3 Juan 1 - Dios Rimashca Shimicunami

Allillachu canguichij nishcami

¹ Cunaj yuyaj ñucami, ñuca tucui shunguhuan c'uyashca Gayoman quillcani.

² C'uyashca huauqui, cantaca imapipish alli cachun, Diosta alli caticushca shinallataj cambaj aichapipish alli cachunmi munani.

³ Huauquicuna shamushpa, mana llullapi can ima shina puricujta, ima shina cashcatataj huillajpimi, ñucaca achcata cushicurcani.

⁴ Ñuca huahuacuna mana llullapi nishca shina puricun nijta uyashpami, tucuimanta yalli jatunta cushicuni.

Gayo pozachij cajpi alli nishcami

⁵ C'uyashca huauqui, imatapish caishuj crijcunapaj allita rurashpaca, allitatajmari ruracungui. Ashtahuantajca shujtaj llajtamanta chayamujcunapajmi allita ruracungui.

⁶ Can chashna c'uyaj cashcataca paicunaca tandanacushca crijcunapaj ñaupajpimi huillarcacuna. Diospajta rurana yuyailla paicuna ashtahuan rurashpa purichunca, ima illashcata cushpa allita rurapangui.

⁷ Paicunaca Jesusta c'uyashcamantami, paimanta huillanaman llujshircacuna. Chaimi paicunaca mana judiocunaman huillashpaca imata mana japishpa huillacuncuna.

⁸ Mana llullata ashtahuan huillachunca, ñucanchijmari paicunamanca imatapish cuna canchij. Chashna rurashpami tucuicuna huaicashpa huillacujcuna cashun.

Diospajta rurajcunata Diótrefes jarcashcami

⁹ Ñucaca tandanacushca crijcunamanmi quillcarcani. Ashtahuanpish Diotrefesca, paicunapurapi pai mandaj canata munashcamantami, ñucanchij quillcashpa mandashcataca mana chasquin.

¹⁰ Ñuca chaiman rishpaca, ñucanchijta mana alli nishpa rimashcatami paitaca cayashpa tapusha. Paica mana chaillatachu ruran, shujtaj huauquicuna chaiman chayajpipish mana chasquinchu. Maijancuna paicunapaj huasipi chasquisha nijpipish ama chasquichijchu nishpami jarcan. Chasquijcunataca tandanacushca crijcunamanta llujshichishpami cachan.

Demetrioca allicunata rurajmi cashca

¹¹ C'uyashca huauqui, millaita rurajtaca ama catishpa rurangui. Ashtahuanpish allita rurangui. Maijanpish allita rurajca Diospajmi, maijanpish millaita rurajca Diostaca manaraj ricushcachu.

¹² Demetriotaca, tucuicunami alli cashcata huillancuna. Pai ima shina causashcapish shujtajcuna allimi nishca shinallatatajmi ricuchin. Ñucanchijpish pai ima shina cashcata mana llullashpa huillashcataca cancunallataj yachanguichijmi.

Alli cashca canguichij nishpa tucuchishcami

¹³ Ñucaca, achca quillcanatami cambajca charini. Chashna cashpapish tintahuan plumallahuanca mana quillcashpa cachasha ninichu.

¹⁴ Chaipaj randica, ñahui ñahui parlanacungapajmi, utca ricunata shuyacuni.

¹⁵ Sumaj causaica canhuan cachun. Cambaj rijsishcacunapish cantaca alli cashca cachun nincunami. Canpish ñucanchij rijsishcacunataca cada quiquinta alli cashca cachun nipangui.