Apocalipsis 18 - Dios Rimashca Shimicunami

Babilonia jatun pueblo urmashcami

¹ Chai q'uipaca, cielomanta shujtaj ángel imatapish rurai tucunahuan uriyacujtami ricurcani. Chai angelca lamyacuj cashpami, allpa pachataca achijyachirca.

² Paica sinchita caparishpami, cashna nirca: “¡Babilonia jatun puebloca urmashcamari, urmashcamari! Supaicuna causanamari tucushca. Mapayachij tucui espiritucuna causana jutcumari tucushca. Millanayaj pajarocuna causana tazinmari tucushca.

³ Tucui llajtacunapi causajcunaca, machana vinota ubyaj shinami chai huarmihuan huainayashcacuna. Tucui jatun mandajcunapish chai huarmihuanmi huainayashpa causashcacuna. Chai huarmica chashna achcata charij cashcamantami allpa pachapi randishpa c'atushpa causajcunaca ima shinapish millaita rurashcahuan achcata charijyashcacuna” nircami.

⁴ Chai q'uipaca cielopica shujtaj cashna nishpa rimashcatami uyarcani: “¡Ñucapaj cajcunaca, paicunapaj juchacunapi ama chagruringapaj, paicuna shina ama llaquita apangapajca chai pueblomanta llujshichij!,

⁵ paicunapaj juchacunaca cielocamami chayashca. Paicuna millaita rurashcamantaca Diosca ñami yuyarishca.

⁶ Chai huarmimanca pai cushca shinallataj tigrachichij. Imalla rurashcamantaca chaupihuan yallita paimanca tigrachichij. Chagrushpa calizpi ubyachishcamantaca chaupihuan yallita chagrushpa paimancarin ubyachichij.

⁷ Pai jatun tucushpa munashcata rurashpa achcata cushicushpa causashca shinallataj jatunta llaquichichij, achcata huacachichij. Paica shungupica: Ñucaca jatun mandaj shinamari tiyacuni, ñucaca mana viudachu cani, ima llaquitapish mana charishachu” niricunmi.

⁸ Chashna niricujpipish shuj punllallapimi paitaca huañuipish, huacaipish, yaricaipish chashna jatun llaquicunaca japinga. Tucuita Rurai Tucuj Mandaj Taita Diosca, pai ima shinalla rurashcata ricuchishpami ninapi rupachinga.

⁹ Chai huarmihuan huainayashpa achcata cushicushpa causaj allpa pachapi jatun mandajcunapish, paita rupachishca cushni llujshicujta ricushpaca, jatunta llaquirishpami huacangacuna.

¹⁰ Chai llaquita manchashcamantaca caruman shayarishpami: “¡Aij, aij, tucuita mandaj jatun Babilonia pueblolla! Canta jatunta llaquichinaca cungaillapimari japishca” ningacunami.

¹¹ Shinallataj allpa pachapi randishpa c'atushpa purijcunaca, paicuna c'atungapaj apamushcata pi randij ña mana tiyajpimi, chai huarmimantaca jatunta llaquirishpa huacangacuna.

¹² Chai c'atunacunaca: Curi, cullqui, sumaj rumicuna, perlacuna, linomanta rurashca sumaj linsocuna, morado, seda linsocuna, pucanicuj linsocuna, mishquiman ashnacuj tucui laya caspicuna, marfilmanta rurashca tucui laya charinacuna, sumaj caspimanta rurashca tucui laya charinacuna, cobremanta, fierromanta, marmolmanta rurashcacunapishmi carca.

¹³ Shinallataj canelapish, tucui laya mishquiman ashnacujcunapish, inciensopish, mirrapish, olibanopish, vinopish, aceitepish, trigo cutapish, trigopishmi carca. Shinallataj jatun animalcunapish, ovejacunapish, caballocunapish, carretacunapish, c'atungapaj randishpa apashca gentecunapishmi carca.

¹⁴ Paicunaca chai pueblotaca: –Can munashpa mishquichishpa micunaca ñamari tucurishca. Sumaj charinacunahuan achcata charij canapish tucurishcamari. Cutinca manataj charijyanguichu– ningacunami.

¹⁵ Tucui chaicunata chai pueblopi c'atushpa randishpa achcata charijyajcunaca chai llaquita manchashcamantaca jatunta llaquirishpa huacashpa, caruman shayarishpami,

¹⁶ cashna ningacuna: “¡Aij, aij, jatun pueblolla, linomanta rurashca morado churanata, pucanicuj churanata churashcami carcangui. Curihuan, sumaj rumicunahuan, perlacunahuanpish sumajta allichirishcami carcangui!

¹⁷ Pai achcata charishcacunaca cungaillapimari ñapish tucui chingarishca” ningacunami. Shinallataj barcocunapi mandajcunapish, barcocunapi rijcunapish, barcocunata purichijcunapish, mama cucha yacupi trabajajcunapish tucuicuna carullaman shayarishpami,

¹⁸ chai jatun pueblo rupacuj cushnita ricushpaca: “Ima shujtaj pueblotaj chai jatun pueblo shinaca tiyarcari” nishpami caparircacuna.

¹⁹ Chashna nishpaca, paicunapaj uma jahuata allpata shitarishpa, jatunta llaquirishpa huacashpami: “¡Aij, aij, jatun pueblolla, paimantamari mama cuchapi barcocunata tucui charijcunaca achcata charijyarcacuna! ¡Cungaillapimari ñapish tucui chingachishca saquirishca! nircacunami.

²⁰ Chai pueblo chashna tucushcamantaca cielopi tucui tiyajcunapish, Diospajlla cajcunapish, apostolcunapish, profetacunapish cushicuichij. Cancunata llaquichishcamantaca Diosca paicuna ima shina rurashca shinallatajmi paicunatapish llaquichishca”.

²¹ Chai q'uipaca, imatapish rurai tucuj shuj angelmi, molino rumitajlla jatun rumita marcashpa mama cuchapi cashna nishpa shitarca: “Babilonia jatun pueblo, cashnami ucuman shitashca cangui. Chaimantaca cutinca manataj ricuringuichu.

²² Canpica arpapi tocashcacuna, flautapi tocashcacuna, trompetapi tocashcacunapish ña manataj ashtahuanca uyaringachu. Shinallataj tucui ima charinacunata rurajcunapish ña mana ashtahuan tiyangachu. Molinopi cutashcapish ña manataj uyaringachu.

²³ Canpica achijyachij lamparacunapish ña manataj tiyangachu. Novio, novia cushicushpa cantashcapish canpica ña manataj uyaringachu. Randishpa c'atushpa canpi causajcunaca, ñaupaca tucui llajtacunamanta yalli jatun tucushcacunami carca. Tucui llajtacunatami cambaj brujianahuan umarcangui.

²⁴ Shinallataj profetacunata, Diospajlla cajcunata, tucui allpa pachapi causajcunata huañuchishcacunapaj yahuarpish chai pueblopimi carca” nircami.