2 Timoteo 3 - Dios Rimashca Shimicunami

Q'uipa punllacunapica yallitaj millaicunami tucunga nishcami

¹ Caitapishmi yachana cangui, cai punllacuna tucurinapajca llaqui punllacunami shamunga.

² Chai punllacunapica quiquinlla alli canata munajcuna, quiquinpajlla charinata munajcuna, jatun tucushcacuna, valishca tucujcuna, Taita Diosta c'amijcuna, yaya mamata mana cazujcuna, mana pagui nijcuna, Taita Diosta mana rijsijcuna,

³ rumi shungucuna, p'iñarishpapish manataj cungarijcuna, yangamanta juchachijcuna, mana jarcari tucujcuna, p'iña millaicuna, allita p'iñajcuna,

⁴ quiquinpurallatataj llaquipi churajcuna, jahualla p'iñarijcuna, imapish mana caipajta yuyajcuna, Taita Diosta mashcanapaj randica aicha munaipi cushicunallatami c'uyangacuna.

⁵ Ricuipica Dios yuyailla caj shinami cangacuna. Ashtahuanpish paicuna rurashcahuanca Diosca mana tiyashca cashcatami ricuchingacuna. Chaicunamantaca anchuringui.

⁶ Chaicunaca huasicunaman yaicushpa, ima millaitapish ruraj, juchasapa, umarijlla huarmicunatami umancuna.

⁷ Chai huarmicunaca yachanataca mana saquishpa yachacunllacunami. Ashtahuanpish mana llulla ima shina cashcatatajca manataj entendingacunachu.

⁸ Janes, Jambres yumbucunapish Moisestaca mana cazurcacunachu. Chai shinallatajmi paicunapish mana llulla shimitaca mana cazuncuna. Paicunaca yuyai ismushca, mana crij cashcatami ricuchincuna.

⁹ Ashtahuanpish chaicunaca mana unitachu umashpa causangacuna. Moisesta mana cazuj ch'ahuancunata shinallatajmi, paicuna umacushcataca tucuicuna yachaj chayangacuna.

¹⁰ Ashtahuanpish canca ñuca yachachishcata catij, ñuca causashca shina causaj, ñuca yuyashca shinallataj yuyaj, ñuca shinallataj crij, ñuca shinallataj chaipitaj catiraj, ñuca shinallataj c'uyaj, ñuca shinallataj mana p'iñarij,

¹¹ ñucata shinallataj catirashpa llaquichishca, ñuca shinallataj llaquita apajmi cangui. Antioquiapi, Iconiopi, Listrapi llaquicunata ñuca apashca shinallatajmi apaj cangui. Tucui chaicunamantaca ñucataca Mandaj Jesusmi quishpichirca.

¹² Cristo Jesushuan shujlla tucushpa pai yuyailla causasha nijcunaca tucuicunallatajmi catirashpa llaquichishca canga.

¹³ Ashtahuanpish millaicuna, umajcunaca, ashtahuan ashtahuan millai tucushpami, umajcuna umashcacunapish tucushpa catingacuna.

¹⁴ Chashna cajpipish, canca imata yachashcataca chashnataj cashca yuyailla cangui. Maijanlla yachachishca cashcataca yachanguimi.

¹⁵ Canca huahuamanta pachami, Diospaj Quillcacunataca yachangui. Chaicunami Cristo Jesusta crishpa quishpirichun, cantaca yachajta rurai tucun.

¹⁶ Diospaj shimica, paillataj Quillcachishca cashcamantami yachachingapaj, ima shina cashcatataj rimangapaj, cunangapaj, cashcata ruraj cachun yachachingapajpish alli.

¹⁷ Diospajta ruraj runaca tucuita allita ruranapajca alli allichishca allitaj yachajtaj cachunmi cashna yachachinga.