AMÓS 3 - Dios Rimashca Shimicunami

León huacaricuj shina Dios llaquichinamanta

¹ Israelcunalla, Mandaj Dios cancunata rimashcata uyaichij. Egipto llajtamanta cancunata llujshichimuj Mandaj Diosca, cancunataca llaquichigrinmi. Paimi cashna nin:

² “Tucui cai pachapi causajcunapuramantaca, cancunallatami ñucapajlla causachun agllarcani. Chashna agllashca jahua yallitaj millaita rurashcamantami, cancunataca llaquichishataj” ninmi.

³ Pipish manapish shuj yuyailla cashpaca, ¿ishqui tandalla purinmanchu imashi?

⁴ Leonca sachapica manapish imata japishpaca ¿huacarinmanchu imashi? Huahua leonpish jutcupi manapish ima aichata micucushpaca ¿huacarinmanchu imashi?

⁵ ¿Pajarocuna ricucujpi trampata churajpica, pambaman urmangallachu imashi? Pambapi tiyacuj trampaca ¿manapish ima yaicujpica, urmangachu imashi?

⁶ Trompetapi tocashca pueblopi uyarijpica ¿manachu gentecunaca mancharishpa caparincuna? Mandaj Dios manapish llaquichijpica, pueblopica ¿ima llaqui tiyangallachu imashi?

⁷ Mandaj Jatun Diosca pai ima nishcata huillaj paita servijcunaman ima tucunata manaraj huillachishpaca, mana llaquichinllachu.

⁸ León huacaricujta uyashpaca ¿pitaj mana mancharingari? Mandaj Jatun Dios rimashcata uyashpaca ¿pitaj mana huillangari?

Samaria llajtata llaquichisha nishcamanta

⁹ Asdod pueblota mandajcunamanpish, Egipto llajtata mandajcunamanpish, paicuna mandana huasicunapi cashna nishpa huillagrichij: “Samaria urcuman tandanacushpa, chai llajtapi causajcuna millaita ruracujta ricugrichij. Paicunaca yallitaj llaquichishpami causacuncuna.”

¹⁰ Samaria pueblopi causajcunamantaca Mandaj Diosca cashnami nin: “Paicunaca imatapish allita ruranataca manataj yachancunachu. Ashtahuanpish shujtajcunata macashpa quichushcacunallatami, paicunapaj mandana huasicunapipish jundachincuna” ninmi.

¹¹ Chashna millaicuna cajpimi, Mandaj Jatun Diosca paicunataca cashna nirca: “Cancunata p'iñajcunaca cai pueblo muyundijtami shayaringacuna. Paicunaca cai pueblo muyundij jatun patacunata urmachishpami, cambaj jatun mandajcuna mandashpa tiyana huasicunamantapish tucuita shuhuashpa apangacuna” ninmi.

¹² Mandaj Diosca cashnapishmi nin: “Samaria pueblopi causaj israelcunaca ñutujlla tiyanacunapi, camacunapimi sirishpa cainancuna. Paicunaca leonpaj shimimanta shuj michij, paipaj oveja ishqui chaquita, mana cashpaca mirga rinrinllata quichushca shinallami quishpiringacuna” ninmi.

¹³ Tucuita Mandaj Diosca cashnapishmi nin: “Jacobpaj huahua huahuacunamanca, paicunata llaquichina cashcata huillagri nircami.

¹⁴ Israelcuna ñucata mana cazushcamanta llaquichicui punllapica, Bet-el pueblopi tiyaj altarcunatapish chingachishami. Chai altar esquinacunapi tiyaj gachucunatapish p'itishpami, pambaman shitasha.

¹⁵ Shinallataj usya punllacunapi, tamya punllacunapi miticugrina huasicunatapish chingachishami. Marfilhuan rurashca achca huasicunatami chingachisha” ninmi Mandaj Diosca.