AMÓS 2 - Dios Rimashca Shimicunami

¹ Mandaj Diosca cashnapishmi nirca: “Moab llajtapi causajcunaca, cutin cutin millaita ruracujllapica, paicunata llaquichinataca manataj saquishachu. Paicunaca Edom llajtata jatun mandajpaj tullucunatapish ushpa tucungacamami rupachircacuna.

² Chashna llaquichishcamantaca, Moab llajtallapitajmi ninata japichisha. Chai ninallatajmi, Queriot pueblota mandashpa tiyana huasicunatapish tucui rupachinga. Moab llajtapi causajcunaca, trompetapi tocashpa caparinacucujpimi, tucuicuna huañungacuna.

³ Paicunata jatun mandajtapish, paicunapaj chaupillapitajmi huañuchisha. Jatun mandaj churashca mandajcunatapishmi huañuchisha” ninmi Mandaj Diosca.

⁴ Mandaj Diosca cashnapishmi nirca: “Judá llajtapi causajcunaca cutin cutin millaita ruracujllapica, paicunata llaquichinataca manataj saquishachu. Paicunaca Mandaj Dios mandashcatapish mana cazurcachu. Pai yachachishcacunatapish mana uyanachircachu. Ashtahuanpish paicunapaj ñaupa yayacuna shinallatajmari, imapish mana caj llullashcallata catircacuna.

⁵ Chashna mana allita rurashcamantaca, Judá llajtapica ninatami japichisha. Chai ninallatajmi, Jerusalén pueblota mandashpa tiyana huasicunatapish rupachinga” nircami.

Israelcunatapish llaquichishami nishcamanta

⁶ Mandaj Diosca cashnapishmi nirca: “Israelcunaca cutin cutin millaita ruracujllapica, paicunata llaquichinataca manataj saquishachu. Paicunaca cashcata rurajtaca, cullquipimi c'aturcacuna. Shinallataj imata mana charijtaca, ishqui pargatepimi c'aturcacuna.

⁷ Imata mana charij huajchacunataca, ñutu allpapi singuchishpa saruj shinami llaquichincuna. Cashcata ruraj runapaj allita ruranataca mana yuyancunachu. Yayapish, churipish chai huarmillahuantajmi siririnllacuna. Chashna rurashpami ñuca, jucha illaj shutitaca mapayachincuna.

⁸ Maijan altar c'uchupipish, prendashca churanacunata mantashpami siririncuna. Shinallataj multata cobrashca vinotami paicunapaj rurashcalla dioscunapaj huasipi ubyancuna.

⁹ Ashtahuanpish ñucamari, amorreocunataca paicunapaj ñaupajmanta chingachircani. Paicunataca, cedro yura shina jatun cajpipish, encina yura shina sinchi cajpipish ñucami chingachircani. Paicunapaj muyucunatapish, sapicunatapish chingachircanimi.

¹⁰ Ashtahuanpish cancunataca ñucamari Egipto llajtamanta llujshichircani. Ñucamari shitashca pambataca, chuscu chunga huatacunata pusharcani. Amorreocuna causacun llajtata japichunmi, chashna pusharcani.

¹¹ Shinallataj cancunapaj churicunapuramanta maijancunataca, ñuca ima nishcata huillajcuna cachunmi agllarcani. Maijan q'uipa huiñaicunataca, nazareocuna cachunmi agllarcani. Israelcuna, cancunapuramanta chashna agllashcataca mana chashnachu nishpaca, mana ni tucunguichijchu” nircami Mandaj Diosca.

¹² “Ashtahuanpish cancunaca, vinota mana ubyaj nazareocunamanpish ubyachircanguichijmi. Ñuca ima nishcata huillajcunatapish, ama huillaichijchu nishpami jarcarcanguichij.

¹³ Chashna millaicuna cashcamantaca, gavillahuan junda carreta llapij shinami cancunataca llapisha.

¹⁴ Chashna llaquichicujpica, alli callpajpish manataj callpai tucungachu, fuerzasapa runapish fuerzata mana charingachu. C'ari c'ari caj runapish, paipaj causaitaca manataj quishpichi tucungachu.

¹⁵ Puntajlla caspicunata arcohuan shitajpish mana shitai tucungachu, chaquillahuan alli callpaj runapish manataj callpai tucungachu. Caballopi tiyarishpa callpajpish, paipaj causaitaca manataj quishpichi tucungachu.

¹⁶ Chai llaqui punllapica, tucuicunata yalli c'ari c'ari soldadocunapish lluchullami callpanga” ninmi Mandaj Diosca.