CANTARES 8 - Dios Rimashca Shimicunami

¹ ¡Ñuca quiquin turi shina cajpica, ñuca mamapaj chuchucunallatataj chuchushca cajpica, ñanpi tupashpapish cantaca muchaimanmi! Canta muchajta ricujcunaca ñucataca mana p'iñanmancunachu.

² Canta pushashpaca, ñuca mamapaj huasimanmi yaicuchiman. Canmi ñucata yachachinguiman, ñucaca vinotami canmanca ubyachiman. Shinallataj granadacunata capishca llullu asuatapishmi ubyachiman.

³ Paipaj lluqui rigrapica, ñucata saunachijpichari, paipaj alli rigrahuanca ugllahuajpichari.

C'ari cantashcami:

⁴ Jerusalenpi causaj solteracunalla, ñuca c'uyashcataca amataj rijchachipaichijchu. Maicamapish samaricuchun saquipaichijlla.

Tucuimanta yallica c'uyaimi alli Tucuicuna cantashcami:

⁵ ¿Paipaj c'uyashcapaj rigra jahuapi sirishpa, shitashca pambamanta huichiyacujca pi huarmitagari? Manzana yura ucupimari rijchachircani. Chaipimari cambaj mamataca, huachana nanai japirca. Chaipimari cambaj mamaca cantaca huacharca.

C'ari cantashcami: Huarmi cantashcami:

⁶ Cambaj shungupica, sellota shina churahuayari. Cambaj rigrapica, mana chingaripaj señalta shina churahuayari. C'uyaica, huañui shinallataj pi mana jarcai tucuipajmi. C'uyashpa llaquinacunaca, Seol shina mana cacharijmi. C'uyaica, carbonpi nina rupacuj shinamari.

⁷ Chai rupaj c'uyaitaca, achca yacucunapish manataj huañuchi tucunchu. C'uyaitaca jatun yacucunapish manataj millpui tucunchu. C'uyaitaca tucui imalla charishcacunahuan japisha nij runaca p'iñai tucunmanllami.

Tucuicuna cantashcami:

⁸ Chuchucunapish manaraj huiñashca uchilla ñañatamari charinchij. Maijanpish paita casarasha nijpica, ¿imashi tucushun?

⁹ Pirca patalla cajpica paipaj jahuapica, mandana huasitachari cullquihuan ruranchijman. Pungulla cajpica cedro caspicunahuanchari tapachishpa churanchijman.

Huarmi cantashcami:

¹⁰ Ñucaca pircashca pata shinamari cani. Ñuca chuchucunaca, torrecuna shinamari. Chaimantatajmari ñuca c'uyashcapaj ñahuipica sumaj ricurini.

¹¹ Salomonca, Baal-hamón llajtapica, uva chagratami charirca. Chai uva chagrataca, cuidajcunamanmi cuidachun mingarca. Tucuicunami huaranga cullquicunata apamuna carca.

¹² Ñuca uva chagrataca, ñucallatajmi cuidacuni. Salomonlla, huaranga cullquica cambajmi. Ishqui patsaj cullquica, uvata cuidajcunapajmi.

C'ari cantashcami:

¹³ Huerta chaupipi causaj huarmilla, can rimashcataca canhuan purijcunamari uyashca. Ñucamanpish can rimashcata uyachihuayari.

Huarmi cantashcami:

¹⁴ Ñuca c'uyashcalla, utca shamupailla. Canca corzo shina, malta taruga shina mishquiman ashnaj urcucunata callpashpa shamupailla.