunamanta, samana punllacunamantapish pi ama imata nishpa juchachichun.

¹⁷ Tucui chaicunaca, shamuna cashcata ricuchij llandumi. Ashtahuanpish chai shamujca Cristomi.

¹⁸ Mana jatun tucushca shinalla, angelcunata adorajcuna shina tucushpa cancuna japina cashcata ñataj pi umashpa quichunman. (Paicunaca manapish ricushpami muscuipi shina ricunchij nishpa) quiquin yuyaillamanta surcushpa jatun tucuncuna.

¹⁹ Paicunaca uma caj Cristohuanca mana shuj shinalla canchu. Ashtahuanpish Cristomari paipi cajcunataca mucucunahuan, angucunahuan shujllata rurashpa, carashpa, sinchiyachishpa, Dios cushcahuan huiñachicun.

²⁰ Cai pacha millai ruraicunata ama rurangapajca Cristohuan huañushcami canguichij. Chashna cashca jahuaca ¿ima nishpataj cai pachapaj cajcuna shinallataj chai mandashcacunata cazunguichij?

²¹ “Ama japingui” “Ama micungui” “Ama tuparingui” nishcacunataca ¿ima nishpataj cazucunguichijraj?

²² Chai mandashcacuna, yachachishcacunaca runacunallamantami, micujpi, ubyajpica tucurijllacunamantami yachachin.

²³ Chaicunaca yachajtajlla cangapaj, Diosta yuyaricujtajlla cangapaj, mana jatun tucushcatajlla cangapajca alli shinatajmari yuyachin. Chashna cashcamanta cuerpota llaquichirinapajllami. Ashtahuanpish aicha munaitaca mana jarcai tucunchu.