2 Tesalonicenses 2 - Dios Rimashca Shimicunami

Juchasapa runami ricuringa nishcami

¹ Huauquicuna ñucanchijta Mandaj Jesucristo shamunamanta, paihuan tandanacunamantaca cashnami roganchij.

² Cancuna allita yuyacushcataca pi jahualla cuyuchichun ama saquinguichij. Espiritumi huillan nishpa, shimihuan rimashpapish, ñucanchij quillcashca shina tucushpa, Mandaj Jesús shamuna punllaca ñamari caillapi nijpipish ama mancharinguichij.

³ ¡Cancunataca ima shinapish pi ama umachun! Pai shamunapajca crishcata saquijcuna, chingarinaman rinapaj caj juchasapa runarajmi ricuringa.

⁴ Chai runami tucuicunapaj jahuapi caj Taita Diostapish paita adorajcunatapish p'iñashpa jataringa. Chaimantaca Taita Diosmi cani nishpami, Taita Dios tucushpa Taita Diosta adorana huasipi tiyaringa.

⁵ Cancunahuan cashparaj, ñuca chashna nishcata ¿manachu yuyaringuichij?

⁶ Chai runataca pai ricurina punllacama amaraj ricurichun pi jarcacushcataca cancunallataj yachanguichijmi.

⁷ Pi mana ricuipaj millaica ñami millaita rurachicun. Pai ama ashtahuan millaita rurachichun jarcacuj espiritumi caipiraj.

⁸ Chai q'uipami chai millai runaca ricuringa. Chaitami Mandaj Jesusca, paipaj shimihuan p'ucushpalla huañuchinga. Pai achij nicuj shamushpami chingachinga.

⁹ Chai millai runaca Satanaspaj poderhuan shamushpami imatapish rurai tucushcahuan, ricuchinacunata rurashcahuan, milagrocunata rurashcahuanpish umanga.

¹⁰ Quishpichishca canapaj mana llullajpaj c'uyaita mana chasquishcamantami chingarinaman rinapaj cajcuna tucun. Chaicunatami chashna tucui laya millaihuan umanga.

¹¹ Chai mana llullashpa huillashcata mana uyasha nishcamantami llullata crichun, llullashpa crichijmanca llullata crichina poderyuj cachun saquinga.

¹² Paicunaca mana llullashpa huillashcata mana crisha nishpa, ashtahuanpish millaita ruranata munashpa rurashcamantami tucuicuna jatun llaquiman cachashca cangacuna.

Quishpichishca canapaj agllashcacunami

¹³ Mandaj Jesús c'uyashca huauquicuna, ñucanchijca cancunamantaca Taita Diostaca pagui nicunallamari canchij. Taita Diospaj Espíritu jucha illajta rurajpi mana llullashpa huillashcata crijpi quishpichingapajmi Taita Diosca manaraj cai pachata rurashpa cancunataca agllarca.

¹⁴ Chashna cashcamantami ñucanchij huillashca alli huillaita crijpica, ñucanchijta Mandaj Jesucristo shina sumaj tucuchun Taita Diosca cancunataca agllarca.

¹⁵ Chaimanta huauquicuna sinchicuna caichij. Ñucanchij shimihuan huillashpapish, quillcashpapish yachachishcataca chaitataj catiraichij.

¹⁶ Jesucristo ñucanchijta Mandaj, Taita Dios ñucanchij Yayami mana c'uyaipajta c'uyashpa, ñucanchijmanca huiñaita cushicunata, pai yuyailla canatapish curca.

¹⁷ Cancunapaj shungucunatapish cushichishpa tucui ima allita ruranapipish, rimanapipish chaitataj rurachichun rimachichun ninchijmi.