CANTARES 4 - Dios Rimashca Shimicunami

Huarmita cusa alli nishcami C'ari cantashcami:

¹ Ñuca c'uyashcalla, canca sumajmari cangui, canca sumajmari cangui. Cambaj ñahui luluncunapish ajcha ucucunapica, paloma ñahui shinamari tiyacun. Cambaj ajchaca, Galaad llajtapi tiyaj urcu quinricunapi canlla chivocuna siricuj shinami ricurin.

² Cambaj quirucunaca rutushca armachishca canlla ovejacuna yacumanta llujshicuj shinami. Tucui ovejacuna ishqui ishqui huacharishca shinami. Shujllapish mana illanchu.

³ Cambaj shimica, pucajlla puchca shinami. Cambaj rimaipish, rijsinajllamari. Cambaj quijaduscunapish, ch'ungullishca ucupica, chaupishca granada shinami ricurin.

⁴ Cambaj cungaca, Davidpaj macanacunacunata huaquichingapaj rurashca torre shinamari. Huaranga escudocunatami chaipica huarcushca tiyacun. Tucui chaicunaca, c'ari c'ari soldadocunapaj escudocunami.

⁵ Cambaj chuchucunaca, ishqui huacharishca gacelacuna lirio sisacuna chaupipi micucuj shinamari.

⁶ Pacarishpa achijyangacamaca, mirra tiyan urcuman, incienso tiyan lomaman rishalla.

⁷ Ñuca c'uyashca huarmilla, canca chaqui puntamantaca umacamami sumaj cangui. Canpica ima mana alli mana tiyanchu.

⁸ Ñuca c'uyashca huarmilla, Líbano urcumantapacha jacu ñucahuan. Líbano urcumantapacha jacu ñucahuan. Amana urcu puntamanta, Senir urcu puntamanta, Hermón puntamanta ricuyari. Chaipica leoncuna causana jutcucunamari, leopardocuna causana urcucunamari.

⁹ Ñuca panilla, ñuca c'uyashca huarmiculla, cambaj ñahuihuan ricushpamari, ñuca shunguta aparcangui. Shuj ricuillapimari ñuca shungutaca shuhuarcangui, cambaj huallcata pallana puchcahuanmari huatashpa aparcangui.

¹⁰ ¡Ñuca panilla, ñuca c'uyashca huarmilla! ¡Cambaj c'uyaica tucuimanta yallimari! ¡Cambaj c'uyaica vinotapish yalli mishquimari! Can churarishca mishquijllata ashnaj jambicunaca tucuimanta yalli mishquijllata ashnajmari.

¹¹ Ñuca c'uyashca huarmilla, cambaj shimimantaca sacha chuspi huachashca mishqui llujshicuj shinamari. Cambaj c'allupica, sacha chuspi huachashca mishquipish, lechepishmari tiyan. Cambaj churanacunapish Líbano shinamari mishquiman ashnacun.

¹² Ñuca panilla, ñuca c'uyashca huarmiculla, huertata huichcashca shinamari cangui. Pugyu yacuta tapachishpa sellashca shinamari cangui.

¹³ Cambaj retoñocunaca, granada yuracunayuj huerta shinamari. Chai yurapi p'ucucuj grano shina mishquimari. Canca alheña sisacunahuan, nardocunahuan junda huerta shinamari cangui.

¹⁴ Canca nardo shina, azafrán shina, ashnajlla huiru shina, canela shina, incienso yuracuna shina, mirra shina, áloe shina, tucui laya mishquijllata ashnacuj shinapishmari cangui.

¹⁵ Huertacunapi llujshicuj yacu shinamari, Libanomanta uriyacuj yacu shinamari.

¹⁶ Aquilón huaira jatariyari. Austro huairapish shamuyari. Ñuca huertata p'ucupaichigari. Mishquijllata ashnacujcunata tsirapaichigari. Ñuca c'uyashcaca paipaj huertaman shamuchunlla, mishquijlla frutacunata micuchunlla.