2 SAMUEL 4 - Dios Rimashca Shimicunami

Is-bosetta huañuchijcuna Davidpajman shamushcami

¹ Saulpaj churi Is-bosetca, Hebronpi Abner huañushcata yachashpaca, achcata mancharishpami ima yuyai illaj shina tucurca. Tucui israelcunapish achca manchaihuanmi carcacuna.

² Saulpaj churica shuhuacunata pushaj ishqui runacunatami charirca. Chaicunamanta shujca Baana, caishujca Recabmi carca. Paicunaca Beerotmanta caj Rimonpaj churicunami carca. Beerotpish Benjaminpaj llajtallapitaj causaj Benjamín aillullatajmi nishcami carca.

³ Beerotitacunaca ñaupamanmi Gitaimman miticushpa rircacuna. Paicunaca cunan punllacunacamami shujtaj llajtamanta shinalla chai llajtallapitaj causancuna.

⁴ Saulpaj churi Jonatanca, Mifi-boset churitami charirca. Paica ishquindij chaqui patojomi carca. Mifi-boset pichca huatacunayuj cajpimi, Jezreelmanta huillajcunaca Saulpish, Jonatanpish huañunmi nijpi, paita cuidacuj huarmica Mifi-bosetta japishcahuan miticushpa utca callpacujpi, chai huahuaca urmashpa patojo saquirirca.

⁵ Beerotita Rimonpaj churi Recabpish, Baanapish, yallitaj rupai punlla cajpimi, Is-bosetpaj huasiman yaicurcacuna. Paica micushca q'uipami, dormicushca carca.

⁶ Huasita cuidaj huarmica trigota huairachicushpami, chaipi dormishca carca. Chaimi Recab, paipaj huauqui Baanapish huasiman yaicushcallacuna carca.

⁷ Paicuna yaicunapajca, Is-bosetca pai dormina huasi ucu camapimi dormicushca carca. Chaimi paicunaca chugrichishpa huañuchishpa cungata p'itishpa, umataca apashpa Arabaman rina ñanta tucui tuta rircacuna.

⁸ Is-bosetpaj umataca David Hebronpi cajpi paipajman apamushpami jatun mandajtaca: –Canta p'iñashpa huañuchisha nishpa catishpa purij Saulpaj churi Is-bosetpaj umaca caipimi. Cunanca ñuca amito jatun mandajlla, Mandaj Diosmi Saulpaj huahua huahuacunataca tucuita huañuchichishca– nircami.

⁹ Chaimi Davidca beerotita Rimonpaj churicunataca Recabtapish, paipaj huauqui Baanatapish: –¡Mandaj Diosca causajmi! Paimi ñucataca tucui llaquimanta llujshichirca.

¹⁰ Saulmantapish shuj huillajca ñucapaj alli huillanatami apamuni yuyashpa ñami Saulca huañushca nishpa huillajpica, huillashcamanta paiman cunataca paitami japishcahuan Siclagpi huañuchircani.

¹¹ Manapish ima mana allita rurashpa paipaj huasipi paipaj camapi dormicujta japishpa huañuchij millai runacunatacarin chai yahuarmantaca cancunatacarin ¿manachu huañuchishpa cai pachamanta anchuchinataj cani?– nirca.

¹² Chashna nishcahuan Davidca paipajta rurajcunata mandajpica, paicunaca chai runacunata huañuchishpami, maquicunata chaquicunata p'itishpa Hebronpi caj tanque patapi huarcurcacuna. Chai q'uipaca Is-bosetpaj umata japishpami, Hebronpi caj Abnerta churashca jutcullapitaj churarcacuna.