Apocalipsis 5 - Dios Rimashca Shimicunami

Pillushca quillcana caramantapish, malta Ovejamantapish

¹ Chai jatun tiyarinapi tiyacujpaj alli maquipica, ucupish, jahuapish quillcashca shuj librotami ricurcani. Chai libroca canchis sellohuan sellashcami carca.

² Imatapish rurai tucuj shuj angeltami ricurcani. Paica: “¿Pitaj chai librota pascaipaj sellashcacunatapish anchuchi tucuipajtajca cangari?” nishpami caparishpa tapurca.

³ Ashtahuanpish jahua pachapi, cai pachapi, allpa ucupi cajcunapish chai librota pascaipajca pi mana tiyarcachu. Chaipi ima cashcata ricungapajpish pi mana tiyarcachu.

⁴ Chai librota pascaipaj, ricuipajllapish pi mana tiyajpimi, ñucaca achcata huacarcani.

⁵ Chaimi ancianocunamanta shujca: “Ama huacaichu, Judá aillumanta Leonmi, Davidpaj huahua huahuami chai librota pascangapaj, canchis sellohuan sellashcacunata anchuchingapajca ña tucuita mishashca” nircami.

⁶ Jatun tiyarinapaj chaupipi, causaiyuj chuscucunapaj chaupipi, ancianocunapaj chaupipica shuj Oveja shayacujtami ñucaca ricurcani. Chai Ovejaca huañuchishca caj Ovejallatajmi carca. Chaica canchis gachuta, canchis ñahui luluncunatami charirca. Chai canchis ñahui luluncunaca tucui cai pachaman cachashca Diospaj canchis Espiritucunami.

⁷ Chai Oveja shamushpami, jatun tiyarinapi tiyacujpaj alli maquimanta librotaca japirca.

⁸ Librota ña japijpica, causaiyuj chuscucuna, ishqui chunga chuscu ancianocunapishmi, Ovejapaj ñaupajpi cungurircacuna. Chai ancianocunaca tucuicunami arpacunata, inciensohuan junda curi copacunatapish charicurcacuna. Chai inciensoca jucha illajcuna Diosta mañashcacunami.

⁹ Chai ancianocunaca shuj mushuj cantotami cashna cantarcacuna: “Canllamari librota japingapaj, sellashcacunata anchuchingapajtaj cangui. Canca huañurcanguimi. Tucui aillucunata, ch'ican ch'ican rimaicunata, pueblocunata, tucui llajtacunatapishmi cambaj yahuarhuan cutinllataj Diospajlla cachun randircangui.

¹⁰ Chashnami ñucanchij Dios mandana llajta cachun, paipajta ruraj curacuna cachun ñucanchijtaca rurashcangui. Chaimantami cai pachataca mandashun” nishpami cantarcacuna.

¹¹ Chai q'uipaca, jatun tiyarinapaj, causaiyujcunapaj, ancianocunapaj muyundijpica, achca angelcuna rimashcatami uyarcani. Paicunaca, mana yupaipaj huaranga huarangacunami,

¹² cashna nishpa shinchita caparircacuna: “Tucuita rurai tucuj nishca canata, tucuita charij nishca canata, yachaisapa nishca canata, imatapish rurai tucujmi nishca canata, alli nishca canata, jatunyachishca canata, alabashca canatapish chai huañuchishca caj Ovejallami japipajca can” nishpami caparircacuna.

¹³ “Jatun tiyarinapi tiyacujtapish, Ovejatapish, huiñai huiñaita alabashca cachun, alli nishca cachun, jatunyachishca cachun, Tucuita rurai tucujmi nishca cachun” nicujtami uyarcani. Dios rurashca tucuicunami, jahua pachapi cajcunapish, cai pachapi cajcunapish, allpa ucupi cajcunapish, mama cuchapi cajcunapish, tucuicuna chashna nishpa alabarcacuna.

¹⁴ Chaipica chai causaiyuj chuscucunapish: “¡Chashnataj cachun!” nijpica ishqui chunga chuscu ancianocunapish cungurishpa cumurishpami, huiñai huiñaita causacujta adorarcacuna.