2 SAMUEL 6 - Dios Rimashca Shimicunami

Davidca Diospaj arcata Jerusalenman apanata yuyashcami

¹ Davidca israelcunamanta agllashca 30.000 tucui runacunatami cutinllataj tandachirca.

² Chaimantaca Davidca tucui paihuan cajcunandijmi Judapi caj Baalaman rirca. Diospaj arcata chaimanta apamungapajmi rirca. Chai arca jahuapi querubincunapaj chaupipimi tucuita Mandaj Diosca causan. Chaipimi imata cashpapish paiman mañana.

³ Lomapi caj Abinadabpaj huasimanta Diospaj arcata llujshichishpaca shuj mushuj carropimi churarcacuna. Abinadabpaj Uza, Ahío shuti churicunami chai carrota maillata rina cashcata ricuchishpa pusharcacuna.

⁴ Lomapi caj Abinadabpaj huasimanta Diospaj arcata apacujpica, Ahío runami Diospaj arcata ñaupashpa rirca.

⁵ Davidpish tucui israelcunapish Mandaj Diospaj ñaupajpimi tushushpa rircacuna. Paicunaca haya caspimanta rurashca tucui laya tocanacunapi arpacunapi, salteriocunapi, panderocunapi, flautacunapi, cimbalocunapimi tocashpa ricurcacuna.

⁶ Naconpaj trillana patioman chayashpaca, huagracuna ñitcajpimi, Uza runaca, Diospaj arca ama urmachun paipaj maquihuan japirijpi,

⁷ Mandaj Diosca Uza runahuanca nina sindirij shina p'iñarirca. Mandaj Diospaj arcata tuparishcamantami Taita Diosca paitaca huañuchijpi, Diospaj arca c'uchullapitaj urmashpa huañurca.

⁸ Uza runata Mandaj Dios huañuchishcamantaca, Davidca achcatami llaquirirca. Chaimi chai pambataca, Pérez-uzata shutichirca. Cunancama chai shutillatajmi.

⁹ Davidca, Mandaj Diosta manchashcamantami chai punllaca: “Diospaj arcataca ñuca huasimanca maitataj apashari” nishpaca,

¹⁰ Mandaj Diospaj arcataca paipaj pueblopi caj paipaj huasimanca mana apashpa, geteo Obed-edompaj huasiman apachun mandarca.

¹¹ Mandaj Diospaj arcaca quimsa quillatami, geteo Obed-edompaj huasipi carca. Mandaj Diosca Obed-edommanpish, paipaj huasi ucupuramanpish achca allicunatami curca.

Davidca Diospaj arcata Jerusalenman apashcami

¹² Mandaj Diospaj arca Obed-edompaj huasipi cashcamantaca paipaj familiaman, tucui imalla charishcacunapipish achca allicunatami Mandaj Diosca cushca nishpa jatun mandaj Davidman huillajpimi paica, Obed-edompaj huasiman rishpa cushicuihuan Diospaj arcataca paipaj puebloman aparca.

¹³ Diospaj arcata apajcuna sujta tatquita purijpimi, Davidca shuj huagrata, huirayashca carnerotapish Diosman cushpa huañuchirca.

¹⁴ Davidca mandaj Diospaj ñaupajpimi tucui fuerzahuan tushushpa rirca. Paica linomanta rurashca efod churanata churashcami carca.

¹⁵ Davidpish tucui israelcunapish Mandaj Diospaj arcataca chashna cushicuihuan caparinacushpa, trompetacunapi tocashcahuanmi aparcacuna.

¹⁶ Mandaj Diospaj arcahuan Davidpaj puebloman chashna ña chayacujpica cashnami tucurca: Jatun mandaj Davidca Mandaj Diospaj ñaupajpi jahuata saltashpa tushuihuan shamucujtami, Saulpaj ushushi Micalca huasi shuj ventanamanta ricurca. Chaimi paipaj shungupica Davidtaca p'iñarca.

¹⁷ Davidca ñaupamanmi Mandaj Diospaj arcata churanapajca shuj carpa huasita shayachishca carca. Mandaj Diospaj arcata ña chayachishpaca, chaupi huasi ucupi maipi chai arcata churanata rurachishcallapitajmi churarca. Chaipimi Davidca Mandaj Diosman cushpa tucui rupachinatapish cushpa rupachirca, sumaj causaimantapish Mandaj Diosman curca.

¹⁸ Davidca Diosman cushpa tucui rupachinatapish cushpa rupachishca q'uipa, sumaj causaimantapish Diosman cushca q'uipaca, tucui israelcunataca tucuita Mandaj Diospaj shutipimi alli cashca canguichijman nirca.

¹⁹ Chai q'uipaca tucui chaipi cajcunaman, tucui tandanacushca israelcunamanmi c'aricunamanpish, huarmicunamanpish cada shujman shuj tandahuan, mirga aichahuan, chaquichishca uvahuan rurashca shuj tandahuan cararca. Chaimantaca, tucuicuna paicunapaj huasicunaman rircallacunami.

²⁰ David, paipaj huasi ucupuracunata alli cashca cachun ninaman tigracujpica, Mical huarmi tupanaman llujshishpaca: –¡Israelcunata jatun mandajca, cunanca yallitaj alli nishcamari tucushca. Paipajta rurajcunapajta ruraj huarmicunapaj ñaupajpi maijan mana pingajcuna shina lluchulla tucushpa tushushpaca ima allitataj rurashcari!– nircami.

²¹ Chaimi Davidca Micaltaca: –Mandaj Diosmari ñucataca cambaj yayatapish, cambaj huasi ucupuracunatapish yalli ñucata munashpa pai Mandaj Dios agllashca israelcunata jatun mandaj cachun churarca. Chaimi Mandaj Diospaj ñaupajpi chashna rurarcani. Chaimanta Mandaj Diospaj ñaupajpica tushushami.

²² Chashna nijpipish cunanta yalli ashtahuan millashcamari tucusha. Cambaj ricuipica yanganchishcami casha. Ashtahuanpish can rimacushca ñucapajta ruraj huarmicunapaj ñaupajpica paicuna alli nishcami casha– nircami.

²³ Saulpaj ushushi Micalca pai huañungacamami, huahuacunataca manataj charirca.