CANTARES 1 - Dios Rimashca Shimicunami

Jerusalén huarmicunata cantanami

¹ Cai cantana shimicunaca jatun mandaj Salomón cantashca shimicunami.

Huarmi cantashcami:

² ¡Aij paipaj shimihuan ñucata muchajpichari! Cambaj c'uyaica vinotapish yallimari.

³ Mishquijllata ashnacujcunahuan churashca jahuapish, cambaj shutica mishquijllata ashnacuj jicharishca shinamari. Chaimantami solteracunaca canta c'uyan.

⁴ Ñucata pushahuayari, canhuan rishun ninchijca. Jatun mandajmi paipaj huasicunaman yaicuchirca, canhuanmari cushicushun. Cambaj c'uyaitaca vinotapish yalli cashcatami yuyarishun. Cantaca c'uyana cashcamantatajmi c'uyancuna.

⁵ Jerusalenpi causaj huarmicunalla, ñucaca yana cashpapish, Cedar llajtapi tiyaj carpa huasicunata shina, Salomonpaj linsocunata shina munananqui huarmimari cani.

⁶ Ñucataca intimi rupachirca. Shina cajpipish, yanami nishpa ama rimahuaichijchu. Ñuca mamapaj churicunallataj p'iñarishpami, ñucataca uva chagrata cuidachun churarcacuna. Chaimantami ñuca quiquin uva chagrataca mana cuidarcani.

⁷ Canca ñuca tucui almahuan c'uyashcamari cangui. ¿Maipitaj canlla ovejacunataca michicunguiyari? ¿Chaupi punlla tucujpica maipitaj samachingui? ¿Ima nishpataj canhuan apanacujcunapaj canlla ovejacunahuanca, chingarishca shinaca tandanacugrina caniyari?

Tucuicuna cantashcami:

⁸ Tucui huarmicunamanta yalli sumaj huarmilla. Can mana yachashpaca, canlla ovejacuna sarushcata catilla. Michijcunapaj chugllacuna c'uchupi cambaj malta huarmi chivocunata michigrilla.

Cusapish huarmita, huarmipish cusata cantashcami C'ari cantashcami:

⁹ Ñuca c'uyashcalla, cantaca faraonpaj carretata aisashpa purij sumaj yeguahuanmi ch'imbapurani.

¹⁰ Cambaj quijaduscunaca can aparishca zarcillo chaupipica sumajmari ricurin. Cungapipish sumaj huallcacunata aparishcamari cangui.

¹¹ Cambajca, curi zarcillocunatapish cullquihuan chagrushpami rurachishun.

Huarmi cantashcami:

¹² Sumaj tiyanapi jatun mandaj samaricujpica, ñuca nardoca mishquijllatami ashnacurca.

¹³ Ñuca c'uyashca, ñuca chuchu chaupipi huarcushca lutsaj mirra shinamari.

¹⁴ Ñuca c'uyashcaca, En-gadi pueblo c'uchupi tiyaj uva chaupicunapi huiñashca alheña sisa shinamari.

C'ari cantashcami:

¹⁵ Ñuca c'uyashcalla, quiquinca sumajmari cangui. Cambaj ñahui luluncunapish sumaj palomacuna shinamari.

Huarmi cantashcami:

¹⁶ Ñuca c'uyashcalla, canca sumajmari cangui. Canca mishquimari cangui. Ñucanchij camaca sisacunahuan mantashcami.

C'ari cantashcami:

¹⁷ Ñucanchij huasica cedro caspicunahuan, ciprés caspicunahuan rurashcami.