Apocalipsis 8 - Dios Rimashca Shimicunami

¹ Sujtapaj q'uipa sellashcata Oveja pascajpica, chaupi horas shinatami, jahua pachapica chulunlla tucurca.

² Chai q'uipaca, Diospaj ñaupajpi canchis angelcuna shayacujtami ricurcani. Paicunamanca canchis trompetacunatami curca.

³ Chai q'uipaca shujtaj angelmi altar ñaupajpi shayarirca. Paica inciensota rupachingapaj curimanta rurashcata apashcami carca. Chai altar jahuapi inciensota rupachishpa Diospajlla tucui cajcuna mañashcacunahuan mirarichunmi, achca inciensota paimanca curca. Chai altarca jatun tiyarina ñaupajpimi carca.

⁴ Chai inciensopaj cushnica, jucha illajcuna Diosta mañashcacunandijmi, angelpaj maqui charicunmanta Diospaj ñaupajman huichiyarca.

⁵ Chai angelca, incienso churanata japishpami altarpi rupacuj ninata jundachishpa, allpa pachaman shitarca. Chaimi c'ulun nishcacuna, huajiashcacuna, relámpa achij nishcacuna, allpa chujchushpa t'imburipish tiyarca.

Trompetacunapi tocashcami

⁶ Chai canchis angelcunaca, paicuna charicun canchis trompetacunapimi tocanalla tucurcacuna.

⁷ Punta ángel trompetapi tocajpica, rundupish, ninapish yahuarhuan chagrushcami carca. Chaita allpa pachaman shitajpica, quimsapi chaupishca shuj parte allpatami yuracunandij, tucui q'uihuacunandij rupachirca.

⁸ Puntapaj q'uipa ángel trompetapi tocajpica, shuj jatun urcu ninahuan rupacuj shinatami, mama cucha yacupi shitarca. Chaihuanca quimsapi chaupishca shuj parte mama cucha yacumi yahuar tucurca.

⁹ Chaipica quimsapi chaupishca shuj parte mama cuchapi caj causaiyujcunami huañurca. Shinallataj quimsapi chaupishca, shuj partepi caj barcocunapishmi ñuturishpa chingarirca.

¹⁰ Ishquipaj q'uipa ángel trompetapi tocajpica, shuj jatun luzeromi nina sindi lunyacuj shina cielomanta urmarca. Chaica, quimsapi chaupishca shuj parte jatun yacucunapi, yacu pugyucunapipishmi urmarca.

¹¹ Chai luzeroca, Ajenjo shutimi carca. Quimsapi chaupishca shuj partepi caj, yacucunaca jayajmi tucurca. Chai yacucuna jayaj tucushcamantaca, achca gentecunami huañurcacuna.

¹² Quimsapaj q'uipa ángel trompetapi tocajpica, quimsapi chaupishca shuj parte inti, quimsapi chaupishca shuj parte luna, quimsapi chaupishca shuj parte luzerocunatapishmi p'aquirca. Chaimantami tucui chaicunaca quimsapi chaupishca shuj parteca achijyachij illaj saquirirca. Chaimantami quimsapi chaupishca shuj parte punllapish, tutapish achijyachij illaj carca.

¹³ Chai q'uipaca, chaupi cielota shuj ángel volacujtami ricurcani. Paica: “¡Trompetapi tocanalla caj quimsa angelcuna tocajpicarin aij, aij, aij allpa pachapi causacujcunalla!” nishpa, sinchita caparijtami uyarcani.