Apocalipsis 21 - Dios Rimashca Shimicunami

Cielopish allpa pachapish mushuj cashcami

¹ Chaipica, ñaupa cielopish ñaupa allpa pachapish, mama cuchapish ña mana tiyarcachu. Chaimanta mushuj cielota mushuj allpa pachatami ricurcani.

² Ñucaca Juanmi cani. Diospaj cielomanta mushuj Jerusalén Diospajlla caj pueblo uriyacujtami ricurcani. Paica cusata japingapaj sumajta allichirishca novia shinami carca.

³ Cielomanta cashna nishpa sinchita caparijtami uyarcani: “Diospaj carpa huasica cunanca tucui gentecunahuanmi. Paicunahuanmi causanga paicunaca Diospaj huahuacunami canga. Paicunapaj Diostaj cashcamantaca, paitajmi paicunahuan canga.

⁴ Diosca paicunapaj ñahuicunamantaca, tucui huiquitami p'ichanga. Ñaupa tucui imalla tiyajcunaca, ña mana tiyashcamanta huañuipish, huacaipish, llaquipish, nanaipish ña mana ashtahuan tiyangachu” nircami.

⁵ Chai q'uipaca jatun tiyarinapi tiyacujmi cashna nirca: “Riqui, ñucaca tucui ima tiyajtami mushujta rurani. Cashnapishmi nirca. Caicunaca ima shina cana cashca shinataj pajtana mana llulla shimicunami. Chaita quillcai” nircami.

⁶ Chai q'uipaca cashnapishmi nirca: “Ñami tucuita rurani. Ñucaca callari A, tucuri Z shina callarichijpish, tucurichijpishmi cani. Maijanpish yacunachijmanca, causaita cuj yacu llujshicujtami ubyachun convidashpalla cusha.

⁷ Maijanpish mishajca, tucui ima japina cashcatami japinga. Ñucaca paipaj Diosmi casha, paipish ñuca huahuami canga.

⁸ Shina cajpipish manchajcunaca, mana crijcunaca, millashcacunaca, huañuchijcunaca, apanacushpalla causajcunaca, brujocunaca, rurashcalla dioscunata adorajcunaca, tucui llullajcunapish paicuna japina cashcataca azufrehuan rupacuj nina cuchatami japingacuna. Chaica q'uipa huañuimi” nircami.

Mushuj Jerusalenmi

⁹ Chaimantaca canchis angelcuna canchis copacuna junda, tucuri canchis llaquicunata charijcunapuramanta shuj angel shamushpaca: “Caiman shamui, Ovejahuan cazarana noviata ricuchisha” nircami.

¹⁰ Chashna nicujpi Diospaj Espiritumi ñucataca shuj jatun urcu jahuaman pusharca. Chaipimi Diospajlla caj Jerusalén jatun pueblota Diospaj cielomanta uriyacujta ricuchirca.

¹¹ Chai puebloca Diospaj sumaj cashcatami charirca. Paipaj lamyacuica, achca valij sumaj jaspe rumi shina, cristal shinami achijnicurca.

¹² Chai pueblo muyundij pircaca, jahuajta alto pircashcami carca. Chaipica chunga ishqui pungucunami tiyarca. Tucui pungupimi angelcunapish shuj shuj shayacurca. Israelpaj chunga ishqui churicunapaj huahua huahuacunapaj shuticunapish chaipimi quillcashca carca.

¹³ Quimsa punguca inti llujshin ladoman, quimsa punguca janaj ladoman, quimsa punguca ura ladoman, quimsa punguca inti huashicun ladomanmi carca.

¹⁴ Pueblo muyundijta pircashcaca chunga ishqui rumicuna jahuapimi carca. Chai chunga ishqui rumicunapica, Ovejapaj, chunga ishqui apostolcunapaj shuticunapishmi quillcashca carca.

¹⁵ Ñucahuan parlanacuj angelca pueblotapish pueblo muyundijta pircashcatapish pungucunatapish mashna cashcata midingapajmi curi varata charicurca.

¹⁶ Chai puebloca largomanpish anchomanpish altomanpish chuscundij ladocunami chai shinallataj carca. Charicushca varahuan angel midijpica, tucui ladocunami 2.200 kilometrocuna carca.

¹⁷ Pueblo muyundij pircatapish midijpica sujta chunga metromi carca. Angelca allpa pachapi mashna cashcata midijcuna midij shinallatajmi midirca.

¹⁸ Pueblo muyundijta pircaca jaspe sumaj rumihuan rurashcami carca. Pueblocarin mana chagrushca curihuan rurashcami carca. Mushuj vidrioman rijchajpishmi carca.

¹⁹ Pueblo muyundijpi caj pircata pircanapaj callaripi churashca rumicunaca shujtaj shujtaj sumaj rumicunata churashpa sumajyachishcami carca. Callaripi churashca punta rumica jaspe, q'uipaca zafiro, ishquipaj q'uipaca ágata, quimsapaj q'uipaca esmeralda,

²⁰ chuscupaj q'uipaca ónice, pichcapaj q'uipaca cornalina, sujtapaj q'uipaca crisólito, canchispaj q'uipaca berilo, pusajpaj q'uipaca topacio, iscunpaj q'uipaca crisopraso, chungapaj q'uipaca jacinto, chunga shujpaj q'uipaca amatista nishca rumicunami carca.

²¹ Chunga ishqui pungucunapish chunga ishqui perlacunami carca. Cada pungumi shuj perla carca. Shinallataj chai pueblopaj ñanpish imahuan mana chagrushca curihuan rurashcami carca. Vidrio shina caishuj ladoman ricunallami carca.

²² Chai pueblopica, Taita Diosta adorana huasitaca, maipi mana ricurcanichu. Tucuita Rurai Tucuj Mandaj Taita Dios, Ovejapishmi chai huasica.

²³ Dios sumaj cashcahuan achijyachijpi, Ovejapish paillataj achijyachij luz cashcamantaca intitapish lunatapish chai puebloca ña mana minishtinchu.

²⁴ Tucui llajtamanta caj quishpichishcacunami chai achijlla pueblopi puringacuna. Allpa pachapi jatun mandajcunami tucui imapish allicunataca chaiman apangacuna.

²⁵ Chaipica tuta mana tiyashcamanta, punllalla cashcamantami pungucunataca manataj huichcashca canga.

²⁶ Tucui llajtapi cajcunami paicunapaj llajtapi alli nishcacunata, sumaj nishcacunata chaiman apangacuna.

²⁷ Chaimanca ima mapa, millanayajta rurajcunapish, llullacunapish manataj yaicungacunachu. Ashtahuanpish causanaman rinata ricuchij Ovejapaj libropi shutita quillcashcacunallami chaimanca yaicungacuna.