Apocalipsis 12 - Dios Rimashca Shimicunami

Huarmimantapish dragonmantapish

¹ Cielopica, mana ricushca shuj jatun mancharinami ricurirca: Intita churarishca shuj huarmimi, luna jahuapi shayacurca. Umapica chunga ishqui luzerocunamanta rurashca coronata churarishcami carca.

² Chai huarmica chichu cashpa huachana ña pajtashcamantami, huachana nanaihuan achca llaquita apashpa capariricurca.

³ Shinallataj cielopica mana ricushca shujtaj jatun mancharinami ricurirca: Puca nicuj jatun dragonmi canchis umacunayuj, chunga gachucunayuj ricurirca. Umacunapica, canchis coronacunata churashcami carca.

⁴ Chai dragonca, quimsapi chaupishca shuj parte luzerocunatami, cielomanta allpa pachaman paipaj chupahuan aisashpa shitarca. Chai dragonca huachanachicuj huarmipaj ñaupajpimi, huahua huacharinca huahuata millpungapaj shayarirca.

⁵ Chai huarmica, tucui llajtata fierro varahuan mandana caj shuj c'ari huahuatami huacharca. Chai huahuataca, Diospajmanpish, paipaj jatun tiyarinamanpishmi aparca.

⁶ Chai huarmica, shitashca pambapi Dios allichishcapi miticugrijpimi chaipica 1.260 punllacunacama Dios cuidashca carca.

⁷ Chai q'uipaca, cielopica jatun macanacuimi tiyarca: Miguelmi, paipaj angelcunandij, dragonhuan macanacucurca. Dragonpish, paipaj angelcunandijmi macanacucurca.

⁸ Macanacushpapish dragonca mana mishai tucurcachu. Chaimanta paicunaca cielopica, ña mana ashtahuan chayai tucurcachu.

⁹ Chashnami chai jatun dragontaca, cielomantaca ña shitarca. Paica ñaupa rucu culebrami. Paica diablo, Satanás shutipishmi. Paica, allpa pachapi causajcunata umajmi. Paitami tucui paipaj millai angelcunandij allpa pachaman shitarca.

¹⁰ Chai q'uipaca cielopica, sinchita cashna caparijtami uyarcani: “Diospaj ñaupajpi ñucanchij huauquicunata punllapish tutapish juchachijtaca cielomanta ñami shitashca. Chaimanta cunanmari quishpirinapish ñucanchij Diospaj mandanapish, pailla tucuita rurai tucuj canapish, Cristo mandai tucunapish ña chayamushca.

¹¹ Chai huauquicunaca, Ovejapaj yahuarhuan, paipaj shimita huillashcahuanmi diablotaca misharcacuna. Quiquin causaita mana llaquishpami huañuchingacama huillarcacuna.

¹² Chaimanta cielopish, chaipi causajcunapish cushicuichij. Ashtahuanpish allpapi causajcuna, mama cuchapi causajcunaca ¡aij imachari tucunguichij! Diabloca pai munashcata rurana punllacuna ashalla cashcata yachashpami, jatunta p'iñarishpa cancunapajman uriyashca nijtami uyarcani” nircami.

¹³ Dragonca paita allpa pachaman ña shitashca cashcata ricushpaca, c'ari huahuata huachaj huarmitami p'iñashpa catirca.

¹⁴ Chaimantami chai huarmimanca, shitashca pambaman culebrapaj ñaupajmanta jatarishpa richun, jatun aguilapaj ishqui alasta curca. Chaipimi quimsa huata chaupicama Dios cuidashca carashca causarca.

¹⁵ Chaipimi culebraca, chai huarmita yacu apachun, paipaj shimimanta jatun yacu shinata shitarca.

¹⁶ Chashna rurajpipish, dragonpaj shimimanta shitashca jatun yacutaca allpa chaupirishpa tucui millpushpami, chai huarmitaca quishpichirca.

¹⁷ Chashna rurajpimi, dragonca chai huarmihuan ashtahuan p'iñarishpa chai huarmipaj saquirishca huahua huahuacunahuan jatunta macanacugrirca. Paicunaca, Dios mandashcata alli cazujcunami. Jesucristomanta huillashcatapish alli catijcunami.