Apocalipsis 14 - Dios Rimashca Shimicunami

144.000cunalla cantashcami

¹ Chaita ricushca q'uipaca, Sión urcu jahuapi Oveja shayacujtami ricurcani. Paihuanca 144.000mi carca. Chaicunaca Ovejapaj shutitapish, paipaj Yayapaj shutitapish, frentepi quillcashcacunami carcacuna.

² Cielomantaca jatun yacucuna huajiashca shinata, jatunta c'ulun nicuj shina shuj rimashcatapishmi uyarcani. Chai rimashcaca, arpapi tocajcuna tocajpi paicunapaj arpacuna uyarij shinatami uyarcani.

³ Paicunaca, jatun tiyarina ñaupajpi, causaiyuj chuscupaj ñaupajpi, ancianocunapaj ñaupajpipishmi, shuj mushuj cantota cantarcacuna. Chai cantotaca, pi mana yachai tucurcacunachu. Ashtahuanpish allpa pachamanta Dios quishpichishca 144milcunallami, chai cantotaca yachai tucurcacuna.

⁴ Chai cantajcunaca, huarmicunapi mana mapayashca chuyacunami. Paicunaca Oveja maita rishcata catijcunami. Paicunaca cai pachapi causajcunapaj chaupimanta randishpa quishpichishcacunami carca. Diospajpish, Ovejapajpish punta p'ucushca grano shinami.

⁵ Paicunapica ima llullata mana japircachu. Diospaj jatun tiyarina ñaupajpica, paicunaca ima mapa illajcunami carca.

Quimsa angelcuna huillashcami

⁶ Chai q'uipaca, chaupi cielota shujtaj ángel volacujtami ricurcani. Paica allpapi causajcunamanca, tucui llajtacunaman, ch'ican ch'ican aillucunaman, ch'ican ch'ican rimaicunaman, tucui pueblocunamanpish huiñaipaj alli huillaita huillanapaj charicujtami ricurcani.

⁷ Chai angelca: “¡Diosta manchaichij, paitaca jatunmari cangui nichij. Imalla rurashcata Dios ricuchishpa llaquichinaca, ñamari chayamushca. Chaimanta cielota, allpa pachata, mama cucha yacuta, llujshicuj yacucunatapish rurajta adoraichij!” nishpami, sinchita caparirca.

⁸ Shujtaj angelpish: “Babilonia jatun puebloca, tucui llajtacunapi causajcunaman machana vinota ubyachij shina huainayachishcamantaca, paica urmashcamari, urmashcamari” nishpami caparishpa caticurca.

⁹ Shinallataj ishquipaj q'uipa angelpish cashna nishpami sinchita huillarca: “Animaltapish, chai animalman rijchajta rurashcatapish adoraj, sellota maquipi cashpa, frentepi cashpa chasquijca,

¹⁰ Dios p'iñarishpa cachashca jatun llaquitami, machana vinota ubyaj shina paipish apanga. Diosca pai p'iñarishca jatun llaquitaca, imahuan mana chagrushca vinota shinami copapi churarca. Diospajlla angelcunapaj ñaupajpipish, Ovejapaj ñaupajpipishmi azufrehuan rupacuj ninahuan paicunataca jatunta llaquichishca canga.

¹¹ Paicuna llaquita apacunmantaca, huiñai huiñaitami cushnica llujshicungalla. Animalta, paiman rijchajta rurashca animalta adorajcunapish, chai animalpaj shutita ricuchij sellota churachijcunapish tutapish, punllapish mana samashpami llaquitaca apacungalla” nircami.

¹² Chashna cana cashcamanta Diospajlla cajcunaca Dios mandashcata cazushpa, Jesusta crishpa catijcunaca mana p'iñarishpa caticunallami.

¹³ Chai q'uipaca, cielomanta cashna nishcatami uyarcani: “Mandaj Jesuspi shujlla cashpa huañushcacunaca, cunanmantapacha cushijllacunami. Diospaj Espiritupish cashnami nin: Ari, paicuna imallata llaquita apashpa ruracushcamantaca samaringacunami. Paicunapaj rurashcacunaca paicunahuanmi ringa ninmi nishcacunata quillcai” nircami.

Quirusapa hoceshuan cozichashcami

¹⁴ Chai q'uipa ricushpaca, shuj yuraj p'uyutami ricurcani. Chai p'uyu jahuapica, Runa Aichayujman rijchajmi tiyacurca. Paipaj umapica, curi coronata churashca, maquipica quirusapa shuj hocesta aisashcami carca.

¹⁵ Diospaj huasimanta shujtaj ángel llujshishpaca, p'uyu jahuapi tiyacujtaca: “¡Cozichanaca ñamari chayamushca, allpa pachapica granocunaca ñami cozichanalla, cambaj hoceshuan cuchui!” nishpami sinchita caparirca.

¹⁶ P'uyu jahuapi tiyacuj, paipaj hocesta allpa pachapi churajpica, allpa pachaca cozichashcami saquirirca.

¹⁷ Cielopi caj, Diospaj huasimantaca quirusapa shuj hocesta aisashca shujtaj angelmi llujshirca.

¹⁸ Shinallataj ninata mandanapaj poderta charij, shujtaj angelmi altarmanta llujshirca. Paica, quirusapa hocesta charicujtaca: “¡Allpa pachapica uvacunaca ñami p'ucushca. Cambaj quirusapa hoceshuan cuchui!” nishpami sinchita caparishpa cayarca.

¹⁹ Chaimi angelca, allpa pachapi p'ucushca uvacunataca paipaj hoceshuan cuchushpa, uvacunata capina jatun jutcupi capingapaj churarca. Chaica, Dios jatunta p'iñarishpa llaquichinami.

²⁰ Pueblomanta canllaman caj jutcupimi chai uvascunataca capirca. Uvascunata capicun jutcumantaca, caballocunapaj frenocamami, yahuarca pajtarca. Shinallataj chai muyundijtapish 300 kilometrocamami yahuarca rirca.