Apocalipsis 20 - Dios Rimashca Shimicunami

Huaranga huatacunami

¹ Chai q'uipaca cielomanta shuj angeltami ucujta jutcupaj llavetapish jatun cadenatapish maquipi apashca uriyacujta ricurcani.

² Chai angelmi dragón nishca ñaupa culebra, diablo, Satanastaca japishpa huaranga huatapaj huatarca.

³ Chaipi huatashpaca tucui llajtacunapi causajcunata ama umachunmi huaranga huatacuna pajtangacama ucujta jutcupi huichcashpa, chai pungutaca sellashpa churarca. Huaranga huatacuna q'uipaca ashacama cacharishcami canga.

⁴ Chaipica jatun tiyarinacunatami ricurcani. Chaicunapica, imalla rurashcacunata ricuchichun Dios churashcacunami tiyacurcacuna. Shinallataj ima shina cashcatataj Jesusmanta huillashcamanta, Diospaj shimita huillashcamanta, jatun animaltapish, chai animalman rijchajta rurashcatapish mana adorashcamanta, shinallataj jatun animalpaj sellota maquipi cashpa frentepi cashpa, mana churachishcamantapish cungata p'itishpa huañuchishcacunapaj almacunatapishmi ricurcani. Paicunaca causarishpami, huaranga huatacunata Cristohuan mandarcacuna.

⁵ Shina cajpipish caishuj huañushcacunaca huaranga huatacuna pajtangacama mana causarircachu. Caica punta causarinami.

⁶ Punta causarinapi causarijcunaca Diospajlla cajcunami. Paicunaca alli nishcacuna cachun. Q'uipa huañuica, paicunataca imata mana rurai tucunchu. Ashtahuanpish paicunaca Diospajpish Cristopajpish curacunami cangacuna. Paicunaca Cristohuanmi huaranga huatacunacama mandangacuna.

⁷ Huaranga huatacuna pajtajpica, Satanasca prezu cashcamanta cacharishcami canga.

⁸ Ña cacharishca cashpaca, allpa pachapi causajcunataca tucui llajtacunatami umangapaj llujshinga. Paica Gog nishcapaj, Magog nishcapaj soldadocunatami macanacungapaj tandachinga. Chaicunaca mama cucha t'iyu allpa shina yallitaj achcacunami carca.

⁹ Chaicunaca pamba junda shamushpami, Diospajlla cajcunapaj llajtatapish Dios c'uyashca pueblotapish muyundijta shayarircacuna. Chashna shayarijpipish Diosca cielomanta ninata cachashpami, paicunataca tucui rupachirca.

¹⁰ Jatun animaltapish, llullashpa huillajtapish azufrehuan rupacuj nina cuchapimi shitarca. Chaillapitajmi umaj diablotapish shitarca. Chaipimi paicunaca punllapish, tutapish huiñai huiñaita jatunta llaquichishca cangacuna.

Tucuicuna imalla rurashcata yuraj jatun tiyarinapi tiyacuj ricuchishcami

¹¹ Chaimantaca yurajlla jatun tiyarinatapish chai jahuapi tiyacujtapishmi ricurcani. Paipaj ñaupajmantaca allpa pachapish cielopish tucuimi chingarirca. Cutinca ña manataj ricurircachu.

¹² Huañushcacunataca jatuncunatapish uchillacunatapish Diospaj ñaupajpi shayacujtami ricurcani. Librocunapish pascashcami carca. Causanaman rinapaj shujtaj libropish pascashcami carca. Huañushcacunaca paicuna ima shina cashcata librocunapi quillcashca shinallatajmi ricuchishca carca.

¹³ Mama cuchapish paipi caj huañushcacunata tigrachircami. Huañuipish, Hadespish paicunapi caj huañushcacunata tigrachircami. Paicunaca tucuicunami imallata rurashca shinallataj ricuchishca carca.

¹⁴ Chai q'uipaca huañuitapish, Hadestapish nina rupacuj cuchapimi shitashca carca. Chaica q'uipa huañuimi.

¹⁵ Causanaman rinapaj libropi mana quillcashca cajca nina rupacuj cuchapimi shitashca carca.