2 SAMUEL 21 - Dios Rimashca Shimicunami

Gabaonitacunata huañuchishcamanta paicunapish huañuchishcami

¹ David mandacui punllacunapica quimsa huata jundatami yaricai tiyarca. Davidca Mandaj Diostami tapurca. Mandaj Diosca Davidmanca: “Saulpish, paipaj huasi ucupuracunapish gabaonitacunata huañuchishpa yahuarta jichashcamantami chashna llaquica tiyan” nircami.

² Chaimi jatun mandajca gabaonitacunata cayashpa paicunahuan parlanacurca. (Gabaonitacunaca mana israelcunapurachu carca. Paicunaca amorreocunapuramanta shuj mirga saquirishcacunami carca. Paicunahuanmi israelcunaca paicunata mana llaquichinata ari nishcacuna carca. Chashna ari nishca cajpipish Saulca Israelpurapi, Judapurapi paicuna ama cachun nishpa mana ricunachishpami paicunataca huañuchina tucurca).

³ Gabaonitacunata David cayashpaca: –Cancunata Saúl llaquichishcamantaca ¿imatataj cancunapajca rurashari? Mandaj Diospaj pueblota cancuna cunanca alli cashca canguichijman nichunca ¿imata rurashpataj cancunataca cushichishari?– nircami.

⁴ Shina nijpi gabaonitacunaca: –Saúl, paipaj huasi ucupuracunahuan llaquichishcamantaca, cullquitapish, curitapish mana ninchijchu. Ni israelcunata pita mana huañuchun ninchijchu– nijpimi jatun mandajca: –Cancuna imatami ninguichij chaitami rurasha– nirca.

⁵ Shina nijpi paicunaca jatun mandajtaca: –Tucui Israel llajtapi ñucanchij ama tiyachun nishpa ñucanchijta p'iñashpa chingachinatami yuyarca.

⁶ Paipaj huahua huahuacunamanta canchis runacunatami ñucanchijman cuchun ninchij. Paicunataca Mandaj Dios agllashpa churashca Saulpaj Gabaa pueblopimi, Mandaj Diospaj ñaupajpi sipishun ninchij– nijpimi, jatun mandajca paicunata cancunaman cushallami nirca.

⁷ Davidca Saulpaj churi Jonatanhuanmi, cambaj familiataca imata mana rurashachu nishpa Mandaj Diospaj ñaupajpi ari ninacushca carca. Chaimi Jonatanpaj churi Saulpaj nieto Mefi-bosettaca perdonashpa gabaonitacunamanca mana curca.

⁸ Ashtahuanpish jatun mandajca Aja runapaj ushushi Rizpa huarmihuan Saúl charishca Armoni, Mefi-boset ishqui churicunatapish japishpami curca. Saulpaj ushushi Micalpaj pichca churicunatapishmi japishpa curca. Chai churicunataca Mehola pueblopi causaj Barzilai runapaj churi Adrielhuanmi charishca carca.

⁹ Paicunata gabaonitacunapaj maquipi cujpimi, gabaonitacunaca Mandaj Diospaj ñaupajpi shuj urcupi sipircacuna. Chaimi paicunaca canchistaj huañurcacuna. Paicunaca cebada cozicha callari punllacunapimi huañurca.

¹⁰ Chaimi Aja runapaj ushushi Rizpa huarmica shuj cañamazuta japishpa rumicunalla c'acapi tendishpa chaipi tiyarirca. Chai huarmica cebada cozicha callari punllamantapacha, tamya punllacuna chayamungacamami chai huañushca aichacunataca punllapish pajarocuna ama micuchun, tutapish ima sacha animalcuna ama micuchun chaipi carca.

¹¹ Aja runapaj ushushi Rizpa chaipi tiyacujtami Davidmanca huillashca carca. Chai huarmica Saulpaj caishuj huarmimi carca.

¹² Davidca Saulpaj tullucunata, Saulpaj churi Jonatanpaj tullucunatapishmi Galaadpi caj Jabes pueblomanta apanaman rirca. Paicunataca filisteocuna Gilboapi mishashpa huañuchishpami, Bet-san plaza pambapi huarcushcacuna carca. Chaipi huarcushcataca Galaadpi caj Jabes pueblomanmi shuhuashpa apashcacuna carca.

¹³ Davidca Saulpaj tullucunatapish, Saulpaj churi Jonatanpaj tullucunatapish chaimanta apamuchishpami, sipishcacunapaj tullucunatapish tandachishpa,

¹⁴ Saulpaj tullucunata, Saulpaj churi Jonatanpaj tullucunataca Benjaminpaj llajtapi caj Zelapi Saulpaj yaya Cista churashca jutcullapitaj churachirca. Jatun mandaj mandashca shinallatajmi tucuita rurarcacuna. Chashna rurajpimi, Taita Diosca paicunahuan p'iña cashcata saquishpa chai llajtapaj allicunata curca.

Abisai runa Davidta ayudashpa quishpichishcami

¹⁵ Filisteocunaca cutinllatajmi israelcunahuan macanacungapaj jatarircacuna. Chaimi Davidca paipajta rurajcunandij macanacungapaj uriyarca. Chai macanacuipi filisteocunahuan macanacushpaca Davidca shaicurcami.

¹⁶ Yallitaj jatun runacunapuramanta caj Isbi-benob shuj runami chaipica carca. Paipaj lanzaca, 300 siclota pizaj broncemi carca. Paica mushuj espadatapish chumbillishcapi aparishcami carca. Davidta huañuchinata pai yuyacujpimi,

¹⁷ Sarviapaj churi Abisai Davidta ayudangapaj chayashpa chai filisteotaca chugrichishpa huañuchirca. Chaimi Davidtaca paipaj runacunaca: “Can huañujpica Israelpaj lámpara huañushca shina ama cachunca cunanmantapacha canca macanacuimanca ñucanchijhuanca manataj llujshinachu cangui” nishpa ari nichircacuna.

Davidpaj runacuna yallitaj jatun runacunata huañuchishcami

¹⁸ Chai q'uipapish Gob pueblopica, cutinmi filisteocunahuan israelcunahuanca macanacui tiyarca. Chaipica husatita Sibecai runami, Saf runata huañuchirca. Safca yallitaj jatun runacunapurapaj huahua huahuamantami carca.

¹⁹ Gob pueblopica cutinllatajmi israelcunahuan filisteocunahuanca macanacui tiyarca. Chaipica, Belenmanta caj Jaare-oregim runapaj churi Elhananmi, geteo Goliatta huañuchirca. Goliatpaj lanzaca ahuana telarpaj pilluna caspi shina racumi carca.

²⁰ Chai q'uipaca yallitaj jatun runa tiyan Gat pueblopimi macanacui tiyarca. Paica maquicunapipish chunga ishqui dedocunata, chaquicunapipish chunga ishqui dedocunatami charirca. Tucuimanta yupajpica ishqui chunga chuscu dedocunatami charirca. Paipish yallitaj jatun runacunapurapaj huahua huahuamantami carca.

²¹ Israelcunata yanganchishpa c'amijpimi, paitaca, Davidpaj huauqui Simeapaj churi Jonatán huañuchirca.

²² Chashnami chai chuscu runacunaca Davidpaj maquipipish, paipajta rurajcunapaj maquipipish urmarcacuna. Chai chuscu runacunaca Gatpi causaj yallitaj jatun runacunapurapaj huahua huahuamantami carcacuna.