AMÓS 5 - Dios Rimashca Shimicunami

Diosman cutirichij nishcamanta

¹ Israelcunalla, cancunamantaca yupashpa yupashpami huacagrini. Caita uyahuaichij.

² Israelcunaca c'arihuan manaraj chayarinacushca soltera shina cashpapish, urmashcamari. Cutinca ña mana jatari tucungachu. Quiquin allpallapitajmari urmashpa saquirishca. Paita jatarichijca, pi mana tiyanchu.

³ Mandaj Jatun Diosca cashnami nin: “Israelcunaca, maijan pueblomanta huaranga runacunahuan macanacunaman llujshishpaca patsajllahuanmi tigramungacuna. Maijan pueblomanta patsaj runacunahuan macanacunaman llujshishpaca, chungallahuanmi tigramungacuna” ninmi.

⁴ Shina cajpipish Mandaj Diosca, israelcunataca cashnami nin: “Cancuna llaquirishpa ñucata mashcashpaca, mana huañunguichijchu.

⁵ Bet-el pueblomanca ama ringuichijchu. Gilgal pueblomanpish ama yaicunguichijchu. Beerseba pueblomanpish ama c'uchuyanguichijchu. Gilgal pueblopi causajcunaca, prezu apashcami canga. Bet-el pueblopish, tucui chingachishcami saquiringa” ninmi.

⁶ Llaquirishpataj Mandaj Diosta mashcashpaca, mana huañunguichijchu. Ñataj Josepaj huahua huahuacunataca, ninahuan rupachishpa tucuita chingachiman. Bet-elpi causajcunaca chai ninataca, pi mana huañuchi tucungachu.

⁷ Cashcata ruranataca, pambapimi shitanguichij. Chashna cashpamari, ajenjo jayaj shina llaquichishcanguichij.

⁸ Pléyades, Orión shuti luzerocunatapish ruraj Diosta mashcaichij. Paica tutatapish achijyachinmi, punllatapish tutayachinmi. Paica mama cucha yacutapish mandajmi, paica chai yacutaca allpa jahuapi tsirapajmi. Paica Mandaj Dios shutimi.

⁹ Paica c'ari c'aricunata quichujcunaman fuerzata cujmi. Chai quichujcunataca, paimi jatun patacunata urmachichun cachan.

¹⁰ Paicunaca puebloman yaicuna pungupi cunashpa rimajcunataca p'iñarcacunami. Cashcata rimajcunatapish mana ricunachircacunachu.

¹¹ Shinallataj huajchacunataca sarushpa macashpami, impuestomantaca carga trigota apanguichij. Chashna quichushpami, labrashca rumicunahuan huasichircanguichij. Chai huasicunapipish mana causanguichijchu. Cancuna tarpushca, sumaj uva chagracunamanta vinollatapish rurashpa mana ubyanguichijchu.

¹² Ñucaca cancunataca mana cazushpa yallitaj millaita rurashcatapish, jatun juchacunata rurashcatapish yachanimi. Cashcata ruraj runata llaquichicushcatapish, chai llaquichicujcunapura tucushpa camarita japijcunatapish ricucunimi. Juezcunaca, huajchacunallatami llaquipi churanguichij.

¹³ Chashna mana allita rurajpipish, alli yuyaiyuj runaca pitapish mana juchachishpa upalla saquinllami. Llaqui punllacunapi cashcamantami, mana imata ni tucun.

¹⁴ Allita ruranallata yuyaichij, millaita ruranataca cungarichij. Chashna allita rurashpaca, causanguichijmi. Cancunaca, tucuita Mandaj Diosca ñucanchijhuanmi ninguichijmi. Cancuna chashna nishca shinallataj, Mandaj Diosca cancunahuanmi canga.

¹⁵ Imapish millaitaca p'iñaichij, imapish allitaca ashtahuan ruraichijlla. Juezcunapish, cashcata rurana yuyailla caichij. Cancuna chashna tucuita allita rurajpica, tucuita Mandaj Diosca Josepaj huahua huahuacuna maijan saquirishcacunallatapish llaquingapishchari.

¹⁶ Tucuita Mandaj Taita Diosca cashnapishmi nin: “Tucui plazacunapimi huacai tiyanga, tucui ñancunapimi aij, aij nishpa huacana tiyanga. Tarpuj runatapish, huacaj shamui nishpami cayangacuna. Yupashpa yupashpa huacanata alli yachajcunatapish huacachunmi cayangacuna.

¹⁷ Ñuca cancunata llaquichinaman shamujpica, tucui uva chagracunapipish huacangacunami” ninmi Mandaj Diosca.

¹⁸ Mandaj Dios shamuna punllata shuyacujcunalla, ¡aij imachari tucunguichij! Mandaj Dios shamuna punllataca ¿imapajtaj shuyanguichigari? Pai shamui punllaca, amsa tutami canga. Ima achijyachijpish, mana tiyangachu.

¹⁹ Chai llaqui punllapica, leonta miticunaman callpacushpapish, osohuanmi tupanga. Huasipi miticugrishpaca, pata quinripi huancarijpica, culebrami ñapish caninga.

²⁰ Mandaj Dios shamui punllaca, tucuimi yallitaj amsa tucunga. Ima achijyachijpish, mana tiyangachu.

²¹ “Cancuna cushicushpa jatun tandanacuicunata rurajpipish manataj munanichu, manataj ricunanchu. Cancuna sumaj tandanacuicunata rurashcahuanpish manataj cushicunichu.

²² Ñucaman tucuita cushpa rupachijpipish, mana chasquinichu. Ñucaman imata cuna cashcata cujpipish, manataj chasquinichu. Ñucahuan alli cangapaj cancunapaj huira animalcunata ñucaman cushpa rupachijpipish, manataj ricushallapishchu.

²³ Achca cantajcuna cantashpapish ama p'iñachichijchu, anchuichijlla. Tocanacunapipish ama tocaichijchu.

²⁴ Ashtahuanpish cancunaca uri ricuj yacu mana chaquirij shinapish, pugyu yacu mana chaquirij shinapishmi cashcata ruranataca mana cungarina canguichij.

²⁵ Israelcunalla, cancunaca shitashca pambata chuscu chunga huatata shamucushpapish, ñucamanca imalla cuna cashcatapish cushpa huañuchinapaj ¿curcanguichijchari?

²⁶ Ashtahuanpish cancunaca Moloc, Quiún shuti dioscunapaj carpa huasitami apashpa purircanguichij. Chai dioscunapaj luzerotami rurarcanguichij.

²⁷ Chaimantami cancunataca, Damasco pueblota pasashpa huashaman cachasha” ninmi Mandaj Diosca. Paica tucuita Mandaj Taita Dios shutimi.