Apocalipsis 13 - Dios Rimashca Shimicunami

Manchanana ishqui animalcunata ricushcami

¹ Mama cucha c'uchu t'iyu allpapica dragón shayacujtami ricurcani. Chai q'uipaca mama cucha chaupimantaca canchis umacunayuj, chunga gachucunayuj animal llujshicujtami ricurcani: Chai gachucunapica, chunga coronacunatami churashca carca. Chai canchis umacunapica Diosta c'amishpa rimashca shutitami quillcashca carca.

² Ñuca ricushca animalca, leopardoman rijchajmi carca. Paipaj chaquicunaca, osopaj shinami carca. Paipaj shimica leonpaj shimi shinami carca. Dragonca chai animalmanca pai rurai tucunata, paipaj jatun tiyarinata, jatun mandaj canatapishmi curca.

³ Paipaj shuj umataca, huañunalla chugrihuan cajtami ricurcani. Ashtahuanpish chai chugrica alliyarcallami. Ña alliyajpica, allpa pachapi causajcunaca mancharishpami tucuicuna chai animalta catircacuna.

⁴ Paicunaca, animalman mandanata cuj dragonta, chai animaltapishmi: “Cai animal shinaca, pi mana tiyanchu. Paihuanca ¿pitaj macanacui tucungari?” nishpami adorarcacuna.

⁵ Paimanca, jatun tucushpa c'amishpa rimanata, chuscu chunga ishqui quillacunata mandai tucunatapishmi curca.

⁶ Chaimantami Diostapish, paipaj shutitapish, paipaj carpa huasitapish, cielopi causajcunatapish p'iñashpa c'amirca.

⁷ Paitaca Diospajlla cajcunahuan jatun macanacuita rurashpa, pai mishachunpishmi saquirca. Shinallataj ch'ican ch'ican aillucunata, tucui pueblocunata, tucui laya rimajcunata, tucui llajtacunatapish tucuita mandanatami curca.

⁸ Chai animaltaca cai pachata manaraj rurajpi paicunapaj shutita libropi mana quillcashca tucui cai pachapi causajcunami adorarcacuna. Chai libroca huañuchishca caj Ovejapaj libromi.

⁹ Maijanpish rinrinta charijca, caita uyaichij:

¹⁰ “Maijanpish prezu apashca cana cajca, prezu apashcami canga. Maijanpish espadahuan huañuna cajca, espadahuan huañuchishcami canga”. Chaimantami jucha illajcunaca, mana p'iñarij alli shungu, crij caticunalla.

¹¹ Chai q'uipaca, shujtaj animal allpamanta llujshicujtami ricurcani. Chaica, ovejapaj gachucunaman rijchaj ishqui gachutami charirca. Shina cashpapish dragón shinami rimarca.

¹² Paica, punta animal shinallataj mandaj cashcataca chai animalpaj ñaupajpimi mandashpa ricuchirca. Chaimi allpa pachatapish, chaipi causajcunatapish huañunalla chugrihuan cashpa alliyaj punta animalta adorachirca.

¹³ Jatun mancharinacunata rurashpami, cielomantaca allpa pachaman gentecuna ricucunpi ninata tamyachirca.

¹⁴ Punta animal jatun mancharinacunata rurai tucunata q'uipa animalman cujpimi, chaita rurashpa allpa pachapi causajcunataca umarca. Chaimantami q'uipa animalca allpa pachapi causajcunataca, espadahuan huañujta chugrichishca cashpapish causacuj animalman rijchajta ruraichij nirca.

¹⁵ Q'uipata ricurij animalmanca punta ricuj animalman rijchajta rurashcalla animalman causaita cuchunmi Diosca saquirca. Chai rurashcalla animalca ña rimashpaca paita tucui mana adorajcunataca huañuchichunmi mandarca.

¹⁶ Shinallataj uchillacunata, jatuncunata, charijcunata, huajchacunata, amopajta rurajcunata, amopajta mana rurajcunatapish tucuicunata alli lado maquipi cashpa, frentepi cashpapish, ricuna sellota churachunmi mandarca.

¹⁷ Chaimanta animalta ricuchij sellota cashpa, paipaj shutita cashpa, animalpaj shutipaj numerota cashpapish mana charijca, pi mana c'atui tucurcachu. Imata mana randi tucurcachu.

¹⁸ Cancuna yachaj cashpaca, caita yachai tucunguichijmi. Maijanpish alli entendij cashpaca, animalpaj numerota yupachun. Chai numeroca, 666mi. Chai numeroca shuj runapaj shutimi.