CANTARES 6 - Dios Rimashca Shimicunami

Cusandij huarmindij c'uyanacushcamanta

¹ Sumaj huarmicunamanta yalli sumaj huarmilla, cambaj c'uyashcaca ¿maimantaj rircari? Cambaj c'uyashcaca ¿imamantataj shitashpa rircari? Canhuan mashcagrishun ninchijmari.

Huarmi cantashcami:

² Ñuca c'uyashcaca huertamanmi rirca. Mishquijllata ashnacuj eramanmi rirca. Paipaj canlla ovejacunata huertacunapi michinamanmi rirca. Lirio sisacunata tandanamanmi rirca.

³ Ñucaca ñuca c'uyashcapajmi cani. Ñuca c'uyashcaca ñucapajmi. Paica lirio sisacuna chaupipi michijmi.

C'ari cantashcami:

⁴ Ñuca c'uyashcalla, canca sumajmari cangui. Tirsa pueblo shina, Jerusalén shina munananquimari cangui. Catinacushpa manchachinaman shamuj soldadocuna shinamari cangui.

⁵ Cambaj ñahuicunahuan ñucata chaparanata saquihuai, ñami cambaj ñahuicunahuan ñucata chaparacushpalla mishangui. Cambaj ajchaca, Galaad urcu quinricunapi canlla chivocuna siricuj shinamari.

⁶ Cambaj quirucunaca rutushca, armachishca canlla ovejacuna yacumanta llujshicuj shina yurajllamari. Tucui ovejacuna ishqui ishqui huacharishca shinami, shujllapish mana illanchu.

⁷ Cambaj quijaduscunapish, ch'ungullishca ucupica, chaupishca granada shinami ricurin.

⁸ Sujta chunga jatun mandaj huarmicunami, pusaj chungaca caishuj huarmicunami, solteracunacarin mana yupai tucuipajmari.

⁹ Ashtahuanpish ñuca c'uyashca palomaca paillami. Ñuca c'uyashcaca, imapi mana pandajmi. Paipaj mamapajpish yallitaj c'uyashcamari. Paita huachaj mamaca, ugllashpami charirca. Shujtaj solteracuna paita ricushpaca, cushicuj huarmi nircacunami. Jatun mandaj huarmicunapish, caishuj huarmicunapish paitaca alabarcacunami.

Tucuicuna cantashcami:

¹⁰ ¿Tutamanta achijyacuj shinapish, sumaj luna shinapish, inti achij nicuj shinapish, catinacushpa manchachinaman shamucuj soldadocuna shinapish shamucuj huarmica pitagari?

Huarmi cantashcami:

¹¹ Pugru pambapi imalla p'ucushcata ricunamanmi, nogalcunata tarpushca huertamanmi rircani. Uva huiñacushcata, granadacuna sisacushcatami ricunaman rircani.

¹² Ñucaca manapish imata yuyashcapimi, ñapish Aminadabpaj carro jahuapi tiyarircani.

Tucuicuna cantashcami:

¹³ Tigramuilla, tigramuilla, sulamita. Tigramuilla tigramuilla, canta ricushun ninchijca. Sulamitataca, ¿imatataj ricushun ninguichigari? Ishquipi ch'icanchishca soldadocuna tandanacushpa, carpa huasicunata shayachishca shinatami ricushun ninchij.