ABDÍAS 1 - Dios Rimashca Shimicunami

Edom llajtapi causajcunata Dios llaquichinamanta

¹ Muscuipi shina Abdías ricushcata quillcashcami. Mandaj Jatun Diosca, Edom llajtapi causajcunamantaca cashnami nirca: Mandaj Dios huillashcataca uyashcanchijmi. Paica shuj huillajtamari tucui llajtacunapi causajcunaman huillanaman cacharca. Chai huillajca cashnami nirca: Edom llajtapi causajcunahuan macanacungapaj jatarichigari, jatarishunchigari.

² “Riqui Edom, cantaca cai pachapi tiyaj llajtacunamanta yallitaj uchilla llajtatami rurarcani. Chaimantami cantaca tucuicuna p'iñancuna.

³ Canca jatun tucushpami umarircangui. Jahua peña quinripi tiyaj jutcucunapi causashpallami: ¿Pitaj caimantaca pambaman urmachingari? yuyangui.

⁴ Águila shina jahua huairata jatarishpa rijpipish, luzerocuna chaupipi tazinta ruracujpipish, chaimanta urmachishpa shitashallami. Mandaj Diostajmi chashna nini.

⁵ Cambajman shuhuacuna tuta shamushpa, can imalla charishcataca shuhuashpapish ¿manachu paicuna apana pajtallata shuhuanmancuna? Uvata tandajcuna tandashpapish ¿manachu ch'alanallatapish saquinmancuna? (¡Ashtahuanpish cantaca tucuimari chingachishcacuna!)

⁶ Esaupaj imalla charishcacunata pacashcatapish mashcashpami, tucuita apashcacuna.

⁷ Canhuan apanacuj llajtacunapish cantaca umarcami. Tucui llajtacunamanmi urata janajta cacharcacuna. Canhuan alli apanacujcunallatajmi cantaca p'iñarcacuna. Canhuan micujcunallatajmi tsagnarishpa urmachun, huascata churarcacuna. Chaica maita mana yuyaita japipajmi” nircami.

⁸ Mandaj Diosca cashnapishmi nirca: “Chai punllapica, Edom llajtapi causaj yachaisapa runacunatapish chingachishami. Esaupaj urcupi causaj alli yuyaiyujcunatapish huañuchishami.

⁹ Temán pueblolla, macanacunata alli yachaj cambaj soldadocunapish manchashpa chujchungacunami. Esaupaj urcupi causaj runacunaca jatunta llaquichishcami huañungacuna.

¹⁰ Cambaj huauqui Jacobta macashpa huañuchishcamantaca, jatunta pingachishpa huiñaipaj chingachishcami saquiringui.

¹¹ Cambaj huauquita p'iñajcuna, paipaj soldadocunata can ricucunpi prezu apacujpipish, Jerusalén pueblo pungucunata p'aquishpa yaicucujpipish, suerteta rurashpa imalla tiyajta chaupinacucujpipish, mana imata nishpa upalla saquircanguillami. Ashtahuanpish chai llaquichijcunapurami tucurcangui.

¹² Cambaj huauquita llaquichicui punllaca, mana ricucunallachu carcangui. Judá llajtapi causajcuna chingarijta ricushpapish, mana cushicunachu carcangui. Paicuna jatun llaquita apacui punllaca, cushicushpa mana asinachu carcangui.

¹³ Pai llaquita apacui punllaca, ñuca pueblo pungutaca mana yaicunachu carcangui. Pai llaquita apacui punllaca, chai jatun llaquicunataca mana ricucunachu carcangui. Pai llaquihuan cai punllaca, pai imalla charishcacunataca mana shuhuanachu carcangui.

¹⁴ Huañunamanta quishpirishpa rijcunatapish mana pacallapi chapashpa huañuchinachu carcangui. Chai jatun llaquimanta miticurishpa saquirijcunatapish mana shujtajcunaman cunachu carcangui.

Israelcunaca shamuj punllacunapi ima shina tucunamanta

¹⁵ Tucui llajtacunata Mandaj Dios jatunta llaquichina punllaca, ñamari quichquiyamucun. Ima shinami shujtajcunata jatunta llaquichircangui, chashnallatajmi cantapish llaquichinga. Can japina cashcataca, apanallatajmi cangui.

¹⁶ Ima shinami cancunaca, ñucapajlla urcupi jayaj ubyanata ubyarcanguichij, chashnallatajmi shujtaj llajtapi causajcunapish chai ubyanataca tucuicuna ubyangacuna. Chai ubyanataca mana samashpami ubyangacuna. Chaita ubyashpaca tucui chingarishpa, ima mana tiyashca shinallatajmi canga.

¹⁷ Ashtahuanpish Sión urcupica, saquirishcacunami quishpiringacuna. Chai urcuca, Diospajlla ch'icanyachishcami canga. Jacobpaj huahua huahuacunaca, paicunapaj quiquin allpacunallatatajmi japingacuna.

¹⁸ Jacobpaj huahua huahuacunaca, nina shinami canga. Josepaj huahua huahuacunaca, lunyacuj nina shinami canga. Esaupaj huahua huahuacunaca, chai ninapi rupashpa chingarijlla supas shinami canga. Esaupaj huahua huahuacunamantaca, shujllapish mana quishpiringachu” ninmi Mandaj Diosca.

¹⁹ Neguev llajtapi causaj israelcunaca, Esaupaj huahua huahuacuna causana urcutami japingacuna. Sefela pambapi causajcunaca, filisteocunapaj llajtatami japingacuna. Shinallataj Efraín llajtatapish, Samaria llajtatapishmi japingacuna. Benjaminpaj huahua huahuacunaca, Galaad llajtatami japingacuna.

²⁰ Prezu apashcamanta tigraj Israel soldadocunaca, Canaán llajtamantaca Sarepta pueblocamami japingacuna. Shinallataj Jerusalén pueblomanta prezu apajpi Sefarad pueblopi causaj israelcuna tigrashpaca, Neguev llajtapi tiyaj pueblocunatami japingacuna.

²¹ Esaupaj urcupi causajcuna imalla rurashcata ricungapajmi, quishpichijcunaca Sión urcuman huichiyangacuna. Chai punlla mandanaca, Mandaj Diospajllami canga.