Apocalipsis 10 - Dios Rimashca Shimicunami

Uchilla librota ángel charicujmanta

¹ Chai q'uipaca, p'uyuhuan pillurishca imatapish rurai tucuj shujtaj ángel cielomanta uriyacujtami ricurcani. Paipaj uma jahuapipish shuj cuichitami charirca. Ñahuipish inti shina achij nicujmi carca. Changacunapish lunyacuj nina shinami carca.

² Paipaj maquipica, shuj uchilla libro pascashcatami charicurca. Alli lado chaquihuanca mama cucha jahuapi, lluqui chaquihuanca allpa jahuapi sarushpami shayacurca.

³ Paica león huacarij shinami sinchita caparirca. Chashna caparijpi pai caparishca shinallataj tigra uyarishpaca, canchis c'ulun nishcacunahuanmi sinchita uyarirca.

⁴ Chai canchis c'ulun nijcuna rimashca uyarishcatami ñucaca quillcasha nicurcani. Ña quillcasha nicujpica cielomanta shuj rimaica: “Chai canchis c'ulun nijcuna rimashcataca huaquichishpa saquilla, ama quillcaichu” nijtami uyarcani.

⁵ Mama cucha jahuapi, allpa jahuapi shayacujta ricushca angelca, paipaj maquitami cieloman chutarca.

⁶ Chaipica jahua pachata, chaipi ima tiyajcunatapish, allpa pachata, chaipi ima tiyajcunatapish, mama cuchata, chaipi ima tiyajcunatapish ruraj, huiñai huiñaita causacuj Diospaj shutipimi cashna nirca. Cunantajca ña mana ashtahuan shuyagrinichu.

⁷ Sujtapaj q'uipa ángel trompetapi tocana punllacunapi tocai callarijpimi, Diosca pi mana entendi tucuipaj pai rurasha nishcataca pajtachinga. Chaitaca paipajta ruraj profetacunaman pai huillachishca shinallatajmi pajtanga nircami.

⁸ Ñaupaman cielomanta rimai ñucahuan uyarishcallatajmi cutin ñucataca: “Ri, mama cucha jahuapi, allpa jahuapi shayacuj angelpaj maquipi caj, pascashca uchilla librota japigri” nirca.

⁹ Angelpajman rishpa uchilla librota cuhuai nijpimi paica: “Japi, micui, cambaj shimipica miel shinami mishquinga, ashtahuanpish huijsataca jayajyachingami” nircami.

¹⁰ Chaimi angelpaj maquimanta uchilla librota japishpa micurcani. Ñuca shimipica, miel shina mishquijllami carca. Ashtahuanpish micushca q'uipaca, ñuca huijsataca jayajyachircami.

¹¹ Chaipimi paica: “Cunanca achca pueblocunapish, achca llajtacunapish, achca ch'ican ch'icanta rimajcunapish, jatun mandajcunapish imalla tucuna cashcata Dios canman huillashcataca cutinmi huillana cangui” nirca.