Apocalipsis 7 - Dios Rimashca Shimicunami

144.000 Israelcunata sellashcami

¹ Chaicunapaj q'uipaca, cai pacha chuscu esquinapi, chuscu angelcuna shayacujtami ricurcani. Paicunaca cai pacha allpaman, mama cucha yacuman, yuracunamanpish ima huaira ama shamuchunmi huaira shamuna chuscu esquinapi jarcacurcacuna.

² Shinallataj causaj Diospaj sellota apashca shujtaj angelpish, inti llujshin ladomanta huichiyacujtami ricurcani. Paica, cai pachata, mama cuchata llaquichi tucunata charij caishuj chuscu angelcunatami sinchita caparishpa,

³ cashna nirca: “Ñucanchij Diospajta rurajcunata frentepi sellota churangacama, cai pachatapish, mama cucha yacutapish, yuracunatapish ama ima llaquita ruraichijchu” nircami.

⁴ Chai sellashcacuna mashna cashcatapishmi uyarcani. Paicunaca: Israelpaj huahua huahua aillucunaca 144.000 sellashcacunami carca.

⁵ Judapaj aillumantaca 12.000mi sellashca carca. Rubenpaj aillumantapish 12.000mi sellashca carca. Gadpaj aillumantapish 12.000mi sellashca carca.

⁶ Aserpaj aillumantapish 12.000mi sellashca carca. Neftalipaj aillumantapish 12.000mi sellashca carca. Manasespaj aillumantapish 12.000mi sellashca carca.

⁷ Simeonpaj aillumantapish 12.000mi sellashca carca. Levipaj aillumantapish 12.000mi sellashca carca. Isacarpaj aillumantapish 12.000mi sellashca carca.

⁸ Zabulonpaj aillumantapish 12.000mi sellashca carca. Josepaj aillumantapish 12.000mi sellashca carca. Benjaminpaj aillumantapish 12.000mi sellashcacuna carca.

Yuraj churanacunata churashca achcacunata ricushcami

⁹ Chaita ricushca q'uipaca, pi mana yupaipaj yallitaj achcacunatami ricurcani. Paicunaca tucui llajtacunamanta, ch'ican ch'ican aillucunamanta, ch'ican ch'ican pueblocunamanta, ch'ican ch'ican rimaicunamantami jatun tiyarinapi tiyacujpaj ñaupajpi, Ovejapaj ñaupajpipish shayacurcacuna. Paicunaca yuraj churanacunata churashca, maquicunapipish ramacunata aisashcami carca.

¹⁰ Paicunaca: “¡Jatun tiyarinapi tiyacuj ñucanchij Diospish, Ovejapish paicunallami quishpichijca!” nishpami sinchita caparircacuna.

¹¹ Jatun tiyarinapaj, ancianocunapaj, causaiyuj chuscupaj, muyundijpimi tucui angelcuna shayacurcacuna. Paicunaca jatun tiyarinapi tiyacuj Diostami cungurishpa cumurishpa adorashpaca,

¹² cashna nircacuna: “¡Chashna cachun nishca canapish! Allimari cangui nishca canapish, sumajmari cangui nishca canapish, yachajmari cangui nishca canapish, pagui nishca canapish, alli nishca canapish, tucui imatapish jahualla rurai tucuj nishca canapish ñucanchij Diospajca huiñai huiñaita cachun. ¡Chashna cachun!” nircacunami.

¹³ Chaimi ancianocunamanta shujca: “Chai yurajlla churanacunata churashcacunaca ¿picunataj, maimantataj shamushcacuna?” nirca.

¹⁴ Chaimi ñucaca: “Jatun Dios, canmari yachangui” nijpi, paica: “Paicunaca jatunta llaquichicunmanta llujshimujcunami. Paicunaca churanacunata Ovejapaj yahuarpi tajshashpa yurajllata rurajcunami” nircami.

¹⁵ Chaimantami paicunaca jatun tiyarinapi tiyacuj Diospaj ñaupajpi punllapish, tutapish Diospaj huasipi paipajta ruran. Chai jatun tiyarinapi tiyacujmi, paicunata huaquichingapajca paipaj carpa huasita ashtahuan cacharinga.

¹⁶ “Paicunaca ña mana yaricachingachu, ña mana yacunachingachu. Intipish paicunataca mana rupachingachu, t'itaipish mana tiyangachu.

¹⁷ Jatun tiyarina chaupipi caj, Ovejami paicunataca michinga. Causaita cuj yacu llujshicunmanmi pushanga. Diosmi paicunapaj ñahuicunamantaca, tucui huiquita p'ichanga” nircami.